បាតុកម្មធ្វើអោយរោងចក្រខាតបង់ប្រាក់៧លានដុល្លារ
បាតុកម្មក្នុងរយៈពេល៤ថ្ងៃកាលពីដើមសប្ដាហ៍នេះបានធ្វើអោយរោងចក្រ កាត់ដេរខាតបង់ប្រាក់៧លានដុល្លារអាមេរិក។ កាលពីថ្ងៃចន្ទដល់ថ្ងៃព្រហស្បតិ៍កន្លងមកនេះ កម្មករច្រើនម៉ឺននាក់ក្នុងវិស័យកាត់ដេរបាននាំគ្នាធ្វើកូដកម្ម បាតុកម្មដើម្បីទាមទារដំឡើងប្រាក់ខែអប្បបរមារហូតដល់៩៣ដុល្លារ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ គី សុខលីម ពីទីក្រុងភ្នំពេញ
លោក ជាតិ ខេមរា មន្ត្រីជាន់ខ្ពស់នៃសមាគមថៅកែរោងចក្រកាត់ដេរកម្ពុជាបានបញ្ជាក់ប្រាប់នៅថ្ងៃសៅរ៍នេះថា បាតុកម្មក្នុងរយៈពេល៤ថ្ងៃក្នុងដើមសប្ដាហ៍នេះបានបង្កអោយរោងចក្រកាត់ដេរដែលពាក់ព័ន្ធខាតបង់ប្រាក់ប្រមាណជា៧លានដុល្លារអាមេរិក។
ការខាតបង់នេះ ត្រូវបានគេគិតគូរទៅលើការចំណាយសម្រាប់ការប្រើប្រាស់ទឹក ភ្លើង ការថយចុះផលិតភាពការងាររបស់រោងចក្រ និងការកើនឡើងនៃតម្លៃដឹកជញ្ជូន។ ទាក់ទងទៅនឹងការដឹកជញ្ជូននេះមន្ត្រីតំណាងថៅកែរោងចក្របានបញ្ជាក់ថា ប្រសិនបើកម្មករមិនបានធ្វើបាតុកម្ម ពេលនោះការដឹកជញ្ជូនត្រូវធ្វើឡើងតាមកប៉ាល់ធម្មតា ប៉ុន្តែនៅពេលដែលមានកូដកម្មធ្វើអោយគាំងចង្វាក់ផលិតកម្មចំនួន៤ថ្ងៃ ពេលនោះ ថៅកែត្រូវធ្វើការផ្ទេរពីការបញ្ជូនតាមកប៉ាល់ទៅជាការបញ្ជូនតាមយន្តហោះវិញ។ ការដឹកជញ្ជូនតាមយន្តហោះអាចធ្វើអោយតម្លៃដឹកជញ្ជូនកើនឡើងជាងការដឹកតាមកប៉ាល់។ ប៉ុន្តែបើទោះបីជាយ៉ាងនេះក្តី ក៏ថៅកែត្រូវតែធ្វើយ៉ាងដូច្នេះដែរពីព្រោះពួកគេចៀសវាងកុំអោយទំនិញទៅដល់ដៃអ្នកទិញយឺត។
បើយោងតាមកិច្ចសន្យាពាណិជ្ជកម្ម ប្រសិនបើការប្រគល់ទំនិញមានលក្ខណៈយឺត ពេលនោះអ្នកលក់ទំនិញត្រូវតែបង់ខាតក្នុងកម្រិតណាមួយអាស្រ័យទៅលើកិច្ចព្រមព្រៀង។
ដោយសារបាតុកម្មបានធ្វើអោយខូចប្រយោជន៍របស់ខ្លួន រោងចក្រមួយចំនួនគ្រោងចាត់វិធានការប្រឆាំងនឹងសហជីព។ លោក ជាតិ ខេមរា មន្ត្រីជាន់ខ្ពស់នៃសមាគមរោងចក្រកាត់ដេរកម្ពុជាបានបញ្ជាក់ថា រោងចក្រកាត់ដេរមួយចំនួនគ្រោងប្ដឹងមេដឹកនាំសហជីពដែលបានញុះញង់អោយមានបាតុកម្មនាពេលកន្លងមក។ ប៉ុន្តែលោកមិនទាន់បានបញ្ជាក់ឈ្មោះមេដឹកនាំសហជីពនៅឡើយទេ។
ទាក់ទងទៅនឹងពាក្យបណ្ដឹងនេះ លោក អាត់ ធន់ ប្រធានសហជីពសហភាពការងារកម្ពុជាបាននិយាយនៅថ្ងៃសៅរ៍នេះថា លោកមិនទាន់ដឹងពីគម្រោងដាក់ពាក្យបណ្ដឹងរបស់ថៅកែរោងចក្រកាត់ដេរប្រឆាំងនឹងមេដឹកនាំបាតុកម្មនៅឡើយទេ។ រីឯទាក់ទងទៅនឹងការខាតបង់របស់ថៅកែរោងចក្រកាត់ដេរវិញ លោក អាត់ ធន់ បានបញ្ជាក់ថា នៅពេលមានកូដកម្ម បាតុកម្មម្តងៗ ទាំងកម្មករទាំងថៅកែរោងចក្រកាត់ដេរខាតបង់ដូចតែគ្នា។ លោក អាត់ ធន់ បានបន្ថែមទៀតថា កម្មករមិនចង់ធ្វើបាតុកម្ម ឬកូដកម្មទេ ប៉ុន្តែពួកគេគ្មានជម្រើស។
សូមបញ្ជាក់ថា នៅថ្ងៃទី២៧ខែកញ្ញាខាងមុខនេះ សហជីពនិងថៅកែរោងចក្រគ្រោងនឹងជជែកគ្នាអំពីអត្ថប្រយោជន៍ផ្សេងៗសម្រាប់កម្មករក្រៅពីប្រាក់ឈ្នួលអប្បបរមា។ អត្ថប្រយោជន៍ផ្សេងៗជារួមមាន៖ ប្រាក់ទ្រទ្រង់សុខភាព ប្រាក់អតីតភាព ប្រាក់បន្ថែមម៉ោង។ល។ ប៉ុន្តែគេមិនទាន់ដឹងថា តើកិច្ចចរចាខាងមុខនេះនឹងទទួលបានលទ្ធផលយ៉ាងណានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ