អាមេរិកចាប់ខ្លួនមនុស្ស១០នាក់ជាប់ចោទថាជាភ្នាក់ងារចារកម្មរុស្ស៊ី
កាលពីថ្ងៃចន្ទ ទី២៨ មិថុនា ២០១០នេះ អាជ្ញាធរអាមេរិកបានប្រកាសឲ្យដឹងថា គេបានបំបែកសម្បុកភ្នាក់ងារចារកម្មមួយក្រុមធំ ដែលលួចយកការណ៍ឲ្យរដ្ឋាភិបាលរុស្ស៊ី។ មនុស្ស ១០នាក់ត្រូវបានចាប់ខ្លួន បញ្ជូនទៅតុលាការ ក្រោយពីមានការស៊ើបអង្កេតអស់រយៈពេលជិត ១០ឆ្នាំ។
ចុះផ្សាយនៅថ្ងៃ៖
សេចក្តីរាយការណ៍របស់ សេង ឌីណា
គឺជារឿងពិត តែមិនចាញ់រឿងក្នុងកុនប៉ុន្មានទេ! ជនជាប់ចោទពីបទចារកម្ម ទាំង ១០នាក់ បានទទួលការហ្វឹកហ្វឺននៅសាលាចារកម្មរុស្ស៊ី។ បន្ទាប់មក ទើបចូលមកក្នុងទឹកដីអាមេរិករស់នៅជាប្រជាជនធម្មតា អស់រយៈពេលជាងមួយទសវត្សរ៍។ ខ្លះទៅសិក្សានៅសាកលវិទ្យាល័យ និងប្រកបការងារដូចប្រជាពលរដ្ឋអាមេរិកធម្មតា។ ខ្លះរស់នៅជាមួយគ្នា ជាប្តី-ប្រពន្ធ ហើយប្រើប្រាស់អត្តសញ្ញាណក្លែងក្លាយ។ ប៉ូលិសអាមេរិកបានឆែកឃើញសំបុត្រកំណើតរបស់ជនសង្ស័យខ្លះមានឈ្មោះ ដែលគ្មានក្នុងបញ្ជីជាតិ។ ខ្លះទៀត យកឈ្មោះរបស់អ្នកស្លាប់មកប្រើ។
មុននឹងឈានទៅដល់ការចាប់ខ្លួននេះ ទីភ្នាក់ងារអែហ្វ.ប៊ី.អាយ អាមេរិកបានធ្វើការតាមដាន ស៊ើបអង្កេតអស់រយៈពេលជិត ១០ឆ្នាំ ដោយមានការតាមឃ្លាំមើលសកម្មភាពជនសង្ស័យផង ការលបស្តាប់ការសន្ទនាតាមទូរស័ព្ទផង និងការបន្លំខ្លួនធ្វើជាមន្រ្តីចារកម្មរុស្ស៊ីផង។ ឆ្លងតាមការស៊ើបអង្កេតនេះ ភ្នាក់ងារអែហ្វ.ប៊ី.អាយ បានរកឃើញថា ជនជាប់ចោទពីបទចារកម្មទាំង ១០នាក់ ទទួលបេសកកម្មពីម៉ូស្គូឲ្យស្វែងរកព័ត៌មានសម្ងាត់ទាក់ទងនឹងអាវុធនុយក្លេអ៊ែរ ទាក់ទងនឹងជំហររបស់រដ្ឋាភិបាលអាមេរិក ជុំវិញការចរចារំសាយសព្វាវុធនុយក្លេអ៊ែរ ជុំវិញបញ្ហាអៀរ៉ង់ ការផ្លាស់ប្តូរថ្នាក់ដឹកនាំនៃទីភ្នាក់ងារចារកម្មអាមេរិក ស៊ី.អាយ.អេ ជាដើម។ ជនសង្ស័យខ្លះ ក៏មានជាប់ពាក់ព័ន្ធផងដែរនឹងប្រតិបត្តិការលាងលុយកខ្វក់។ ជនជាប់ចោទពីបទចារកម្មនេះ អាចនឹងត្រូវតុលាការផ្តន្ទាទោសដាក់ពន្ធនាគារ រហូតដល់ ២០ ទៅ២៥ឆ្នាំ។
នៅពេលនេះ អាមេរិក និងរុស្ស៊ី កំពុងតែមានទំនាក់ទំនងល្អជាមួយគ្នា។ កាលពីប៉ុន្មានថ្ងៃមុននេះ ក្នុងដំណើរទស្សនកិច្ចទៅកាន់សហរដ្ឋអាមេរិក លោកមេដវេដេវ (Medvedev) ប្រធានាធិបតីរុស្ស៊ី បានជួបជាមួយលោកអូបាម៉ា ដោយបង្ហាញពីភាពស្និទ្ធស្នាល។ ស្រាប់តែប៉ុន្មានថ្ងៃក្រោយមក សំណុំរឿងចារកម្មដ៏ធំមួយក៏បានផ្ទុះឡើង។
កាលពីព្រឹកថ្ងៃអង្គារ រដ្ឋាភិបាលរុស្ស៊ីបានបដិសេធមិនព្រមធ្វើអត្ថាធិប្បាយអ្វីទាំងអស់ ជុំវិញការចាប់ខ្លួនជនសង្ស័យទាំង ១០នាក់នេះ។ ក៏ប៉ុន្តែ ក្រោយមក រដ្ឋមន្រ្តីក្រសួងការបរទេសរុស្ស៊ី បានច្រានចោលការចោទប្រកាន់របស់អាមេរិកថា ជាការចោទប្រកាន់ដោយគ្មានមូលដ្ឋាន និងជាការដើរថយក្រោយ ត្រឡប់ទៅសង្រ្គាមត្រជាក់វិញ។ រដ្ឋាភិបាលរុស្ស៊ីក៏បានទាមទារផងដែរឲ្យអាមេរិកបំភ្លឺអំពីឲ្យបានច្បាស់ អំពីរឿងអាស្រូវចារកម្មនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ