ជនសង្ស័យក្នុងបទពុករលួយមួយរូបនៅចិន ស្លាប់ដោយសារទារុណកម្ម
សារព័ត៌មានចិន Jinghua Shibao បានចុះផ្សាយនៅថ្ងៃពុធទី៤កញ្ញានេះ ពីការស្លាប់របស់ Yu Qiyi យូ ឈីអ៊ី ជាអ្នកទទួលខុសត្រូវសហគ្រាសរដ្ឋចិនមួយកន្លែង ដែលបានទទួលទារុណកម្មសួរចំលើយក្នុងរឿងពុករលួយ រហូតដល់ស្លាប់បាត់បង់ជីវិត កាលពីខែមេសាកន្លងទៅ។ កោសល្យវិច័យសាកសព បានបង្ហាញថា មុននឹងបាត់បង់ជីវិត លោកយូ បានផឹកវត្ថុធាតុរាវៗ ដែលនាំអោយប៉ះពាល់ដល់សួត និងបណ្តាលអោយស្លាប់។
ចុះផ្សាយនៅថ្ងៃ៖ កែប្រែថ្ងៃទី៖
Yu Qiyi យូ ឈីអ៊ី អាយុ៤២ឆ្នាំ ជាវិស្វករដឹកនាំនៅក្នុងសហគ្រាសរដ្ឋចិនមួយកន្លែងនៅក្រុងWenzhou វិនជូ ក្នុងខេត្ត Zhejiang ចឺជាំង ភាគខាងកើតប្រទេសចិន។ លោក Yu ជាប់សង្ស័យក្នុងបទពុករលួយ ទាក់ទងនឹងកិច្ចសន្យាទទួលកម្មសិទ្ធិអចលនទ្រព្យមួយ។ លោកត្រូវបានចាប់ខ្លួននៅខែមិនាដើមឆ្នាំ មុននឹងស្លាប់បាត់បង់ជីវិតដោយទារុណកម្ម នៅខែមេសា។
សារព័ត៌មានចិន Jinghua Shibao បានគូសបញ្ជាក់ពីខ្លឹមសារនៃរបាយការណ៍រដ្ឋអាជ្ញាចិន។ របាយការណ៍លើកឡើងថា ដោយសារតែលោកយូ មិនបានឆ្លើយអ្វីជាសាច់ការ ទាក់ទងនឹងការចោទប្រកាន់ ក្រុមអ្នកស៊ើបអង្កេតបានបង្ខំអោយលោកដោះសម្លៀក-បំពាក់ចេញពីខ្លួន និងបានចាប់ជ្រមុជរូបលោក ចូលក្នុងអាងទឹកដែលមានសីតុណ្ហភាពត្រជាក់ខ្លាំង។ នៅពេលដែលលោកយូ លែងមានសកម្មភាពកំរើកតស៊ូនឹងទារុណកម្មទៀត ក្រុមអ្នកស៊ើបអង្កេតបានសំរេចចិត្តបញ្ចប់ការសួរចំលើយ។ លោកយូត្រូវបានបញ្ជូនទៅមន្ទីរពេទ្យ។ ប៉ុន្មានម៉ោងក្រោយមក គ្រូពេទ្យបានប្រាប់ថាលោកយូបានស្លាប់ហើយ។ អ្នកជិតដិតនឹងលោកយូ បានប្រាប់ថា បានឃើញស្នាមជាំជាច្រើន នៅលើសាកសពគាត់។
សមាជិកទាំង៦រូបនៃគណៈកម្មការវិន័យគណបក្សកុម្មុយនិស្តចិន ទទួលបន្ទុកផ្នែកសួរចំលើយ បានជាប់ពិរុទ្ធពីបទបង្កស្នាមរបួសដោយចេតនាលើរូបយូ។ តុលាការចិននឹងបើកសវនាការកាត់ទោសជនជាប់ចោទទាំង៦រូបនេះ។
ចិនក្នុងអណត្តិប្រធានាធិបតីថ្មី ស៊ី ជិនពីង តែងតែបង្ហាញពីគោលបំណងកំចាត់អំពើពុករលួយ នៅក្នុងរដ្ឋបាលសាធារណៈ រាប់ទាំងថ្នាក់ដឹកនាំក្នុងជួររដ្ឋាភិបាលផងដែរ។ អង្គការឯករាជ្យនានាតែងតែចោទក្រុមប៉ូលិស ថាមានទំលាប់ធ្វើទារុណកម្មជាប្រចាំ ដើម្បីទទួលបានចំលើយសារភាពពីជនសង្ស័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ