សហភាពអឺរ៉ុបដាក់ទណ្ឌកម្មថ្មីប្រឆាំងភ្នាក់ងារស៊ើបអង្កេតរុស្ស៊ី
ក្រោយហេតុការណ៍បាញ់ទម្លាក់យន្តហោះស៊ីវិលម៉ាឡេស៊ី នៅតំបន់ភាគខាងកើតអ៊ុយក្រែន នៅថ្ងៃសៅរ៍ទី ២៦ កក្កដានេះ សហភាពអឺរ៉ុបបានសម្រេចដំឡើងសំឡេង ពង្រឹងទណ្ឌកម្មថ្មីបន្ថែមទៀតប្រឆាំងនឹងរុស្ស៊ី។ មេដឹកនាំភ្នាក់ងារស៊ើបការណ៍សម្ងាត់ ព្រមទាំងអ្នកទទួលខុសត្រូវជាន់ខ្ពស់នៃក្រុមប្រឹក្សាសន្តិសុខរុស្ស៊ីជាច្រើន ត្រូវទទួលរងទណ្ឌកម្មពីអឺរ៉ុប ពីបទមានលូកលាន់ពាក់ព័ន្ធនឹងវិបត្តិនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០១:៣៤
បុគ្គល១៥នាក់ ក្នុងនោះម្នាក់ជាប្រធានភ្នាក់ងារសហព័ន្ធសន្តិសុខFSB ម្នាក់ ជាប្រធានភ្នាក់ងារស៊ើបអង្កេតរុស្ស៊ី និងម្នាក់ទៀតជាប្រធានដែនដីឆេកឆែន ព្រមទាំងអង្គភាពចំនួន១៨របស់រុស្ស៊ី ត្រូវបានចាត់បញ្ជូលក្នុងបញ្ជីខ្មៅថ្មីរបស់សហភាពអឺរ៉ុប ដោយត្រូវបង្កទ្រព្យធននៅបរទេស និងហាមឃាត់មិនឱ្យធ្វើដំណើរ មកអឺរ៉ុប ព្រោះបុគ្គលទាំងនោះបានរំលោភបូរណភាពដែនដីអ៊ុយក្រែន។
អ្នកទទួលខុសត្រូវក្រុមប្រឹក្សាសន្តិសុខរុស្ស៊ី ត្រូវបានអឺរ៉ុបចោទថាជាអ្នកដែលបានចូលរួមចំណែក និងដើរតួនយោបាយដែលមានលក្ខណៈជ្រៀតជ្រែក និងគំរាមបូរណភាព ព្រមទាំងឯករាជភាពអ៊ុយក្រែន។
ជាសរុប គិតចាប់តាំងពីមានវិបត្តិអ៊ុយក្រែនមក បញ្ជីឈ្មោះទណ្ឌកម្មប្រឆាំងនឹងរុស្ស៊ី បានអូសបន្លាយដល់៨៧នាក់ និង២០អង្គភាព និងក្រុមហ៊ុន។ ក្រុមហ៊ុនដែលអឺរ៉ុបដាក់ទណ្ឌកម្ម ភាគច្រើនមានទីស្នាក់ការ និងការិយាល័យនៅតំបន់គ្រីមេ ដែលរុស្ស៊ីទើបរឹបអូសពីអ៊ុយក្រែនយកទៅធ្វើជារណប កាលពីខែមីនា ២០១៤។
ទន្ទឹមគ្នានេះដែរ នៅសប្តាហ៍ក្រោយ សហភាពអឺរ៉ុបនឹងអនុម័តទណ្ឌកម្មប្រភេទតែមួយនេះ ប្រឆាំងនឹងបុគ្គលដែលបានគាំទ្រយ៉ាងសកម្មការច្បាមយកតំបន់គ្រីមេ ការបង្កអស្ថិរភាព ឬយកចំណេញពីវិបត្តិនៅភាគខាងកើតអ៊ុយក្រែន។ បញ្ជីឈ្មោះនោះទំនងជាអាចមានជាប់មនុស្សជំនិត ឬគ្រួសារសាច់ញាតិលោកពូទីនផង។ ជាពិសេសទៅទៀត សមាជិកទាំង២៨របស់អឺរ៉ុប ត្រៀមជាស្រេចនឹងដាក់ទណ្ឌកម្មសេដ្ឋកិច្ចប្រឆាំងរុស្ស៊ី ក្នុងវិស័យទីផ្សារហិរញ្ញវត្ថុ ទីផ្សារលក់អាវុធ បច្ចេកវិទ្យា ក្នុងផ្នែកថាមពល និងអចលនទ្រព្យដែលប្រើប្រាស់សម្រាប់ប្រយោជន៍ទ្វេ ស៊ីវិលនិងយោធា ចាប់ពីសប្តាហ៍ក្រោយទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ