ជំនួបកំពូលសហភាពអឺរ៉ុប-រុស្ស៊ី លើកទី៣០នៅក្រុង Bruxelles
ចូលរួមក្នុងជំនួបកំពូលនេះពីខាងរុស្ស៊ីគឺលោកប្រធានាធិបតីពូទីនផ្ទាល់ហើយពីខាង សហភាពអឺរ៉ុប គឺ លោកប្រធានសហភាពនេះ Herman Van Rompuy , លោកប្រធានគណៈកម្មការអឺរ៉ុប Jose Manuel Barroso និងមេដឹកនាំនៃ២៧ប្រទេសក្នុងសហភាពអឺរ៉ុប។ តើម្ខាងៗ ស្ពាយសាច់រឿងអ្វីខ្លះ យកទៅដាក់លើតុចរចាថ្ងៃនេះ?
ចុះផ្សាយនៅថ្ងៃ៖
ស្តាប់ - ០២:៣១
សម្រាប់ម៉ូស្គូ តាមដែលវិមានក្រេមឡាំងប្រកាសឲ្យដឹងសំខាន់ គឺ ៖
- ចង់សម្រេចឲ្យបាននូវការលុបទិដ្ឋាការរវាងសហភាពអឺរ៉ុបនិងរុស្ស៊ីយកល្អ គឹលុបឲ្យបានមុនពេលបើកការប្រកួត”ល្បែងកីឡាអូឡាំពិករដូវធ្លាក់ទឹកកក” នៅក្រុងរុស្ស៊ី Sochi ក្នុងខែកុម្ភៈឆ្នាំ២០១៤ខាងមុខ។
- ច្រានចោលអ្វីដែលហៅថា “កញ្ចប់ថាមពលទី៣” របស់សហភាពអឺរ៉ុប ដែលប្រឆាំងទល់នឹងភាពផ្តាច់មុខនៃក្រុមហ៊ុនយក្សរុស្ស៊ី Gazprom ខាងលក់ឧស្ម័នធម្មជាតិរុស្ស៊ី ទៅបំពេញ បានជាង ១/៤ នៃតម្រូវការរបស់សហភាពអឺរ៉ុប ខាងថាមពលនេះ។ តាមយោបល់រុស្ស៊ី “កញ្ចប់ថាមព ទី៣”នេះ គឺផ្ទុយនឹងបទដ្ឋាននៃច្បាប់អន្តរជាតិ ហើយនាំឲ្យខូចដល់ សហប្រតិបត្តិការ ផ្នែកថាមពលរវាងគូភាគីដែលប្រព្រឹត្តទៅយ៉ាងរលូន បានរាប់សិបឆ្នាំមកហើយ។
- ការពារសិទ្ធិរបស់បណ្តាជនរុស្ស៊ី រស់នៅក្នុងប្រទេស Lettonie Lituanie Estonie ដែល ត្រូវអាជ្ញាធរនៃរដ្ឋនៅតាមមាត់សមុទ្រ Baltique ទាំងបីនេះ ធ្វើការរើសអើង បំបិទសិទ្ធិគេគ្មានឈប់ ប៉ុន្តែពុំដែលត្រូវថ្នាក់ដឹកនាំសហភាពអឺរ៉ុប ធ្វើឃើញឡើយ ទោះបីអតីតសាធារណរដ្ឋសូវៀតទាំងនេះ បច្ចុប្បន្ន ក្លាយជាសមាជិកសហភាពអឺរ៉ុបទៅហើយក្តី។
- ប្រឆាំងនឹងនយោបាយរដ្ឋទាំងបីនោះ ដែលតែងលើក ទៅជាវីរបុរស រាល់នរណាដែលក្នុងសង្គ្រាមលោកលើកទី២ បានចូលដៃជាមួយពួកហ្វាស៊ីស្តហ៊ីត្លែរ ច្បាំងទល់នឹងកងទ័ពសូវៀត។
ពីខាងសហភាពអឺរ៉ុបវិញ គេនឹងប្រែកិច្ចប្រជុំកំពូលថ្ងៃនេះ ដើម្បី ថ្កោលទោសឥតថ្នមមាត់ មកលើ រដ្ឋអំណាចរុស្ស៊ី ចំពោះការរំលោភសិទ្ធិមនុស្ស បែបយ៉ាង កាត់ទោសក្រុមនារី អ្នកចម្រៀង Pussy Riot ដែលហ៊ានទិតៀនលោកពូទីន, ចាប់រូបថៅកែនៃមហាក្រុមហ៊ុនប្រេងកាត ឯកជន ឈ្មោះ Khodorkovski ដាក់គុកដោយបន្ទាប់មករឹបអូសយកទ្រព្យសម្បត្តិក្រុមហ៊ុននេះទៅជាកម្មសិទ្ធិរបស់ក្រុមហ៊ុនប្រេងកាតរដ្ឋរុស្ស៊ីតែម្តង, ចាប់ឃុំឃាំង គ្មានឈប់ ពួកមេដឹកនាំ បក្សប្រឆាំង ដែលតែងធ្វើមីទ្ទិញតវ៉ាទល់នឹងអំណាចលោកពូទីន។
តាមមតិសហភាពអឺររ៉ុប “កញ្ចប់ថាមពលទី៣”នោះគឺសំដៅបំផុស ឲ្យមានការប្រជែងគ្នាដោយយុត្តិធម៌ ខាងប្រើខ្សែបំពង់បង្ហូរឧស្ម័ន ដែលលូនកាត់តាម ដែនដី អឺរ៉ុបខាងកើតនិងអឺរុបកណ្តាល។
ដោយហេតុថា នៅមានការខ្វែងគំនិតគ្នាខ្លាំងនៅឡើយ រវាងសហភាពអឺរ៉ុបនិងរុស្ស៊ី គេពិបាក សង្ឃឹមថា ជំនួបកំពូលលើកនេះ អាចនាំមកនូវ លទ្ធផលក្នុងន័យ”បុកទម្លាយទៅមុខ”អ្វីណា។
ជាការរំលឹកជំនួបកំពូលរុស្ស៊ី-សហភាពអឺរ៉ុប ប្រព្រឹត្តទៅ២ដងក្នុង១ឆ្នាំ គឺម្តងនៅលើដែនដីរុស្ស៊ី ក្នុងឆមាសទី១ ម្តងទៀត ក្នុងឆមាសទី២ នៅលើដែនដីខាងសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ