តុលាការចាប់ផ្តើមជំនុំជម្រះអ្នកផលិតគ្រឿងផ្ទុះ
ការជំនុំជម្រះទោសលើជន អ៊ូម៉ារ ប៉ាតិក (Umar Patek) ទើបបានចាប់ផ្តើមហើយនៅព្រឹកថ្ងៃចន្ទ១៣កុម្ភៈនៅតុលាការក្រុងហ្សាកាតា។ ជនអ៊ីស្លាមនិយមជ្រុលមួយនេះដែលស្និទ្ធនឹងចលនាភេរវនិយមអាល់កៃដានិងក្រុមភេរវនិយមអ៊ីស្លាមជ្រុលនិយមនៅអាស៊ីអាគ្នេយ៍ Jemaah Islamiyah ជាប់សង្ស័យពីបទបានផលិតគ្រឿងផ្ទុះ ប្រើប្រាស់នៅក្នុងអំពើភេរវកម្មមួយដ៏កាចសាហាវបំផុតនៅទីក្រុងបាលីនៅឆ្នាំ ២០០២ ដែលឥណ្ឌូនេស៊ីពុំធ្លាប់ជួបប្រទះឡើយនៅក្នុងប្រវត្តិសាស្រ្តរបស់ខ្លួននិងដែលបានសម្លាប់ជីវិតមនុស្សចំនួនជាង២០០នាក់ក្នុងចំណោមនោះភាគច្រើនជាជនជាតិបរទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ប្រកបដោយទឹកមុខសើចសប្បាយរីករាយខ្លាំងនិងមេដៃទាំងពីរលើកឡើងជាសញ្ញាបញ្ជាក់សេចក្តីក្លាហាន អ៊ូម៉ារប៉ាតិក (Umar Patek) បាន លេចបង្ហាញខ្លួននៅច្រកចូលខាងលិចនៃតុលាការ ក្រុងហ្សាកាតាដើម្បី ការជំនុំជម្រះទោសដ៏ធំបំផុតចុងក្រោយគេលើរូបជនអ៊ីស្លាមនិយមជ្រុលរូបនេះ បន្ទាប់ពី ការប្រហារជីវិតនិងដាក់ឃុំឃាំងក្នុងពន្ធនាគារ ពួកភេរវជនជាច្រើននៅអំឡុងពេលប៉ុន្មានឆ្នាំចុងក្រោយនេះ។
ទុកពុកចង្កាតាមប្រពៃណីនិងពាក់មួកសំរាប់សូត្រធម៌តាមសាសនាអ៊ីស្លាម អ៊ូម៉ារប៉ាតិក បានមកដល់តុលាការ តាមរថយន្តពាសដែកមួយគ្រឿងដែលជាវិធានការសន្តិសុខដ៏សំខាន់បំផុតសំរាប់ការកាត់ទោសនេះដែលគ្រោងទុករយៈពេលជាង៤ខែ។
នៅថ្ងៃជំនុំជម្រះ គេពុំឃើញ មានបាតុកម្ម ឬ ក៏ ការប្រជុំបក្សព័ន្ធណាមួយឡើយ ដែលខុសផ្ទុយពីការជំនុំជម្រះស្រដៀងគ្នានេះនៅក្នុងអតីតកាល។ គេគ្រាន់តែឮសូរពាក្យស្រែក ពីរឬបីម៉ាត់ប៉ុណ្ណោះ គឺ « Allah Akbar « ជាពាក្យ លើកតម្កើងព្រះជាម្ចាស់តាមបែបសាសនាអ៊ីស្លាម នៅក្នុងចំណោមសាធារណជន នៅពេលចប់សវនាការលើកទីមួយដែលមានរយៈពេលដ៏ខ្លីនៅព្រឹកមិញនេះ ។ សវនាការនាព្រឹកមិញនេះ គ្រាន់តែឧទ្ទិសចំពោះ ការអាន ខ ចោទប្រកាន់ធំៗរបស់តុលាការ ទៅលើរូប អ៊ូម៉ារ ប៉ាតិក។
អាចនឹងត្រូវជាប់ទោសប្រហារជីវិត អ៊ូម៉ារ ប៉ាតិក បានទទួលស្គាល់ដែរ ថាខ្លួនបានជួយចូកជួយចែវក្នុងការផលិតគ្រឿងផ្ទុះនានា ដែលបានធ្វើឲ្យឆេះអន្តរាយនៅទីកន្លែង Pub ភេសជ្ជដ្ឋានមួយនិងរង្គសាលរាំរែកនៅទីឆ្នេរជលសា Kuta លើកោះបាលីកាលពិថ្ងៃទី១២តុលា២០០២។
មិនតែប៉ុណ្ណោះ ប៉ាតិក ក៏ត្រូវជាប់ចោទផងដែរ ពីបទ បានផលិតគ្រាប់បែកច្នៃ ដែលត្រូវបានលួចបង្កប់នៅក្នុងកាដូនាពេលបុណ្យណូអែលនិងបានបណ្តាលឲ្យមនុស្សស្លាប់១៩នាក់នៅក្នុងព្រះវិហារគ្រិស្តសាសនា នានានៅថ្ងៃទី២៤ធ្នូឆ្នាំ ២០០០ ក៏ព្រមទាំងបានចូលរួមចំណែកក្នុងការចាត់តាំងឡើង បណ្តាញអាល់កៃដា តូចមួយនៅឥណ្ឌូនេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ