មានមនុស្សស្លាប់និងបាត់ខ្លួនជាង១០នាក់ ដោយហេតុខ្យល់ព្យុះConson
មានអ្នកស្លាប់ម្នាក់និងបាត់ខ្លួនជាង១០នាក់ នៅប៉ែកខាងជើងនិងកណ្តាលវៀតណាម ដោយហេតុខ្យល់ព្យុះឈ្មោះConsonដែលមុនហ្នឹង បានបណ្តាលឱ្យមានអ្នកស្លាប់យ៉ាងតិច៦៧នាក់ នៅហ្វីលីព្វីននិងប្រទេសចិន -ស្របតាមអាជ្ញាធរវៀតណាមឱ្យដឹងនៅថ្ងៃអាទិត្យ១៨កក្កដានេះ។
ចុះផ្សាយនៅថ្ងៃ៖
សេចក្តីរាយការណ៍របស់ វីនស្តុន រតនា
ខ្យល់ព្យុះConsonបានបោកបក់ទៅលើឆ្នេរសមុទ្រវៀតណាមនៅល្ងាចថ្ងៃសៅរ៍ម្សិលមិញ បន្ទាប់ពីបានប៉ះពាល់កោះទេសចរចិនHainan។បន្ទាប់មកទៀត វាក៏បានប្រែក្លាយទៅជាព្យុះភ្លៀង។
ស្របសំដីអ្នកទទួលខុសត្រូវម្នាក់នៃគណៈកម្មាធិការជាតិប្រយុទ្ធទល់នឹងខ្យល់ព្យុះនិងទឹកជំនន់ នៅហាណូយ “ វានៅតែបន្តបង្កឱ្យកើតជាទឹកភ្លៀងធ្លាក់នៅតំបន់ខ្លះនៅប៉ែកខាងជើងនិងប៉ែកកណ្តាលប្រទេសវៀតណាម។យើងនៅពុំទាន់អាចគន់គិតចំនួនទឹកប្រាក់នៃការខូចខាតខាងសម្ភារៈនៅឡើយ ប៉ុន្តែខ្យល់ព្យុះបានបំផ្លាញកំទេចហេដ្ឋារចនាសម្ព័ន្ធជាមូលដ្ឋាន ជាពិសេស សំណង់ខាងធារាសាស្ត្រ “។
ទាហានវៀតណាមរាប់ពាន់នាក់ត្រូវបានកេណ្ឌដើម្បីជួយបណ្តាជនដែលរស់នៅមណ្ឌលរងគ្រោះដោយខ្យល់ព្យុះ Conson។ជនចំនួនបីម៉ឺននាក់ត្រូវបានជម្លៀសចេញ មុនការមកដល់នៃខ្យល់ព្យុះ។
គឺនៅហ្វីលីព្វីនដែលខ្យល់ព្យុះបានបំផ្លិចបំផ្លាញច្រើនជាងគេ បណ្តាលឱ្យមានអ្នកស្លាប់យ៉ាងតិច៦៥នាក់ កំទេចលំនៅឋានអស់រាប់ពាន់ខ្នង បណ្តាលឱ្យលិចឬខូចខាតកប៉ាល់រាប់សិបគ្រឿង។ដើមឈើរលំក៏បានបណ្តាលឱ្យស្លាប់មនុស្សអស់ជាច្រើននាក់និងបានកាត់ផ្តាច់គមនាគមន៍។នៅប្រទេសចិន ជនពីរនាក់បានស្លាប់បណ្តាលមកពីការរលំផ្ទាំងប័ណ្ណូផ្សាយពាណិជ្ជកម្ម។
ពីហ្វីលីព្វីនមកកាន់វៀតណាម ភូមិភាគនេះបានទទួលរងគ្រោះជារៀងរាល់ឆ្នាំ ដោយខ្យល់ព្យុះដែលបានបណ្តាលឱ្យស្លាប់ជនរាប់រយនាក់ បំផ្លាញកំទេចឬធ្វើឱ្យខូចខាតលំនៅឋានរាប់ពាន់ខ្នងនិងផ្ទៃដីកសិកម្មដ៏ទូលំទូលាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ