តៃវ៉ាន់កំពុងពិចារណាពង្រីកផ្លូវយន្តហោះនៅលើកោះក្នុងសមុទ្រចិនខាងត្បូង
អាជ្ញាធរតៃវ៉ាន់កំពុងតែពិចារណាលើគម្រោងពង្រីកផ្លូវចុះចតយន្តហោះ នៅលើកោះមួយ ស្ថិតក្នុងសមុទ្រចិនខាងត្បូង ដែលកំពុងជាប់ជម្លោះ។ នេះបើយោងតាមការផ្សាយរបស់កាសែតតៃវ៉ាន់ ឈ្មោះ The Liberty Times។ ព័ត៌មានស្តីពីគម្រោងពង្រីកផ្លូវចុះចតយន្តហោះនេះកើតមានឡើង នៅចំពេលដែលជម្លោះសមុទ្រចិនខាងត្បូងកំពុងតែពុះកញ្ជ្រោលយ៉ាងក្តៅគគុក រវាងចិន និងប្រទេសមួយចំនួនទៀត ក្នុងតំបន់អាស៊ាន។
ចុះផ្សាយនៅថ្ងៃ៖
ស្តាប់ - ០១:២៦
កាសែត The Liberty Times ដែលបានដកស្រង់សម្តីមន្រ្តីអាជ្ញាធរតៃវ៉ាន់ដែលសុំមិនបញ្ចេញឈ្មោះ ឲ្យដឹងថា នៅពេលនេះ អាជ្ញាធរតៃវ៉ាន់ទទួលបន្ទុកសន្តិសុខជាតិ កំពុងធ្វើការសិក្សាទៅលើគម្រោងពង្រីកផ្លូវចុះចតយន្តហោះ នៃមូលដ្ឋានទ័ពអាកាសតៃវ៉ាន់ ស្ថិតនៅលើកោះមួយ ដែលតៃវ៉ាន់ហៅថា Taiping ស្ថិតក្នុងចំណោមប្រជុំកោះ Spratlys ក្នុងសមុទ្រចិនខាងត្បូង។
គួរបញ្ជាក់ថា តៃវ៉ាន់បានចាប់ផ្តើមសាងសង់ព្រលានយន្តហោះ នៅកោះ Taiping នេះ កាលពីឆ្នាំ២០០៦ បើទោះជាមានការតវ៉ាពីសំណាក់ប្រទេសជាប់ជម្លោះផ្សេងទៀតក៏ដោយ។ ព្រលានយន្តហោះនេះត្រូវបានសាងសង់ចប់សព្វគ្រប់ នៅចុងឆ្នាំ២០០៧ ដោយមានផ្លូវចុះចតប្រវែងជិត ១ពាន់២រយម៉ែត្រ ដែលអាចឲ្យយន្តហោះដឹកជញ្ជូនផ្នែកយោធាចុះចតបាន។
ប្រជុំកោះ Spratlys ស្ថិតនៅចុងខាងត្បូង នៃសមុទ្រចិនខាងត្បូង ហើយ ក្រៅពីតៃវ៉ាន់ មានប្រទេស ៥ទៀត ដែលកំពុងឈ្លោះដណ្តើមគ្នាកាន់កាប់ គឺ ចិន វៀតណាម ហ្វ៊ីលីពីន ម៉ាឡេស៊ី និងព្រុយណេ។ ក្រៅពីព្រុយណេ ប្រទេសជាប់ជម្លោះទាំងអស់សុទ្ធតែបានដាក់ទីតាំងទ័ពនៅលើកោះណាមួយ ក្នុងចំណោមកូនកោះ ទាំងជាង ១០០ នៅក្នុងប្រជុំកោះ Spratlys នេះ។
នៅក្នុងមួយរយៈកាលចុងក្រោយនេះ គេសង្កេតឃើញមានការប្រឈមមុខដាក់គ្នាជារឿយៗ នៅក្នុងសមុទ្រចិនខាងត្បូង រវាងនាវារបស់ប្រទេសជាប់ជម្លោះ។ គឺដោយសារតែជម្លោះសមុទ្រចិនខាងត្បូងនេះហើយ ទើបធ្វើឲ្យកិច្ចប្រជុំថ្នាក់រដ្ឋមន្រ្តីការបរទេសអាស៊ាន នៅកម្ពុជា ត្រូវទទួលបរាជ័យ ដោយមិនអាចចេញសេចក្តីថ្លែងការណ៍រួមមានបាន កាលពីថ្ងៃសុក្រ។
គម្រោងពង្រីកផ្លូវចុះចតយន្តហោះនៃមូលដ្ឋានទ័ពអាកាសតៃវ៉ាន់នេះ អាចនឹងធ្វើឲ្យជម្លោះសមុទ្រចិនខាងត្បូង ដែលកំពុងតែក្តៅគគុកស្រាប់នេះ កាន់តែពុះកញ្ជ្រោលខ្លាំងឡើងថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ