បណ្តឹងបក្សប្រឆាំងថៃសុំអោយការបោះឆ្នោតថ្ងៃ២កុម្ភៈមិនយកជាការបាន ត្រូវតុលាការថៃទាត់ចោល
នៅថៃ ថ្ងៃពុធនេះ តុលាការធម្មនុញ្ញថៃបានទាត់ចោលនូវពាក្យបណ្តឹងរបស់បក្សប្រឆាំង ដែលបានសុំអោយតុលាការចាត់ទុកការបោះឆ្នោតសភាមុនកាលកំណត់ កាលពីថ្ងៃ២កុម្ភៈ ជាការបោះឆ្នោតមិនអាចយកជាការបាន។ តុលាការធម្មនុញ្ញថៃលើកឡើងថា ពាក្យបណ្តឹងនោះគ្មានមូលដ្ឋានគ្រប់គ្រាន់នោះទេ។ ការបោះឆ្នោតសភា ថ្ងៃ២កុម្ភៈកន្លងទៅ ត្រូវបានរាំងស្ទះ តាមការិយាល័យបោះឆ្នោត១០ភាគរយ ដោយសារ ក្រុមបាតុករប្រឆាំងរដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ចាត់ទុកការបោះឆ្នោតសភាថៃ ថ្ងៃ២កុម្ភៈ ថាជាការបោះឆ្នោតយកជាការមិនបាន លុបចោលគណបក្សកាន់អំណាចភឿថៃ ពីឆាកនយោបាយ តុលាការធម្មនុញ្ញថៃមិនអាចទទួលតាមសំណូមពរក្នុងបណ្តឹងរបស់បក្សប្រឆាំងថៃបាននោះទេ។ យោងតាមតុលាការថៃ ពាក្យបណ្តឹងនោះ គ្មានមូលដ្ឋានគ្រប់គ្រាន់ឡើយ។
វីរ៉ាតាណា កាល្យាស៊ីរី ជាមេធាវីគណបក្សប្រជាធិបតេយ្យដែលជាបក្សប្រឆាំងដ៏ធំនៅថៃ បានដាក់ពាក្យបណ្តឹងនេះទៅតុលាការ។ មេធាវីបក្សប្រឆាំងលើកយកហេតុផលថា ការបោះឆ្នោតសភាថ្ងៃ២កុម្ភៈមិនបានធ្វើឡើងតែក្នុងរយៈពេលមួយថ្ងៃ ដូចធម្មតានោះទេ។ មេធាវីវីរ៉ាតាណា ប្រាប់ថា គាត់គោរពសេចក្តីសម្រេចរបស់តុលាការ តែប្រសិនរដ្ឋាភិបាលធ្វើខុសឆ្គងម្តងទៀត គាត់នឹងដាក់ពាក្យបណ្តឹងថ្មីទៀត។
គួររំលឹកថា បក្សប្រឆាំងថៃបានធ្វើពហិការមិនចូលរួមការបោះឆ្នោតសភា ថ្ងៃ២កុម្ភៈកន្លងទៅនោះទេ។ ហើយកាលពីថ្ងៃបោះឆ្នោតនោះដែរ ក្រុមបាតុករប្រឆាំងរដ្ឋាភិបាលលោកស្រីយីងឡាក់ បានរាំងស្ទះដំណើរការបោះឆ្នោត នៅតាមការិយាល័យបោះឆ្នោត១០ភាគរយ។ ជាង៣ខែមកនេះ ក្រុមបាតុករនៅតែទាមទារអោយលោកស្រីយីងឡាក់ចុះពីអំណាច រាំងស្ទះមិនអោយមានការប្រកាសលទ្ធផលបោះឆ្នោត។ ដោយសារមណ្ឌលបោះឆ្នោតជាច្រើនមិនអាចដំណើរការបោះឆ្នោតបាន កាលពីថ្ងៃ២កុម្ភៈនោះ គណៈកម្មការបោះឆ្នោតបានប្រកាសនៅថ្ងៃអង្គារម្សិលមិញថា នឹងរៀបចំការបោះឆ្នោតសភាមុនកាលកំណត់ ចំនួន២ថ្ងៃបន្ថែមទៀត គឺនៅថ្ងៃ២០ និងថ្ងៃ២៧មេសា នៅតាមមណ្ឌលដែលអ្នកបោះឆ្នោតមិនអាចបោះឆ្នោតបាន ក្នុងពេលកន្លងមក។
ដោយឡែក អ្នកបោះឆ្នោតថៃក៏ជួបបញ្ហា មិនអាចបោះឆ្នោតបានផងដែរ កាលពីថ្ងៃ២កុម្ភៈ នៅមណ្ឌលបោះឆ្នោត២៨កន្លែង ដោយសារតែនៅទីនោះ គ្មានបេក្ខជនឈរឈ្មោះទាល់តែសោះ។
អាជ្ញាធរមិនទាន់មានដំណោះស្រាយសម្រាប់មណ្ឌលទាំង២៨នេះនៅឡើយទេ។ ប្រសិនគ្មានអ្នកតំណាងរាស្ត្រ២៨រូប មកពីពីមណ្ឌលបោះឆ្នោតទាំង២៨នេះទេ សភាថៃមិនអាចធ្វើការប្រជុំបានឡើយ ព្រោះថា ក្នុងចំណោមកៅអីសភា៥០០កៅអី អង្គប្រជុំគ្មានសមាជិកគ្រប់គ្រាន់រហូតដល់៩៥ភាគរយ ដើម្បីអោយការពិភាក្សាអង្គប្រជុំអាចយកជាការបាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ