អង្គការសិទ្ធិមនុស្សស៊ីរីOSDH៖ ប្រតិបត្តិការរុស្ស៊ីនៅស៊ីរី១ឆ្នាំមកនេះ សម្លាប់ជនស៊ីវិលជាង៣៨០០នាក់
ថ្ងៃសុក្រ៣០កញ្ញានេះ អង្គការសិទ្ធិមនុស្សស៊ីរី ហៅកាត់ថា OSDH បានចេញតួលេខជនស៊ីវិល ដែលស្លាប់ក្នុងការវាយប្រហាររបស់យន្តហោះរុស្ស៊ី ១ឆ្នាំមកនេះ។ តាំងពីរុស្ស៊ីបើកប្រតិបត្តិការជួយកងទ័ពស៊ីរី ថ្ងៃ៣០កញ្ញា ឆ្នាំ២០១៥មក ជនស៊ីវិលដែលស្លាប់ដោយសារយន្តហោះរុស្ស៊ី មានចំនួនជាង៣៨០០នាក់។ ក្រុងម៉ូស្គូបានបដិសេធតួលេខអង្គការសិទ្ធិមនុស្សស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
តាំងពីថ្ងៃ៣០កញ្ញា ឆ្នាំ២០១៥ គិតដល់ថ្ងៃ៣០កញ្ញា ដដែល ក្នុងឆ្នាំ២០១៦នេះ តាំងពីពេលរុស្ស៊ីបើកប្រតិបត្តិការផ្លូវអាកាសជួយកងទ័ពស៊ីរី យន្តហោះរុស្ស៊ីបានសម្លាប់ជនស៊ីវិលនៅស៊ីរី ៣៨០៤នាក់។ ទន្ទឹមនេះដែរ សកម្មជនក្រុមជីហាតរដ្ឋអ៊ីស្លាម២៧៤៦នាក់ និងសកម្មជនប្រយុទ្ធតាមក្រុមជីហាតផ្សេងៗទៀត ២៨១៤នាក់ ក៏បានស្លាប់ក្រោមការវាយប្រហាររបស់រុស្ស៊ីដែរ។ នេះជាតួលេខផ្តល់ដោយអង្គការសិទ្ធិមនុស្សស៊ីរីOSDH។
វិមានក្រេមឡាំងបានទាត់ចោលតួលេខនេះ ដោយចាត់ទុកថា ជាតួលេខមិនអាចយកជាការបាន របស់អង្គការOSDH ជាអង្គការមានទីតាំងនៅអង់គ្លេស។ រុស្ស៊ីលើកឡើងថា រុស្ស៊ីជួយកងទ័ពស៊ីរី កំចាត់ក្រុមភេរវជន ហើយការដែលក្រុមជីហាតរដ្ឋអ៊ីស្លាម ក្រុមអាល់កៃដា រឺក៏ក្រុមអាល់ណូស្រា គ្មានវត្តមានក្នុងទីក្រុងដាម៉ាស ក៏ដោយសារជំនួយរបស់រុស្ស៊ីដែរ។
វិមានក្រេមឡាំងប្រកាសជំហររុស្ស៊ី ក្នុងការបន្តជួយកងទ័ពស៊ីរី កំទេចក្រុមភេរវជន។ រុស្ស៊ីនៅតែប្រកាន់ជំហរដូច្នេះ ទោះជាសហគមន៍អន្តរជាតិទាមទារអោយរុស្ស៊ីបញ្ឈប់ការទំលាក់គ្រាប់បែក ពិសេសនៅអាឡិប ភាគខាងជើងក៏ដោយ។ ក្រោយបទឈប់បាញ់ស៊ីរីជួបបរាជ័យ ថ្ងៃ១៩កញ្ញាមក រុស្ស៊ីបានបន្តប្រតិបត្តិការជួយកងទ័ពស៊ីរីតទៅទៀត។
ក្នុងការវាយដណ្តើមយកតំបន់ក្រុងអាឡិប ដែលស្ថិតក្រោមការគ្រប់គ្រងរបស់ក្រុមឧទ្ទាម ថ្ងៃសុក្រនេះ កងទ័ពស៊ីរីបានឆ្ពោះទៅមុខ តាមភាគខាងជើង និងភាគកណ្តាលក្រុងអាឡិប។ ថ្ងៃសុក្រនេះ កងទ័ពបានយកមន្ទីរពេទ្យ១កន្លែងបានមកវិញ។ កាលពីថ្ងៃព្រហស្បតិ៍ នៅភាគខាងជើងអាឡិប កងទ័ពក៏បានវាយយកបានជំរុំភៀសខ្លួនប៉ាឡេស្ទីនមួយកន្លែងមកវិញដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ