ក្រុមអ្នកគាំទ្ររុស្ស៊ី២០០នាក់ចូលព័ទ្ធមូលដ្ឋានយន្តហោះអ៊ុយក្រែននៅគ្រីមេ
នៅតំបន់គ្រីមេថ្ងៃសៅរ៍នេះ ក្រុមអ្នកគាំទ្ររុស្ស៊ី២០០នាក់ បានចូលទៅព័ទ្ធមូលដ្ឋានយន្តហោះយោធាអ៊ុយក្រែន នៅ Novofedorivka ភាគខាងលិច។ ប៉ុន្តែ ពួកគេគ្មានអាវុធក្នុងដៃនោះទេ។ ការចូលលុកលុយមូលដ្ឋានហោះហើររបស់កងទ័ពអ៊ុយក្រែនធ្វើឡើង ខណៈប្រមុខការទូតអាល្លឺម៉ង់ និងនាយករដ្ឋមន្ត្រីកាណាដា ចុះទៅបំពេញទស្សនកិច្ចនៅអ៊ុយក្រែន សំដែងការគាំទ្រចំពោះអាជ្ញាធរអ៊ុយក្រែន ប្រឈមនឹងទង្វើរុស្ស៊ីដែលបានភ្ជាប់តំបន់គ្រីមចូលទឹកដីរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
នៅថ្ងៃសៅរ៍នេះ ក្រុមបុរសគាំទ្ររុស្ស៊ី២០០នាក់ បានចូលទៅព័ទ្ធមូលដ្ឋានយន្តហោះអ៊ុយក្រែន នៅ ណូវ៉ូហ្វេដូរីវកា Novofedorivka ស្ថិតនៅភាគខាងលិចតំបន់គ្រីមេ។ ពួកគេគ្មានអាវុធអ្វីនោះទេ ពួកគេបានបំផ្លិចបំផ្លាញបង្អួចជាច្រើន នៅទីនោះ។ កងទ័ពអ៊ុយក្រែនបានធ្វើការការពារខ្លួន ដោយបានបាញ់គ្រឿងផ្សែងតបតទៅនឹងជនទាំងនោះវិញ។
ការវាយលុកនេះ ធ្វើឡើងតែមួយថ្ងៃប៉ុណ្ណោះបន្ទាប់ពីកងទ័ពជើងទឹករុស្ស៊ី បានកាន់កាប់នាវាមុជទឹកអ៊ុយក្រែន នៅគ្រីមេ កាលពីថ្ងៃសុក្រ។ កងទ័ពរុស្ស៊ីបានដឹកនាវាមុជទឹកអ៊ុយក្រែន ចូលទៅ មូលដ្ឋានរុស្ស៊ីនៅសេបាស្តូប៉ូល។ ប៉ុន្មានថ្ងៃចុងក្រោយនេះ មូលដ្ឋាននិងនាវាអ៊ុយក្រែនជាច្រើន បានរងការវាយលុក បែបនេះ។ កងទ័ពអ៊ុយក្រែនតែងសុខចិត្តចុះចាញ់ ដោយមិនតបតអ្វីទាំងអស់ នៅចំពោះមុខកងកម្លាំងរុស្ស៊ី និងសកម្មជនគាំទ្ររុស្ស៊ី។
ប្រឈមនឹងសកម្មភាពគាំទ្ររុស្ស៊ី ក្រសួងការពារជាតិអ៊ុយក្រែនបានសន្យាថា រាល់កងទ័ពដែលចាកចេញពីគ្រីមេ ចូលមកអ៊ុយក្រែន នឹងទទួលការលើកតំកើងជាវីរបុរសជាតិ។ ក្រសួងការពារជាតិអ៊ុយក្រែនប្រាប់ថា ទីភ្នាក់ងារពិសេសរុស្ស៊ីបានព្យាយាមមិនអោយកងទ័ពបានទទួលដំណឹងនេះ ដោយបំផ្លើសព័ត៌មានថា អ្នកដែលចេញពីគ្រីមេទៅ នឹងត្រូវគេកំចាត់ ហើយយោធាទៀតសោតអាចនឹងត្រូវតុលាការកាត់ទោសថាជាជនក្បត់។
នៅថ្ងៃសៅរ៍នេះ ប្រមុខការទូតអាល្លឺម៉ង់ Frank-Walter Steinmeier និងនាយករដ្ឋមន្ត្រីកាណាដា Stephen Harper បានបំពេញទស្សនកិច្ចនៅអ៊ុយក្រែន សំដែងការគាំទ្រចំពោះរដ្ឋាភិបាលអ៊ុយក្រែនប្រឈមនឹងទង្វើរុស្ស៊ីដែលបានភ្ជាប់គ្រីមេចូលជាដែនដីរុស្ស៊ី។ ប្រមុខការទូតអាល្លឺម៉ង់បានបរិហារទង្វើរុស្ស៊ីថា ជាការព្យាយាមបំបែកបំបាក់អឺរ៉ុប។
នាយករដ្ខមន្ត្រីអ៊ុយក្រែន អារសេនី យ៉ាត់សេនីញុក បានប្រាប់ថា បានពិភាក្សាជាមួយប្រមុខការទូតអាល្លឺម៉ង់ ពីការដែលអាល្លឺម៉ង់អាចផ្តល់ជំនួយបច្ចេកទេសជួយកងទ័ពអ៊ុយក្រែន និងពីការដឹកជញ្ជូនឧស្ម័នជាយថាហេតុណាមួយ ពីសំណាក់អឺរ៉ុបខាងលិច ទៅអោយអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ