ប៉ូលិសថៃចាប់ជនអន្តោប្រវេសន៍២០០នាក់ អាចជាជនជាតិអ៊ុយហ្គួមកពីតំបន់ស៊ីនជាំងប្រទេសចិន
នៅថ្ងៃសុក្រនេះ អ្នកសារព័ត៌មានវិទ្យុបារាំងយើងមួយរូប បានរាយការណ៍ពីក្រុងបាងកក មកថា នៅប្រទេសថៃ ប៉ូលិសបានចាប់ខ្លួនក្រុមជនអន្តោប្រវេសន៍មានគ្នា២០០នាក់ បន្ទាប់ពីមានការបាញ់ប្រហារនៅជំរំមួយក្នុងព្រៃ នៅភាគខាងត្បូងប្រទេសមក។ យោងតាមប្រភពព័ត៌មានទទួលបានពីអង្គការមនុស្សធម៌ ជនអន្តោប្រវេសន៍ទាំងនេះ ជាជនជាតិអ៊ុយហ្គួរ មកពីតំបន់ស៊ីនជាំងប្រទេសចិន។ ប្រសិនបើថៃកំណត់អត្តសញ្ញាណឃើញថាជនទាំងនេះជា ជនជាតិអ៊ុយហ្គួមែន នោះថៃអាចនឹងបញ្ជូនជនអន្តោប្រវេសន៍ទាំងនេះ អោយទៅអាជ្ញាធរចិនវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៥
នៅថ្ងៃសុក្រនេះ លោក Arnaud Dubus អារណូ ឌុយប៊ុស ជាអ្នកយកព័ត៌មានរបស់វិទ្យុបារាំងអន្តរជាតិ RFI បានរាយការណ៍ប្រាប់ពីក្រុងបាងកក ថា អាជ្ញាធរថៃនៅមិនទាន់បានកំណត់អត្តសញ្ញាណជនអន្តោប្រវេសន៍ទាំង២០០នាក់ ដែលប៉ូលិសចាប់បាននៅឡើយទេ។ ជនអន្តោប្រវេសន៍ទាំងនេះប្រាប់ថា ពួកគេជាជនជាតិតួកគី។ គេមិនដឹងថា ហេតុអ្វីបានជាជនជាតិតួកគី បែរជាមកលាក់ខ្លួននៅថៃបណ្តោះអាសន្នបែបនេះ ទៅវិញ។ ប៉ុន្តែ បើយោងតាមប្រភពព័ត៌មានមួយបានមកពីអង្គការមនុស្សធម៌ ជនអន្តោប្រវេសន៍ទាំងនេះជាជនជាតិអ៊ុយហ្គួរ មកពីតំបន់ស៊ីនជាំងប្រទេសចិនទៅវិញទេ។
ជនអន្តោប្រវេសន៍ទាំង២០០នាក់ ជាក្រុមគ្រួសារដែលរស់លាក់ខ្លួន ក្នុងជំរំមួយកន្លែង នៅតាមភ្នំក្នុងខេត្តសុងខ្លា ភាគខាងត្បូង ប្រទេសថៃ។ ប្រភពព័ត៌មានអង្គការមនុស្សធម៌ដដែលប្រាប់ថា ពួកគេត្រូវចេញដំណើរទៅតួកគី ដោយឆ្លងកាត់ម៉ាឡេស៊ី។ ប្រសិនបើពួកគេជាជនជាតិអ៊ុយហ្គួមែន អាជ្ញាធរក្រុងប៉េកាំងអាចនឹងដាក់សម្ពាធថៃ ដែលតែងសហប្រតិបត្តិការជាមួយចិននោះ អោយប្រគល់ជនអន្តោប្រវេសន៍ទាំងនេះទៅអោយចិនវិញ។ ហើយពេលទៅដល់ប្រទេសចិនវិញ ពួកគេអាចនឹងរងការកាត់ទោសពីតុលាការ។
ទាក់ទងនឹងជនអន្តោប្រវេសន៍ជនជាតិអ៊ុយហ្គួរ កាលពីខែកុម្ភៈកន្លងទៅ រដ្ឋាភិបាលម៉ាឡេស៊ីធ្លាប់បានបញ្ជូនជនជាតិអ៊ុយហ្គួ៦នាក់ អោយត្រលប់ទៅចិនវិញ។ ជនជាតិអ៊ុយហ្គួទាំង៦នាក់នេះ បានប្រើលិខិតឆ្លងដែនក្លែងក្លាយ ដើម្បីចាកចេញពីក្រុងកូឡាឡុំពួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ