អាភីស៊ីតដូចជាកំពុងផ្តើមធ្វើការឃោសនាបោះឆ្នោត
នៅថ្ងៃអង្គារទី២២មីនានេះ លោកនាយករដ្ឋមន្ត្រីថៃអាភីស៊ីត បានជួបជាមួយបណ្តាអ្នកកាសែតបរទេសនៅក្នុងទីក្រុងបាងកក។ លោកអាភីស៊ីតដែលបានសន្យាថា នឹងរៀបចំបោះឆ្នោតសភាឲ្យបានមុនខែកក្កដាខាងមុខ ហាក់ដូចជាបានផ្តើមឡើងហើយយុទ្ធនាការឃោសនាបោះឆ្នោត។
ចុះផ្សាយនៅថ្ងៃ៖
សេចក្តីរាយការណ៍របស់ តាន់ ហ្សង់-ហ្វ្រង់ស្វ័រ
«តើពលរដ្ឋថៃចង់ឲ្យប្រទេសជាតិបោះជំហានទៅមុខ ដោយសារតែនយោបាយរបស់រដ្ឋាភិបាលដែលខ្ញុំដឹកនាំ ឬចង់ឲ្យប្រទេសជាតិលង់ខ្លួននៅក្នុងអំពើហិង្សា»។ ពាក្យសំដីបែបនេះរបស់លោកអាភីស៊ីត នៅចំពោះមុខអ្នកសារព័ត៌មានបរទេស ក្នុងថ្ងៃអង្គារនេះ មានន័យដូចជាការធ្វើយុទ្ធនាការឃោសនាបោះឆ្នោតអ៊ីចឹង។
ចំពោះលោកនាយករដ្ឋមន្ត្រី នាពេលបោះឆ្នោតខាងមុខនេះ ប្រជាពលរដ្ឋដែលជាម្ចាស់ឆ្នោត មានជម្រើសតែពីរទេ ជម្រើសរវាងរដ្ឋាភិបាលជិតអស់អាណត្តិដែលលោកដឹកនាំនិងពួកអ្នកដែលបង្កអស្ថិរភាពនិងអំពើហិង្សា។
សូមជម្រាបថា ជិតមួយឆ្នាំក្រោយមហាបាតុកម្មរបស់ពួកអាវក្រហមដែលរដ្ឋាភិបាលលោកអាភីស៊ីតបានវាយបង្ក្រាបក្នុងថ្លុកឈាម នយោបាយប្រទេសថៃនៅតែមានលក្ខណៈមួយថ្ងៃកាត់មួយថ្ងៃកោរ។ ប៉ុន្មានថ្ងៃមុននេះ លោកអាភីស៊ីត ទើបតែបានគេចផុតពីការបោះឆ្នោតដកសេចក្តីទុកចិត្តមួយ ផ្តួចផ្តើមឡើងដោយគណបក្សភឿថៃ។
នៅចំពោះមុខអ្នកសារព័ត៌មានបរទេស លោកអាភីស៊ីតក៏បាននិយាយផងដែរអំពីការផ្តើមធ្វើអន្តរាគមន៍ឡើងវិញពីក្រៅប្រទេស របស់លោកអតីតនាយករដ្ឋមន្ត្រីថាក់ស៊ីន តាមរយៈVidéo-Conférence។ នៅត្រង់ចំណុចនេះ លោកអាភីស៊ីត បានលើកឡើងថា «តើពលរដ្ឋចង់បានរដ្ឋាភិបាលមួយដូចរដ្ឋាភិបាលបច្ចុប្បន្នដែលគិតពីប្រយោជន៍របស់ពួកគេ ឬមួយក៏ចង់ឲ្យក្រុមអ្នកដែលមានប្រយោជន៍រួមគ្នាជាមួយបុគ្គលម្នាក់» គឺបុគ្គលថាក់ស៊ីនឡើងមកក្តាប់អំណាច?
នៅទីបំផុត លោកអាភីស៊ីតបាននិយាយរបៀបកំប្លែងទៅកាន់អ្នកសារព័ត៌មានថា៖«អស់លោកប្រហែលជាចង់ដឹងថា ខ្ញុំនឹងក្លាយជាអ្វីនៅឆ្នាំក្រោយនេះ? មែនទែនទៅ ខ្ញុំខ្លួនឯងក៏មិនដឹងដែរ»។ តាមពិត លោកអាភីស៊ីត ប្រហែលជាមិនច្បាស់ក្នុងចិត្តទេថា គណបក្សរបស់លោកអាចយកជ័យជំនះបាន នាពេលបោះឆ្នោតខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ