វត្តមានលោកថាក់ស៊ីននៅកម្ពុជាបង្កការក្តៅក្រហាយដល់បក្សប្រឆាំងថៃ
ពិធីជួបជុំរវាងអតីតនាយករដ្ឋមន្ត្រីថៃ លោកថាក់ស៊ីន ស៊ីណាវ៉ាត្រា ជាមួយក្រុមអាវក្រហមថៃនៅក្នុងប្រទេសកម្ពុជា និងឡាវក្នុងឱកាសបុណ្យចូលឆ្នាំថ្មីនេះកំពុងបង្កការក្តៅក្រហាយយ៉ាងខ្លាំងពីសំណាក់គណបក្សប្រឆាំងថៃ។ គណបក្សប្រជាធិបតេយ្យរបស់អតីតនាយករដ្ឋមន្ត្រីអាភីស៊ីតចោទប្រកាន់មន្ត្រីរដ្ឋាភិបាល តំណាងរាស្ត្រ និងទូតថៃប្រចាំកម្ពុជា និងឡាវថាបានធ្វើមិនដឹងមិនឮចំពោះពិរុទ្ធភាពរបស់លោកថាក់ស៊ីន។ បក្សប្រឆាំងថៃប្រកាសចាត់វិធានការផ្លូវច្បាប់ប្រឆាំងអ្នកទាំងនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
វត្តមានរបស់លោកថាក់ស៊ីននៅកម្ពុជាក្រោមការអបអរសា្វគមន៍ពីសំណាក់ក្រុមអាវក្រហមថៃរាប់ម៉ឺននាក់នៅថ្ងៃសៅរ៍ម្សិលមិញ និងថ្ងៃអាទិត្យនេះ កំពុងបង្កការក្តៅក្រហាយយ៉ាងខ្លាំងដល់គណបក្សប្រឆាំងថៃ។ គណបក្សប្រជាធិបតេយ្យរបស់អតីតនាយករដ្ឋមន្ត្រីអាភីស៊ីត វាចាជីវ៉ា បានចោទប្រកាន់មន្ត្រីមួយចំនួននៃគណៈរដ្ឋមន្ត្រីថៃ រួមទាំងជំនួយការនាយករដ្ឋមន្ត្រី អ្នកការទូត និងតំណាងរាស្ត្រភឿថៃមួយចំនួន រួមទាំងរដ្ឋាភិបាលកម្ពុជាផងថាបានជួយជ្រោមជ្រែងលោកថាក់ស៊ីន ដែលជាពិរុទ្ធជន និងដែលតុលាការថៃកំពុងតាមចាប់ខ្លួន។
កាសែតបាងកកប៉ុស្តិ៍របស់ថៃបានផ្សាយឲ្យដឹងនៅថ្ងៃនេះថា គណបក្សប្រជាធិបយ្យេបានប្រកាសថានឹងបើកការស៊ើបអង្កេតមួយអំពីបញ្ហានេះ ហើយគណបក្សនេះនឹងចាត់វិធានការផ្លូវច្បាប់ប្រឆាំងមន្ត្រីថៃទាំងនោះដែលបានប្រើប្រាស់រថយន្តរបស់រដ្ឋ ដើម្បីមកជួបជាមួយលោកថាក់ស៊ីនទៀតផង។ គណបក្សប្រឆាំងថៃក៏បានអះអាងថា រដ្ឋាភិបាលកម្ពុជារបស់លោកនាយករដ្ឋមន្ត្រីហ៊ុន សែន បានបញ្ជូនរថយន្តជាច្រើនគ្រឿងទៅដឹកក្រុមអាវក្រហមថៃពីប៉ោយប៉ែតមកសៀមរាបផងដែរ។
លោកថាក់ស៊ីន អតីតនាយករដ្ឋមន្ត្រីថៃ បានមកដល់ខេត្តសៀមរាប កាលពីវេលាម៉ោង ១១ព្រឹកថ្ងៃសៅរ៍នេះ ក្រោមការអបអរស្វាគមន៍ពីក្រុមអាវក្រហមថៃរាប់ម៉ឺននាក់ ដែលជាអ្នកគាំទ្ររូបលោក។ ពិធីជួបជុំរវាងលោកថាក់ស៊ីន និងក្រុមអ្នកគាំទ្រត្រូវបានប្រារព្ធធ្វើឡើងយ៉ាងអ៊ឹកអធឹក កាលពីល្ងាចថ្ងៃសៅរ៍ និងនៅថ្ងៃអាទិត្យនេះទៀត ក្នុងខេត្តសៀមរាប។
អាជ្ញាធរកម្ពុជាបានរៀបចំនិងសម្រួលឲ្យមានជំនួបនេះ ដោយបានការពារសន្តិសុខយ៉ាងតឹងរ៉ឹងបំផុត។ យ៉ាងណាក៏ដោយ អាជ្ញាធរកម្ពុជាបានកម្រិតវត្តមានលោកថាក់ស៊ីនត្រឹមតែជាអ្នកទេសចរម្នាក់តែប៉ុណ្ណោះដោយមិនជាប់ទាក់ទងនឹងសកម្មភាពនយោបាយទេ។
គួររម្លឹកដែរថា មុននឹងមកដល់កម្ពុជា លោកថាក់ស៊ីនក៏បានរៀបចំពិធីជួបជុំគ្នាបែបនេះដែរនៅឯប្រទេសឡាវ កាលពីថ្ងៃព្រហស្បតិ៍ ដើម្បីអបអរសាទរបុណ្យចូលឆ្នាំថ្មី។ លោកក៏បានថ្លែងទៅកាន់អ្នកគាំទ្រអំពីសារនយោបាយមួយចំនួនដែរ។ ជាក់ស្តែង លោកថាក់ស៊ីនអះអាងថា លោកនឹងវិលត្រឡប់ទៅប្រទេសថៃវិញក្នុងពេលដ៏ខ្លីខាងមុខនេះ នៅពេលដែលស្ថានការណ៍នយោបាយប្រទេសថៃវិលត្រឡប់ទៅរកស្ថានភាពជាធម្មតាឡើងវិញ។ ប៉ុន្តែ បក្សប្រឆាំងថៃកំពុងព្យាយាមរារាំងការវិលត្រឡប់របស់លោកថាក់ស៊ីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ