ប្រធានាធិបតីភូមាចាប់ផ្តើមដំណើរទស្សនកិច្ចនៅកូរ៉េខាងត្បូង
លោកថេន សេន ប្រធានាធិបតីភូមា បានអញ្ជើញទៅដល់កូរ៉េខាងត្បូង នៅថ្ងៃចន្ទនេះ ដើម្បីចាប់ផ្តើមដំណើរទស្សនកិច្ច រយៈពេល ៣ថ្ងៃ។ ដំណើរទស្សនកិច្ចនេះនឹងផ្តោតទៅលើទំនាក់ទំនងខាងសេដ្ឋកិច្ច ក្នុងនោះ ក៏នឹងមានដំណើរទស្សនកិច្ចទៅកាន់ក្រុមហ៊ុនមួយចំនួន ដែលរកស៊ីក្នុងវិស័យយោធា ហើយស្ថានភាពនៅឧបទ្វីបកូរ៉េក៏នឹងជាប្រធានបទដ៏សំខាន់មួយដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
លោកប្រធានាធិបតី ថេន សេន គ្រោងនឹងជួបជាមួយលោកប្រធានាធិបតី លី ម្យ៉ុងបាក់ នៅថ្ងៃអង្គារស្អែក។ យោងតាមមន្រ្តីរដ្ឋាភិបាលកូរ៉េខាងត្បូង នៅក្នុងជំនួបថ្ងៃស្អែកនេះ ប្រមុខដឹកនាំទាំងពីរនឹងជជែកគ្នា អំពីកិច្ចសហប្រតិបត្តិការក្នុងវិស័យពាណិជ្ជកម្ម និងវិនិយោគ អំពីវិស័យថាមពល ធនធានធម្មជាតិ ព្រមទាំងការសាងសង់ហេដ្ឋារចនាសម្ព័ន្ធ នៅក្នុងប្រទេសភូមា។ ស្ថានភាពនៅក្នុងឧបទ្វីបកូរ៉េក៏នឹងជាប្រធានបទដ៏សំខាន់មួយដែរ។
គួរបញ្ជាក់ថា នៅក្នុងរយៈពេលរាប់សិបឆ្នាំមកហើយ ដែលរបបសឹកភូមាតែងតែរក្សានូវទំនាកទំនងជិតស្និទ្ធិជាមួយនឹងរបបដឹកនាំកុម្មុយនិស្តកូរ៉េខាងជើង។ កាលពីឆ្នាំ១៩៨៣ ប្រធានាធិបតីកូរ៉េខាងត្បូងមួយរូប ត្រូវបានភ្នាក់ងារកូរ៉េខាងជើងប៉ុនប៉ងធ្វើឃាត នៅក្នុងអំឡុងពេលដែលលោកកំពុងបំពេញទស្សនកិច្ច នៅក្នុងប្រទេសភូមា។ ចាប់តាំងពីពេលនោះមក គេមិនដែលឃើញមានប្រធានាធិបតីកូរ៉េខាងត្បូងរូបណា ទៅបំពេញទស្សនកិច្ច នៅភូមាទៀតទេ រហូតដល់ខែឧសភា កន្លងទៅថ្មីៗនេះ នៅក្រោយពេលរបបសឹកត្រូវរលាយ ហើយរដ្ឋាភិបាលស៊ីវិលថ្មី ក្រោមការដឹកនាំរបស់លោកថេន សេន បានរៀបចំកំណែទម្រង់នយោបាយសំខាន់ៗ ទាញភូមាពីភាពឯកោក្នុងឆាកអន្តរជាតិ ទើបលោកលី ម្យ៉ុងបាក់ ឈានជើងជាន់ដីភូមាជាលើកទីមួយ ក្នុងឋានៈជាប្រធានាធិបតីកូរ៉េខាងត្បូង។
នៅក្នុងអំឡុងដំណើរទស្សនកិច្ច កាលពីខែឧសភានោះ លោកថេន សេន បានសន្យាជាមួយនឹងលោកលី ម្យ៉ុងបាក់ថា ចាប់ពីពេលនេះទៅ ភូមានឹងបញ្ឈប់ការទិញគ្រឿងសព្វាវុធពីកូរ៉េខាងជើងទៀតហើយ។ ហើយកាលពីសប្តាហ៍មុននេះ ក្រុមហ៊ុនមួយរបស់កូរ៉េខាងត្បូង ទើបនឹងបានទទួលកិច្ចសន្យាសាងសង់រោងចក្រអគ្គិសនីមួយកន្លែង ដែលមានកម្លាំង៥០ម៉ឺនគីឡូវ៉ាត់ ព្រមទាំងបណ្តាញចែកចាយចរន្តអគ្គិសនី នៅក្នុងទីក្រុងរ៉ង់ហ្គូន សម្រាប់ឆ្នាំ២០១៥។
ភូមាគឺជាប្រទេសដែលសម្បូរទៅដោយធនធានធម្មជាតិ ជាពិសេស ឧស្ម័នធម្មជាតិ និងធនធានរ៉ែ។ ការធ្វើកំណែទម្រង់នយោបាយ និងការបន្ធូរបន្ថយ ឬលុបចេញនូវទណ្ឌកម្មអន្តរជាតិ កំពុងតែធ្វើឲ្យភូមា ក្លាយជាទិសដៅដ៏សំខាន់មួយ ទាក់ទាញអ្នកវិនិយោគពីបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ