នាយករដ្ឋមន្ត្រីសុំលាលែងចេញពីតំណែង ពេលប្រទេសកំពុងមានជម្លោះខ្លាំង
អ៊ុយក្រែនកំពុងផុងជ្រៅក្នុងវិបត្តិនយោបាយមួយជាន់ទៀត។ លោក នាយករដ្ឋមន្ត្រី Arseni Iatseniouk (អាសេនី យ៉ាសេនុក) បានប្រកាសលាលែងចេញពីតំណែងនៅព្រហស្បតិ៍ម្សិលមិញ បន្ទាប់ពីមានភាពប្រេះឆាក្នុងផ្ទៃសភា (គណបក្សពីរ បានដកខ្លួនចេញពីសភា)។ ប្រធានាធិបតីអ៊ុយក្រែន បានប្រកាសស្វាគមន៍សេចក្តីសម្រេចចិត្តរបស់ប្រមុខរដ្ឋាភិបាល និងបានប្រកាសសន្យារៀបចំការបោះឆ្នោតសភាមុនកាលកំណត់។
ចុះផ្សាយនៅថ្ងៃ៖
លោក Arseni Iatseniouk តំណាងដ៏សំខាន់ម្នាក់នៃបដិវត្តអ៊ុយក្រែនដើម្បីបុព្វហេតុខិតរកសហភាពអឺរ៉ុបកាលពីចុងឆ្នាំ បានសុំលាលែងចេញពីតំណែងនាយករដ្ឋមន្ត្រី យ៉ាងតក់ក្រហល់ នៅថ្ងៃព្រហស្បតិ៍ម្សិលមិញ។ ការលាលែងដែលនឹងត្រូវសភាអ៊ុយក្រែនបោះឆ្នោតអនុម័តនៅថ្ងៃសុក្រទី ២៥កក្កដានេះ ទំនងជាបណ្តាលមកពីលោកនាយករដ្ឋមន្ត្រីមានទស្សនៈផ្ទុយគ្នាជាមួយនឹង លោក ប៉េត្រូ ប៉ូរ៉ូឆេនកូ ជាប្រធានាធិបតីស្តីពីយុទ្ធសាស្ត្រនយោបាយក្នុងជួររដ្ឋាភិបាល។
ប្រធានាធិបតី ព្រមព្រៀងឱ្យរំលាយរដ្ឋសភាចម្រុះចាស់ (បង្កើតឡើងក្រោយការចាកចេញពីតំណែងរបស់លោកវិចទ័រ យ៉ានូកូវិច) ដោយចង់រៀបចំការបោះឆ្នោតជ្រើសរើសសភាថ្មី តែសម្រាប់លោកនាយករដ្ឋមន្ត្រី ដែលខាងបស្ចឹមលោកពេញចិត្តគាំទ្រខ្លាំង យល់ថាមិនទាន់ដល់ពេលទេ ព្រោះអ៊ុយក្រែនកំពុងស្ថិតក្នុងស្ថានភាពយ៉ាប់យឺននៅឡើយ ផលវិបាកអាចនឹងធ្ងន់ធ្ងរខ្លាំង។
ដូច្នេះនឹងមានការបោះឆ្នោតសភាមុនអាណត្តិនៅ អ៊ុយក្រែន ដូចអ្វីដែលក្រុមបាតុករនៅទីលាន ម៉ៃដានទាមទារ។ ចលនាបដិវត្តនៅទីលានម៉ៃដាន ដែលចង់ឃើញមានការប្តូរផ្លាស់ក្បាលម៉ាស៊ីនដឹកនាំប្រទេសថ្មីទាំងស្រុងតែម្តង។ ប៉ុន្តែសម្រាប់លោក Arseni Iatseniouk ជានាយករដ្ឋមន្ត្រី ប្រសូតចេញពីគណបក្ស Batkivschina របស់លោកស្រី ជូលីយ៉ា ទីម៉ូឆេនកូ អ៊ុយក្រែនគ្មានលទ្ធភាពតែម្តង ពោលគឺគ្មានលុយសោះ។ ហិបរដ្ឋរលីង យោធាគ្មានសម្ភារៈបរិក្ខារនិងការបំពាក់បំប៉នត្រឹមត្រូវ តែត្រូវប្រឈមមុខជារៀងរាល់ថ្ងៃនឹងពួកឧទ្ទាមចង់ផ្តាច់ទឹកដីទៀត។
នៅចំពោះមុខសភា លោក បានបរិហារនយោបាយចង្អៀតចង្អល់របស់ប្រធានាធិបតី ក្នុងខណៈដែលអ៊ុយក្រែនត្រូវការការរួបរួមជាធ្លុងមួយ នៅពីក្រោយមេដឹកនាំជាតិ។ នេះជាឧក្រិដ្ឋកម្មសីលធម៌និងនយោបាយ ! សម្រាប់លោកនាយករដ្ឋមន្ត្រី អ្នកដែលឈ្នះមានតែម្នាក់គឺរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ