ក្រុមឧទ្ទាមនិងក្រុមជីហាតវាយបកកងទ័ពស៊ីរីវិញ
តាំងពីរសៀលថ្ងៃអាទិត្យម្សិលមិញ ក្រុមឧទ្ទាមស៊ីរី និងក្រុមជីហាតហ្វាត អាល់-ឆាំ ដែលជាអតីតក្រុមអាល់ ណូស្រា បានធ្វើការវាយបកទៅលើកងទ័ពស៊ីរី ដើម្បីបើកច្រកនៅតាមសង្កាត់ភាគខាងកើត ដែលរងការឡោមព័ទ្ធដោយកងទ័ព។ ជនស៊ីវិល១១នាក់ បានស្លាប់ដោយសាររ៉ុកកែតរបស់ក្រុមឧទ្ទាម នៅភាគខាងលិចក្រុងអាឡេប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
ការវាយបកទៅកងទ័ពស៊ីរី បានធ្វើឡើង តាំងពីរសៀលថ្ងៃអាទិត្យ នៅភាគខាងត្បូង និងភាគនិរតីតំបន់ក្រុងអាឡេប។ ក្រុមជីហាតហ្វាត អាល់-ឆាំ ជាឈ្មោះទើបដូរថ្មី របស់ក្រុមអាល់ណូស្រា និងក្រុមឧទ្ទាមស៊ីរី បានសហការគ្នា បើកការវាយបកយ៉ាងស្វិតស្វាញ ទៅលើទីតាំងកងទ័ពស៊ីរី នៅភាគខាងត្បូង និងភាគនិរតីតំបន់អាឡេប។ ក្រុមជីហាតព្យាយាមវាយបើកច្រកសង្កាត់នានា នៅតាមភាគខាងកើតអាឡេប។
ប្រតិបត្តិការវាយបកនេះ ធ្វើឡើងក្រោមបញ្ជារបស់ជនជាតិអារ៉ាប៊ី សាអូឌីត ឈ្មោះអាប់ដាឡា អាល់ មូហីស្ន៊ូ ដែលជាមេក្រុមរបស់ក្រុមជីហាត ហ្វាត អាល់-ឆាំ។ មេក្រុមជីហាតរូបនេះ បានបង្ហោះវីដេអូក្នុងបណ្តាញសង្គម អួតថា នេះជាយុទ្ធនាការទាហានធំបំផុត តាំងពីមានការចាប់កំណើតជីហាតនៅស៊ីរី។
ក្រុមជីហាតនិងក្រុមឧទ្ទាម ចង់វាយយកសង្កាត់រ៉ាមូសា នៅភាគនិរតិ អាឡេប។ ប៉ុន្តែ ការប្រយុទ្ធប្រហែលជាប្រើពេលយូរទៀត ព្រោះនៅសមរភូមិខាងត្បូងតំបន់អាឡេប កងទ័ពស៊ីរីមានជំនួយពីកងទ័ពអ៊ីរ៉ង់ និងក្រុមអេស្បូឡាលីបង់។
ប៉ុន្មានថ្ងៃមុននេះ រុស្ស៊ីនិងរដ្ឋាភិបាលស៊ិរីទើបតែប្រកាសបើកច្រកមនុស្សធម៌ដើម្បីរំដោះជនស៊ីវិល និងក្រុមឧទ្ទាមដែលចង់ទំលាក់អាវុធចុះ។ ទោះយ៉ាងនេះក្តី កងទ័ពស៊ីរីបានបើកការទំលាក់គ្រាប់បែកឡើងវិញ ទៅលើទីតាំងក្រុមឧទ្ទាម នៅអាឡេប។ កាលពីថ្ងៃសៅរ៍ សារព័ត៌មានស៊ីរី បានចុះផ្សាយថា មនុស្សប្រមាណជាង១០គ្រួសារ បានចាកចេញតាមច្រកមនុស្សធម៌។ ប៉ុន្តែ ក្រុមបះបោរនិងប្រជាជនបានបដិសេធប័ត៌មាននេះ។
ថ្ងៃចន្ទនេះ ឧទ្ធម្ភាគចក្រដឹកជញ្ជូនរបស់រុស្ស៊ីមួយគ្រឿង ដែលប្រតិបត្តិការមនុស្សធម៌ នៅក្រុងអាឡេប បានរងការវាយប្រហារ។ ទាហានរុស្ស៊ី៥នាក់បានស្លាប់។ គិតតាំងពីរុស្ស៊ីអន្តរាគមន៍យោធានៅស៊ីរី ខែកញ្ញា ឆ្នាំ២០១៥មក បូករួមទាំងទាហានស្លាប់៥នាក់ថ្ងៃនេះ ទាហានរុស្ស៊ីដែលស្លាប់នៅស៊ីរី ឡើងដល់ចំនួន១៨នាក់។
តាមធម្មតា ថ្ងៃចន្ទ១សីហានេះ អង្គការសហប្រជាជាតិត្រូវជំរុញអោយមានកិច្ចចរចាអន្តរស៊ីរី សម្រាប់វិបត្តិជម្លោះស៊ីរី។ ប៉ុន្តែ អ្វីៗហាក់មិនបានកើតឡើងដូចការគ្រោងទុក។ ប្រេសិតពិសេសអង្គការសហប្រជាជាតិ លោក ស្តាហ្វាន់ ដឺមីស្ទូរ៉ា (Staffan de Mistura) បានត្រឹមតែសង្ឃឹមថា កិច្ចពិភាក្សានេះអាចធ្វើឡើងនៅដំណាច់ខែសីហាប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ