នាវាមុជទឹកចិនអាចចុះដល់ជម្រៅឯតទគ្គកម្ម ៦ ០០០ម៉ែត្រ
នាវាមុជទឹកចិនដែលមាននាវិកនៅក្នុងនោះ អាចចុះជាលើកទីមួយនៅថ្ងៃសុក្រទី១៥មិថុនានេះ ដល់ជម្រៅជាង៦ ០០០ម៉ែត្រនៅក្នុងមហាសមុទ្រប៉ាស៊ីហ្វិក ហើយគេនឹងខិតខំចុះឲ្យដល់ឯតទគ្គកម្មថ្មី ពោលគឺប្រមាណ៧ ០០០ម៉ែត្រ។ នេះជាការផ្សាយឲ្យដឹងដោយទីភ្នាក់ងារព័ត៌មានចិនថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
Jiaolong ឬនាគរាជគឺជាឈ្មោះរបស់នាវាមុជទឹកចិនដែលអាចមុជដល់ជម្រៅជាងប្រាំមួយពាន់ម៉ែត្រ នៅក្នុងមហាសមុទ្រប៉ាស៊ីហ្វិក នៅតំបន់រណ្តៅសមុទ្រ la Fosse des Mariannes ដែលមានជម្រៅជ្រៅជាងគេក្នុងលោកយើងនេះ។ ការមុជដល់ជម្រៅឯតទគ្គកម្មជាង ៦ ០០០ម៉ែត្រ ដោយនាវាមុជទឹកចិនដែលមាននាវិកនៅក្នុងនោះ គឺធ្វើឡើងនៅក្នុងក្របខ័ណ្ឌនៃការខិតខំរបស់ប្រទេសចិនដើម្បីស្រាវជ្រាវរុករកសម្បត្តិធម្មជាតិនៅបាតមហាសមុទ្រ។
ការសាកល្បងប៉ុនប៉ងនេះគឺជាការសាកល្បងជាលើកទីមួយដើម្បីឈានឲ្យដល់ឯតទគ្គកម្ម ៧ ០០០ម៉ែត្រ។ នេះការបញ្ជាក់របស់ទីភ្នាក់ងារព័ត៌មានចិនថ្មី។
គួរកត់សម្គាល់ថា នៅចុងខែកក្កដាឆ្នាំ២០១១នាវាមុជទឹកចិនធ្លាប់បានមុជដល់ជម្រៅជាង៥ ០០០ម៉ែត្រម្តងរួចទៅហើយ នៅតំបន់រណ្តៅសមុទ្រ la Fosse des Mariannes ដែលឋិតនៅមិនឆ្ងាយប៉ុន្មានពីប្រទេសហ្វីលីពីន។ ទាំងនេះនឹងអនុញ្ញាតឲ្យនាវាមុជទឹកចិន មុជដល់ជម្រៅមួយដ៏ជ្រៅ ឬអាចមុជដល់៧០%នៃបាតមហាសមុទ្រនៅលើលោក។
ក្នុងរយៈកាលតែប៉ុន្មានទសវត្សរ៍ចុងក្រោយនេះប៉ុណ្ណោះ ប្រទេសចិនបានដេញទាន់មហាប្រទេសជឿនលឿនក្នុងវិស័យស្រាវជ្រាវរុករកតាមមហាសាគរ ប៉ូលនៃពិភពផែនដី ហើយនិងក្នុងវិស័យអវកាស ដោយបានក្លាយជាប្រទេសទីបីក្នុងលោកនៅឆ្នាំ២០០៣ ក្នុងការបញ្ជូនមនុស្សទៅក្នុងអវកាស។
នៅក្នុងវិស័យនាវាមុជទឹករុករកនៅក្នុងមហាសមុទ្រវិញ ប្រទេសចិនបានក្លាយជាប្រទេសទីប្រាំដែលបានមុជដល់ជម្រៅជាង ៣ ៥០០ម៉ែត្រ។
សូមបញ្ជាក់ថា នាវាមុជទឹកដល់ជម្រៅយ៉ាងជ្រៅ នៅតំបន់រណ្តៅសមុទ្រ la Fosse des Mariannes ដែលមានជម្រៅជ្រៅជាងគេក្នុងលោកយើងនេះ ពោលគឺប្រមាណ១១ ០០០ម៉ែត្របានប្រព្រឹត្តនៅឆ្នាំ១៩៦០ ដោយម៉ារីនអាមេរិកាំង។
នារយៈប៉ុន្មានឆ្នាំចុងក្រោយនេះ ប្រទេសចិនបានខិតខំធ្វើការរុករកប្រេងកាតហើយនិងសម្បត្តិធម្មជាតិវត្ថុធាតុដើមដទៃទៀត ដើម្បីចិញ្ចឹមបំប៉នកំណើនសេដ្ឋកិច្ចដ៏ឆាប់រហ័សរបស់ខ្លួន។
ការស្រេកឃ្លានចង់បានកាន់តែខ្លាំងឡើងៗរបស់ប្រទេសចិនក្នុងវិស័យសម្បត្តិធម្មជាតិវត្ថុធាតុដើម ហើយនិងការពង្រឹងសមត្ថភាពយោធារបស់ទីក្រុងប៉េកាំងក៏ជាប្រភពមួយនៃក្តីបារម្ភរបស់អន្តរជាតិ ជាពិសេសសម្រាប់ប្រទេសជិតខាងរបស់ចិននៅអាស៊ី។
គួរបញ្ជាក់ថា កាលពីឆ្នាំទៅនាវាមុជទឹកចិនឈ្មោះ Jiaolong ឬនាគរាជ បានទៅដោតទង់ជាតិចិននៅបាតសមុទ្រចិនខាងត្បូង គឺនៅទីនោះហើយដែល “អធិបតេយ្យដែនសមុទ្រ” បានក្លាយជាអធិករណ៍រវាងប្រទេសជាច្រើនក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ