ស្ថាប័នកំពូលៗនៅកម្ពុជា ចាប់ទទួលពាក្យបេក្ខជនសមាជិកឧត្តមក្រុមប្រឹក្សានៃអង្គចៅក្រម
ស្ថាប័នកំពូលៗនៅកម្ពុជា មានជាអាទិ៍រដ្ឋសភាជាតិ និងក្រុមប្រឹក្សាធម្មនុញ្ញជាដើម បានជូនដំណឹងជាសាធារណៈ អំពីការជ្រើសតាំងសមាជិកឧត្តមក្រុមប្រឹក្សានៃអង្គចៅក្រម សម្រាប់អាណត្តិ៥ឆ្នាំ លើកទី១។ សមាជិកឧត្តមក្រុមប្រឹក្សានៃអង្គចៅក្រម មានចំនួន១១រូប ក្នុងនោះរួមមាន រដ្ឋមន្ដ្រីក្រសួងយុត្តិធម៌ ប្រធានតុលាការកំពូល អគ្គព្រះរាជអាជ្ញាអមតុលាការកំពូល និង៨រូបទៀត ត្រូវជ្រើសតាំងដោយស្ថាប័នកំពូលៗនៅកម្ពុជា។ ការកំណត់ឲ្យរដ្ឋមន្ដ្រីក្រសួងយុត្តិធម៌ ដែលជាសមាជិកនៃអង្គនីតិប្រតិបត្តិ មានតួនាទីនៅក្នុងឧត្តមក្រុមប្រឹក្សានៃអង្គចៅក្រមដូច្នេះ បានធ្វើឲ្យសង្គមស៊ីវិលព្រួយបារម្ភថា អាចប៉ះពាល់ដល់គោលការណ៍បែងចែកអំណាច។
ចុះផ្សាយនៅថ្ងៃ៖
ស្តាប់ - ០២:២០
នៅក្នុងសេចក្ដីជូនដំណឹងដាច់ដោយឡែកពីគ្នា រដ្ឋសភាជាតិ និងក្រុមប្រឹក្សាធម្មនុញ្ញ ដែលជាស្ថាប័នកំពូលនៅកម្ពុជា បានប្រកាសចាប់ទទួលពាក្យសុំឈរឈ្មោះជាបេក្ខជន ក្នុងតំណែងជាសមាជិកឧត្តមក្រុមប្រឹក្សានៃអង្គចៅក្រម សម្រាប់អាណត្តិ៥ឆ្នាំ លើកទី១។ បេក្ខជនដែលមានបំណងចូលរួមជាបេក្ខភាពនៃការជ្រើសតាំងនេះ ត្រូវមានបទពិសោធន៍ការងារយ៉ាងតិច១៥ឆ្នាំ នៅក្នុងវិស័យច្បាប់ឬតុលាការ ឬមានលិខិតបញ្ជាក់ថា ជាអតីតចៅក្រម ឬអតីតព្រះរាជអាជ្ញា។ ការទទួលពាក្យចាប់ផ្ដើមពីថ្ងៃនេះតទៅ រហូតដល់ថ្ងៃទី៣០កញ្ញាសម្រាប់ក្រុមប្រឹក្សាធម្មនុញ្ញ និងថ្ងៃទី៨តុលា សម្រាប់រដ្ឋសភាកម្ពុជា។
តាមច្បាប់ស្ដីពីការរៀបចំនិងការប្រព្រឹត្តទៅនៃឧត្តមក្រុមប្រឹក្សានៃអង្គចៅក្រម ដែលទើបតែត្រូវបានអនុម័តកាលពីខែកក្កដាកន្លងទៅ ឧត្តមក្រុមប្រឹក្សានៃអង្គចៅក្រម មានព្រះមហាក្សត្រជាព្រះប្រធាន និងសមាជិកចំនួន១១រូប។ សមាជិក៣រូបនៃស្ថាប័ននេះ ត្រូវជ្រើសតាំងដោយស្ថាប័នកំពូលៗនៅកម្ពុជា ដូចជារដ្ឋសភា ព្រឹទ្ធសភា និងក្រុមប្រឹក្សាធម្មនុញ្ញជាដើម។ ចំណែក៣រូបដែលនៅសល់ គឺត្រូវចាត់តាំងជាស្វ័យប្រវត្តិដោយច្បាប់ មានជាអាទិ៍ រដ្ឋមន្ដ្រីក្រសួងយុត្តិធម៌ ប្រធានតុលាការកំពូល និងអគ្គព្រះរាជអាជ្ញាអមតុលាការកំពូល។
ការចាត់តាំងរដ្ឋមន្ដ្រីក្រសួងយុត្តិធម៌ជាសមាជិកនៃឧត្តមក្រុមប្រឹក្សានៃអង្គចៅក្រម និងការអនុញ្ញាតឲ្យសមាជិករដ្ឋសភានិងព្រឹទ្ធសភាមានសិទ្ធិបោះឆ្នោតជ្រើសតាំងសមាជិកនៃឧត្តមក្រុមប្រឹក្សានៃអង្គចៅក្រម បានធ្វើឲ្យមជ្ឈមណ្ឌលសិទ្ធិមនុស្សកម្ពុជា CCHR ព្រួយបារម្ភថាអាចប៉ះពាល់ដល់គោលការណ៍បែងចែកអំណាច។ តាមរយៈការវិភាគផ្នែកច្បាប់របស់ខ្លួន CCHR បានលើកឡើងថា សមាជិកនៃឧត្តមក្រុមប្រឹក្សានៃអង្គចៅក្រម មិនអាចត្រូវបានតែងតាំង ឬជ្រើសតាំងដោយអំណាចនីតិប្បញ្ញតិ ឬអំណាចនីតិប្រតិបត្តិឡើយ។
ដើម្បីធានាឯករាជ្យភាព បើតាម CCHR សមាជិករបស់ឧត្តមក្រុមប្រឹក្សានៃអង្គចៅក្រម មិនត្រូវជាប់ពាក់ព័ន្ធនឹងគណបក្សនយោបាយណាមួយឡើយ ហើយក៏មិនត្រូវជាសមាជិករដ្ឋាភិបាល ឬជាសមាជិកសភាឡើយ។ ឧត្តមក្រុមប្រឹក្សានៃអង្គចៅក្រម គួរតែមានសមាសភាពចម្រុះរវាងចៅក្រម ព្រះរាជអាជ្ញា និងសមាជិកដែលមានសមត្ថភាពផ្លូវច្បាប់ដទៃទៀតដូចជា មេធាវី និងសាស្ដ្រាចារ្យផ្នែកច្បាប់ជាដើម ដែលបោះឆ្នោតជ្រើសតាំងដោយគណៈកម្មការឯករាជ្យមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ