ការហាមប្រាមអ្នកសហជីពចូលជួបលោក វ៉ន ពៅ គឺជារឿងនយោបាយ
សកម្មជនសិទ្ធិមនុស្ស និងអ្នកសហជីពបានរិះគន់អ្នកគ្រប់គ្រងពន្ធនាគារ ដែលបានហាមឃាត់មិនឲ្យសហការី និងមិត្តភក្តិ ចូលសួរសុខទុក្ខលោក វ៉ន ពៅ ដែលកំពុងជាប់ពន្ធនាគារត្រពាំងផ្លុង។ ក្រុមសកម្មជនបានហៅការឃាត់ឃាំងនេះ ពាក់ព័ន្ធទៅនឹងរឿងនយោបាយ ខណៈដែលមន្ត្រីជាន់ខ្ពស់ ខាងពន្ធនាគារ ប្រាប់ថាករណីលោក វ៉ន ពៅ កំពុងស្ថិតនៅក្នុងដំណាក់កាលស៊ើបអង្កេត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
សកម្មជនសិទ្ធិមនុស្ស និងអ្នកសហជីពបានរិះគន់អ្នកគ្រប់គ្រងពន្ធនាគារដែលបានហាមឃាត់ មិនឲ្យសហការី និងមិត្តភក្តិចូលសួរសុខទុកលោក វ៉ន ពៅ ដែលកំពុងជាប់ពន្ធនាគារ ត្រពាំងផ្លុង។ ក្រុមសកម្មជនបានហៅ ការឃាត់ឃាំងនេះ ថាពាក់ព័ន្ធទៅនឹងរឿងនយោបាយ ខណៈដែលមន្ត្រីជាន់ខ្ពស់ខាងពន្ធនាគារ ប្រាប់ថា ករណីលោក វ៉ន ពៅ កំពុងស្ថិតនៅក្នុងដំណាក់កាលស៊ើបអង្កេត។
បន្ទាប់ពីគណបក្សប្រឆាំង ប្រតិភូនៃសហភាពការងារកម្ពុជាដែលគ្របដណ្តប់ទៅលើសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធរបស់លោកវ៉ន ពៅ ត្រូវបានពន្ធនាគារបដិសេធមិនឲ្យចូលជួបសួរសុខទុក្ខក្នុងនាមជាសហការី និងមិត្តភ័ក្តិ។
លោក អាត់ ធន់ ដែលបានដឹកនាំប្រតិភូសហជីពចំនួន៩ទៅកាន់ពន្ធនាគារត្រពាំងផ្លុង ខេត្តកំពង់ចាម កាលពីម្សិលមិញ បានថ្លែងថា លោក មានការហួសចិត្ត ដែលលោកនិងសហការីឯទៀត មិនត្រូវបានអនុញ្ញាតឲ្យជួប លោក វ៉ន ពៅ បាន។ មេដឹកនាំសហជីពរូបនេះ ឲ្យដឹងទៀតថា លោកសោកស្តាយ ដែលលោក វ៉ន ពៅ ត្រូវបានដកហូតសិទ្ធិ នៅពេលដែលមិនទានបានកាត់ក្តីផងនោះ។
ជាមួយគ្នានេះ មន្ត្រីស៊ើបអង្កេតជាន់ខ្ពស់អង្គការការពាសិទ្ធិមនុស្សលីកាដូ លោក អំ សំអាត បានថ្លែងថាលោកវ៉ន ពៅ នៅតែមានសិទ្ធិប្រាស្រ័យទាក់ទងជាមួយមិត្តភក្តិ សាច់ញាតិដូចពលរដ្ឋខ្មែរដទៃដែរ ថ្វីដ្បិតតែគាត់ត្រូវគេចាត់ទុកថា ជាជនសង្ស័យមួយរូបនោះ។ លោក អំ សំអាត បន្តថាទំនាក់ទំនងជាមួយនឹងមិត្តភ័ក្តនៅក្នុងការសួរសុខទុក្ខ វាមិនប៉ះពាល់ទៅដល់នីតិវិធីនៃការស៊ើបអង្កេតនោះទេ។ លោកថា ជាការព្យាយាមភ្ជាប់ទៅនឹងហេតុផលនយោបាយមួយនៅក្នុងរឿងនេះ។
សូមបញ្ជាក់ថា កាលពីថ្ងៃសុក្រទី២៤ ខែមករា លោក គុយ ប៊ុនសន អគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ បានប្រាប់ទៅកាន់មេដឹកនាំសហជីពនៃសហភាពការងារកម្ពុជា របស់លោក អាត់ ធន់ ថាករណីលោក វ៉ន ពៅ កំពុងស្ថិតនៅក្នុងដំណាក់កាលស៊ើបអង្កេតរបស់ស្ថាប័នតុលាការ ដូចនេះក្រៅពីគ្រួសារ និងមេធាវីរបស់ជនជាប់ឃុំ មិនអាចអនុញ្ញាតអោយអ្នកដទៃចូលជួបឡើយ។
យោងតាមមន្ត្រីឃ្លាំមើលសិទ្ធិមនុស្សលីកាដូ ស្ថានភាពសុខភាពរបស់អ្នកជាប់ឃុំ ចំនួន២៣នាក់ មានខ្លះធូរស្រាល ហើយខ្លះទៀត ស្ថិតនៅក្នុងសភាពរបួសនៅឡើយ។ ដោយឡែក លោក វ៉ន ពៅ នៅតែមានបញ្ហាសុខភាពដដែល ដោយសារជម្ងឺចាស់របស់គាត់ដែលបានវះកាត់ បានរើឡើងវិញ។ ក៏ប៉ុន្តែ លោក វ៉ន ពៅ ត្រូវបានមន្ត្រីពន្ធនាគារដាក់ឲ្យស្ថិតនៅកន្លែងដែលមានការការពារសុខភាព នៅក្នុងពន្ធនាគារ។
សូមរំលឹកថា ក្នុងចំណោមអ្នកជាប់ពន្ធនាគារទាំង២៣នាក់ មាន១០នាក់ ក្នុងនោះមានលោក
វ៉នពៅផង ត្រូវបានចាប់ខ្លួននៅខាងក្រៅរោងចក្រកាត់ដេរ យ៉ាក់ជីន (YaKjin) កាលពីថ្ងៃទី២ ខែមករា ចំណែកឯ១៣នាក់ផ្សេងទៀត ត្រូវបានចាប់ខ្លួន បន្ទាប់ពីមាន សកម្មភាពគប់ដុំថ្មជាមួយកម្លាំងកងរាជអាវុធហត្ថ នៅមុខសួនឧស្សាហកម្មកាណាឌីយ៉ា កាលពីថ្ងៃទី៣ ខែមករា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ