និស្សិតខ្មែរមួយក្រុមនាំគ្នាចោទសំណួរស្តីបន្ទោសលោកស៊ូបេឌីក្នុងវេទិកាសាធារណៈ
ព្រឹត្តិការណ៍នៃការបញ្ចេញមតិរបស់ក្រុមនិស្សិតប្រឆាំងនឹង លោកស៊ូរិយ៉ា ស៊ូបេឌី អ្នករាយការណ៍ពិសេសរបស់អ.ស.ប. នៅសកលវិទ្យាល័យមេគង្គកម្ពុជា កាលពីល្ងាចថ្ងៃអង្គារម្សិលមិញ បានធ្វើអោយមានការភ្ញាក់ផ្អើលដល់អ្នកសង្កេតការណ៍នយោបាយកម្ពុជា។ ក្រុមសង្គមស៊ីវិលមួយចំនួនបានលើកឡើងដូចគ្នាអំពីភាពក្លាហានរបស់យុវជនខ្មែរក្នុងការបញ្ចេញមតិតតាំង អំពីបញ្ហាសិទ្ធិមនុស្សនោះ។ ប៉ុន្តែ តំណាងសង្គមស៊ីវិលទាំងនោះក៏ថ្លែងផងដែរថា ពួកគេសង្ឃឹមថា សកម្មភាពរបស់ក្រុមនិស្សិតទាំងនោះ មិនបានជាប់ពាក់ព័ន្ធនឹងនយោបាយ។
ចុះផ្សាយនៅថ្ងៃ៖
ស្តាប់ - ០២:២៨
វេទិកាដែលគ្រោងសម្រាប់ការជជែកពិភាក្សាគ្នា រវាងក្រុមនិស្សិត និងអ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស៊ូរិយ៉ា ប្រាសាទ ស៊ូបេឌី អំពីបញ្ហាប្រកួតប្រជែងផលប្រយោជន៍ក្នុងច្បាប់វិនិយោគបរទេសនោះ បានក្លាយទៅជាវេទិកានៃការសំដែងមតិរបស់និស្សិតមួយក្រុម ដែលស្រែកថា កម្ពុជាមិនត្រូវការអ្នករាយការណ៍ពិសេសនេះទៅវិញ។ ក្រៅពីសួរសំនួរដែលមានន័យស្តីបន្ទោសលោកស៊ូបេឌីថាបានធ្វើរបាយការណ៍បង្អាប់កម្ពុជា ក្រុមនិស្សិតមួយចំនួនក៏បានលើកបដាប្រឆាំងវត្តមានរបស់លោកផងដែរ។
ក្រុមសង្គមស៊ីវិលមួយចំនួនបានអត្ថាធិប្បាយលើទិដ្ឋភាពនេះថា ជាភាពក្លាហានរបស់ក្រុមនិស្សិតដែលហ៊ានសម្តែងមតិ និងចំណាប់អារម្មណ៍របស់ខ្លួន។ ប៉ុន្តែតំណាងអង្គការក្រៅរដ្ឋាភិបាលទាំងនោះក៏បានសម្តែងការព្រួយបារម្ភផងដែរ ខ្លាចថា សកម្មភាពរបស់យុវជននេះអាចត្រូវបានរៀបចំដោយក្រុមអ្នកនយោបាយទៅវិញ។ នេះក៏ជាមតិរបស់ លោកសុខ សំអឿន ប្រធានអង្គការក្រុមអ្នកច្បាប់ការពារសិទ្ធិកម្ពុជាផងដែរ។ មេធាវីរូបនេះបានពន្យល់ថា ការសម្តែងមតិរបស់យុវជនគឺជារឿងមួយដ៏គួរអោយលើកទឹកចិត្ត ប៉ុន្តែ លោកចាប់អារម្មណ៍ថា ទិដ្ឋភាពនៃការសួរចំអករបស់ក្រុមនិស្សិតទៅលើលោកស៊ូបេឌី បានកើតឡើងផ្ទួនគ្នាជាមួយក្រុមអ្នករត់ម៉ូតូឌុបដែលបានធ្វើបាតុកម្មប្រឆាំងលោកស៊ូបេឌីដែរ។
នៅពេលដែលក្រុមនិស្សិតស្រែកថា កម្ពុជាមិនត្រូវការអ្នករាយការណ៍ពិសេសរបស់អង្គការសហប្រជាជាតិនោះ លោកសុខ សំអឿន ឆ្លើយតបថា ប្រសិនបើកម្ពុជាមានសុវត្ថិភាព និងស្ថេរភាពនយោបាយពេញលេញហើយនោះ កម្ពុជាពិតជាមិនត្រូវការអ្នករាយការណ៍ពិសេសនេះមែន។
លោកយ៉ង់ គីមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍនិងសន្តិភាព ក៏បានលើកឡើងអំពីភាពក្លាហានរបស់និស្សិតខ្មែរដែរ ប៉ុន្តែ លោកយ៉ង់ គីមអេង បញ្ជាក់ថា ភាពក្លាហាននេះ ហាក់មិនបានប្រើប្រាស់ចំពេលដ៏ល្អទៅវិញ។ ចំពោះលោកយ៉ង់ គីមអេង ក្រុមនិស្សិតគួរតែយកឱកាសនេះពិភាក្សា និងរៀនពីទ្រឹស្តីនិងបទពិសោធន៍របស់អ្នកជំនាញច្បាប់ ទើបជាការប្រសើរជាង។ តំណាងសង្គមស៊ីវិលរូបនេះ បារម្ភខ្លាចថា សកម្មភាពរបស់ក្រុមនិស្សិតនៅពេលនេះ ធ្វើអោយប៉ះពាល់ដល់មុខមាត់របស់កម្ពុជាទៅវិញ។
មន្ត្រីស៊ើបអង្កេតរបស់សមាគមការពារសិទ្ធិមនុស្សអាដហុក លោកចាន់ សុវេត ថ្លែងថា កម្ពុជាពិតជាមិនមានភាពចាំបាច់ ដើម្បីត្រូវការអ្នករាយការណ៍ពិសេសមែន។ ប៉ុន្តែលោកថា កម្ពុជាក៏មិនអាចបំភ្លេចចោលទាំងស្រុងឡើយ នូវបេសកកម្មរបស់តំណាងអ.ស.ប. ដែលជាការរួមចំណែក ដើម្បីធ្វើអោយមានភាពថ្លឹងថ្លែងគ្នា រវាងរបាយការណ៍របស់រដ្ឋាភិបាល និងអង្គការសហប្រជាជាតិក្នុងវិស័យសិទ្ធិមនុស្ស។
លោកចាន់ សុវេត បញ្ជាក់ថា ប្រសិនបើមិនមានការរៀបចំជានយោបាយមែន លោកកោតសរសើរចំពោះសកម្មភាពសម្តែងមតិរបស់និស្សិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ