ក្រុមឧទ្ទាមស៊ីរីប្រយុទ្ធគ្នា ធ្វើអោយប្រជាជន៦ម៉ឺននាក់រត់ភៀសខ្លួន
នៅភាគខាងកើតស៊ីរី ប៉ុន្មានថ្ងៃចុងក្រោយនេះ មានមនុស្សយ៉ាងហោចណាស់៦ម៉ឺននាក់ បានរត់ភៀសខ្លួន នៅខេត្តឌែរ អេហ្សរ Deir Ezzor ដើម្បីគេចពីការប្រយុទ្ធរវាងក្រុមឧទ្ទាម ដែលកំពុងប្រជែងគ្នានៅស៊ីរី។ ការប្រយុទ្ធគ្នានេះ នៅតែបន្តធ្វើ ទោះជាមេក្រុមអាល់កៃដា បានអំពាវនាវអោយក្រុមឧទ្ទាមទាំងនេះឈប់ប្រយុទ្ធគ្នាក៏ដោយចុះ។ ម្សិលមិញ ប្រធានាធិបតីអាសាដ បានអំពាវនាវអោយអាជ្ញាធរទទួលបន្ទុកជំនួយគ្រប់ផ្នែក សហការអោយទូលំទូលាយជាមួយអង្គការក្នុងស្រុកនិងក្រៅស្រុក ដើម្បីជួយប្រជាជនដែលត្រូវការជំនួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
នៅខេត្តឌែរ អេហ្សរ ភាគខាងកើតស៊ីរី ប៉ុន្មានថ្ងៃចុងក្រោយនេះ មនុស្សរាប់ម៉ឺននាក់បានភៀសខ្លួន គេចពីការប្រយុទ្ធរវាងក្រុមឧទ្ទាម ២ក្រុម ដែលប្រជែងគ្នានៅស៊ីរី។ ក្រុមឧទ្ទាមទាំង២ គឺក្រុមអាល់ណូស្រា ចេញពីសាខាក្រុមអាល់កៃដា និងក្រុមជីហាដរដ្ឋអ៊ីស្លាមអ៊ីរ៉ាក់។ ក្រុមទាំង២បានប្រយុទ្ធគ្នា តាំងពីថ្ងៃពុធ។ ការប្រយុទ្ធបានរាលដាលខ្លាំង នៅថ្ងៃសៅរ៍ម្សិលមិញ។ ក្រុមឧទ្ទាមអាល់ណូស្រា មិនបានស្តាប់ការអំពាវនាវរបស់មេក្រុមអាល់កៃដា អៃម៉ាន់ អាល់ហ្សាវ៉ារី ដែលបានបញ្ជា កាលពីថ្ងៃសុក្រ អោយឈប់ប្រយុទ្ធជាមួយក្រុមឧទ្ទាមរដ្ឋអ៊ីស្លាមអ៊ីរ៉ាក់នោះទេ។ តាំងពីខែមករាមក ការប្រយុទ្ធរវាងក្រុមឧទ្ទាមដែលប្រជែងគ្នា នៅស៊ីរី បានសម្លាប់មនុស្សរាប់ពាន់នាក់។
ដោយសារសង្គ្រាម និងការប្រយុទ្ធគ្នាក្នុងស្រុក ស្ថានភាពមនុស្សធម៌ កាន់តែធ្លាក់ដុនដាបរៀងរាល់ថ្ងៃ។ ក្រុមសិទ្ធិមនុស្សស៊ីរី ប្រាប់ថា ប្រជាជនភាគច្រើនព្យាយាមភៀសខ្លួនពីតំបន់ដែលអាជ្ញាធរគ្រប់គ្រង និងក្នុងតំបន់ផ្សេងៗនៅខេត្តឌែរ អេហ្សរ ភាគខាងកើត។ អង្គការសហប្រជាជាតិបានរិះគន់ថា ពិបាកចូលទៅជួយប្រជាជនស៊ីវិល រងគ្រោះ ដល់កន្លែងផ្ទាល់។ ម្សិលមិញ ប្រធានាធិបតីស៊ីរីបានអំពាវនាវអោយអាជ្ញាធរទទួលបន្ទុកជំនួយ ធ្វើការសហការអោយបានខ្លាំងក្លាជាមួយអង្គការក្នុងស្រុក និងអង្គការអន្តរជាតិ ដើម្បីអាចអោយប្រជាជនបានទទួលជំនួយ។
ដោយឡែក នៅភាគកណ្តាលស៊ីរី ការចរចារវាងអាជ្ញាធរខេត្តហូម និងក្រុមឧទ្ទាម ទាក់ទងនឹងការដកថយរបស់ក្រុមឧទ្ទាម ចេញពីតំបន់ផ្សេងៗ បានឈានដល់ដំណាក់កាលបញ្ចប់ហើយ។ កិច្ចព្រមព្រៀងមួយផ្នែកក្នុងកិច្ចចរចានេះ និយាយពីការដោះលែងមន្ត្រីជនជាតិអ៊ីរ៉ង់ នៅក្រុងអាឡិប។ ភាគីចរចាទាំង២ត្រូវរកដំណោះស្រាយសន្តិភាព ធ្វើយ៉ាងណា ធានាអោយបានសុវត្ថិភាពសន្តិសុខ។
សង្គ្រាមរ៉ាំរ៉ៃជាង៣ឆ្នាំមកនេះ បានសម្លាប់មនុស្សជាង១សែន៥ម៉ឺននាក់ នៅស៊ីរី។ ប្រធានាធិបតីអាសាដ នៅតែចង់បន្តដឹកនាំប្រទេស ដោយបានប្រកាសឈរឈ្មោះជាបេក្ខជនសម្រាប់ការបោះឆ្នោតប្រធានាធិបតី ដែលត្រូវរៀបចំនៅថ្ងៃ៣មិថុនាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ