មនុស្សសន្ធឹកសន្ធាប់រារាំងប៉ូលិសថៃមិនអោយចាប់ខ្លួនសង្ឃDhammachayo
នៅជាយក្រុងភាគខាងជើងបាងកក ប្រទេសថៃ ថ្ងៃព្រហស្បតិ៍នេះ មនុស្សសន្ធឹកសន្ធាប់បានប្រមូលផ្តុំគ្នា នៅវត្តដ៏ធំ Dhammakaya ដើម្បីរារាំងប៉ូលិសមិនអោយចូលទៅចាប់ខ្លួនសង្ឃ Dhammachayo។សង្ឃអង្គនេះជាប់ចោទពីបទបន្លំបច្ច័យរាប់រយលានអឺរ៉ូ ដែលពុទ្ធសាសនិកជនប្រគេនដល់វត្ត។ ប៉ូលិសមិនទាន់រកឃើញរឺចាប់ខ្លួនលោកនៅឡើយទេ ប៉ុន្តែ បើយោងតាមក្រុមសង្ឃនាំពាក្យនៅវត្តDhammakaya សង្ឃជាប់ចោទកំពុងសំរាកសឹង្ហក្នុងវត្ត ដោយសារលោកមានជងឺ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
នៅជាយក្រុងបាងកក ក្រុមអ្នកគាំទ្រសង្ឃថៃ Dhammachayo សន្ធឹកសន្ធាប់ ក្នុងសម្លៀកបំពាក់ពណ៌ស បានប្រមូលផ្តុំគ្នា ថ្ងៃព្រហស្បតី៍នេះ ក្នុងវត្ត Dhammakaya ជាវត្តដ៏ធំ មានរាងរៅមូលដូចថាសហោះ។ ទោះជាមានដីកាចាប់ខ្លួនក្នុងដៃក៏ដោយ ក៏ក្រុមប៉ូលិសមិនអាចចូលទៅកន្លែងមួយចំនួនក្នុងវត្តនេះដែរ ដោយសារតែការហាមឃាត់របស់ក្រុមអ្នកគាំទ្រទាំងនេះ។
សង្ឃថៃ Dhammachayo ដែលប៉ូលិសតាមរកនោះ ជាប់ចោទពីបទបន្លំបច្ច័យរាប់លានអឺរ៉ូ របស់ពុទ្ធបរិស័ទ។ រឿងរ៉ាវចាប់ខ្លួនសង្ឃអង្គនេះ ត្រូវសារព័ត៌មានក្នុងស្រុកលើកយកជជែក ច្រើនសប្តាហ៍មកហើយ។ ប៉ុន្តែ បណ្តាអ្នកគាំទ្រសង្ឃអង្គនេះបានបរិហារថា វាជាការតាមចាប់ខ្លួនបែបនយោបាយ ដើម្បីប្រឆាំងចលនាវត្ត ដែលជាចលនាគាំទ្រដោយអតីតនាយករដ្ឋមន្ត្រី ថាក់ស៊ីន ស៊ីណាវ៉ាត់។ សង្ឃជាប់ចោទបានបង្កើតចលនាវត្ត Dhammakaya ឡើង ក្នងទសវត្សឆ្នាំ១៩៧០។ វត្តនេះជាវត្តមួយ ដែលសំបូរលុយកាក់ ក្នុងចំណោមវត្តអ្នកមាននានានៅថៃ។
កាលពីឆ្នាំ២០១៥ វត្តនេះបានសុខចិត្តសងប្រាក់ជិត២០លានអឺរ៉ូ ទៅអោយរដ្ឋ ជាប្រាក់ដែលប្រធានសហគ្រាសមួយរូប ប្រគេនដល់វត្ត។ ប្រធានសហគ្រាសរូបនោះ ជាប់ចោទពីបទលួចបន្លំលុយទាំងនេះ។ រឿងនេះបានបង្កភាពចម្រូងចម្រាសនៅថៃ ធ្វើអោយគេចាប់អារម្មណ៍ថា វត្តនានាកំពុងតែចង់ឆ្លៀតរកស៊ី ចំណេញលុយកាក់ ជាធម៌មិនសុចរិត ផ្ទុយពីគន្លងពុទ្ធសាសនា។ ប្រជាជនថៃក៏ចោទសួរដែរថា ហេតុអ្វីបានជាអាជ្ញាធរថៃអវត្តមានក្នុងការត្រួតពិនិត្យការគ្រប់គ្រងនិងការប្រើប្រាស់បច្ច័យក្នុងវត្តដូច្នេះ ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ