អតីតអគ្គនាយក IMF ត្រូវចោទប្រកាន់ពីបទប៉ុនប៉ងរំលោភនៅប៉ារីសមួយទៀត
នៅញូវយ៉ក ព័ត៌មានបានលេចឮកាន់តែច្រើន ស្តីពីការលើកលែងការចោទប្រកាន់លើលោកដូមីនិក ស្រ្តូសកាន់ អតីតអគ្គនាយកមូលនិធិរូបិយវត្ថុអន្តរជាតិ។ ប៉ុន្តែ នៅប៉ារីសឯណេះវិញ សំណុំរឿងថ្មីមួយទៀតកំពុងរង់ចាំលោកស្រ្តូសកាន់។ នារីអ្នកនិពន្ធប្រលោមលោក និងជាអ្នកកាសែតម្នាក់ទើបនឹងបានដាក់ពាក្យបណ្តឹង ចោទប្រកាន់លោកស្រ្តូសកាន់ពីបទប៉ុនប៉ងរំលោភសេពសន្ថវៈ។ ក៏ប៉ុន្តែ ហេតុការណ៍នេះបានកើតឡើងតាំងពីឆ្នាំ២០០៣ម៉្លេះ។ មន្រ្តីដែលស្និទ្ធិនឹងលោកស្រ្តូសកាន់សង្ស័យថា នេះគឺជាគម្រោងការណ៍របស់គណបក្សកាន់អំណាច ដើម្បីរារាំងលោកស្រ្តូសកាន់មិនឲ្យចូលប្រកួតប្រជែងក្នុងការបោះឆ្នោតប្រធានាធិបតី នៅឆ្នាំក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៣៣
ទ្រីស្តាន់ បាណុង (Tristane Banon) អាយុ ៣២ឆ្នាំ ជាអ្នកនិពន្ធប្រលោមលោក និងជាអ្នកកាសែត បានចោទប្រកាន់លោកដូមីនិក ស្រ្តូសកាន់ (Dominique Strauss-Kahn) ថាបានប៉ុនប៉ងចាប់រំលោភគាត់ នៅពេលដែលគាត់សុំជួបសម្ភាសន៍ កាលពីឆ្នាំ២០០៣។ អយ្យការអមតុលាការព្រហ្មទណ្ឌក្រុងប៉ារីសបានឲ្យដឹងថា គេបានទទួលពាក្យបណ្តឹងរបស់ទ្រីស្តាន់ បាណុង ហើយ នៅថ្ងៃពុធនេះ ហើយរដ្ឋអាជ្ញាកំពុងតែពិនិត្យពាក្យបណ្តឹងនេះ។
យោងតាមក្រមព្រហ្មទណ្ឌបារាំង បទរំលោភសេពសន្ថវៈមានអាជ្ញាយុកាល ១០ឆ្នាំ។ ដូច្នេះ បណ្តឹងរបស់ទ្រីស្តាន់ បាណុង នៅមិនទាន់ផុតអាជ្ញាយុកាលនៅឡើយទេ។ ក៏ប៉ុន្តែ អ្នកច្បាប់ភាគច្រើនយល់ថា បណ្តឹងនេះទំនងជាមិនត្រូវតុលាការលើកយកមកចាត់ការទេ ពីព្រោះ ហេតុការណ៍បានកើតឡើងតាំងពី៨ឆ្នាំមុន ពិបាកក្នុងការស្វែងរកភស្តុតាងមកបញ្ជាក់ (ដូចជា ADN ជាដើម) ហើយនៅកន្លែងកើតហេតុ មិនមានខ្សែអាត់វីដេអូ ឬសាក្សី ដែលបានឃើញហេតុការណ៍ផ្ទាល់ភ្នែក។ ម្យ៉ាងវិញទៀត បទប៉ុនប៉ងរំលោភ គឺជាបទល្មើស ដែលពិបាកក្នុងការកំណត់។
មេធាវីរបស់លោកស្រ្តូសកាន់បានប្រកាសថា នឹងដាក់ពាក្យបណ្តឹងតបនឹងទ្រីស្តាន់ បាណុងវិញ ពីបទប្តឹងបរិហារបង្កាច់កេរ្តិ៍។ យោងតាមក្រមព្រហ្មទណ្ឌបារាំង បទល្មើសនេះអាចនឹងត្រូវផ្តន្ទាទោសដាក់ពន្ធនាគាររយៈពេល ៥ឆ្នាំ និងពិន័យជាប្រាក់ ៤៥ ០០០អឺរ៉ូ។
នៅពេលនេះ សំណួរជាច្រើនត្រូវបានគេចោទសួរជុំវិញបណ្តឹងរបស់ទ្រីស្តាន់ បាណុង។ ហេតុអ្វីបានជាគាត់មិនដាក់ពាក្យប្តឹងភ្លាមៗ ក្រោយពីមានហេតុការណ៍? ហេតុអ្វី ៨ឆ្នាំក្រោយមកទើបដាក់ពាក្យប្តឹង? ហេតុអ្វីដាក់ពាក្យប្តឹង នៅចំពេលដែលតុលាការក្រុងញូវយ៉កដោះលែងលោកស្រ្តូសកាន់ឲ្យនៅក្រៅឃុំ ហើយកំពុងតែពិចារណាលើកលែងការចោទប្រកាន់លើរូបគាត់?
មន្រ្តីស្និទ្ធនឹងលោកស្រ្តូសកាន់ជាច្រើនបានបង្ហាញនូវការសង្ស័យថា នេះជាគម្រោងការរបស់គណបក្សកាន់អំណាច ដើម្បីរារាំងលោកស្រ្តូសកាន់មិនឲ្យចូលរួមប្រកួតប្រជែងក្នុងការបោះឆ្នោតប្រធានាធិបតី នៅឆ្នាំក្រោយ។ គេកាន់តែមានការសង្ស័យខ្លាំងឡើងថែមទៀត ដោយដឹងថា ទ្រីស្តាន់ បាណុង ដែលជាដើមបណ្តឹង គឺជាអ្នកកាសែត ដែលធ្វើការឲ្យកាសែតស្និទ្ធនឹងគណបក្សរបស់លោកនីកូឡា សាកូហ្ស៊ី។
គួរបញ្ជាក់ថា នៅមុនពេលប៉ូលិសចាប់ខ្លួននៅញូវយ៉ក លោកដូមីនិក ស្រ្តូសកាន់ ត្រូវបានគេមើលឃើញថា ជាអ្នកនយោបាយ ដែលមានប្រជាប្រិយភាពខ្ពស់ជាងគេ ក្នុងការប្រជែងយកតំណែងប្រធានាធិបតីបារាំងពីលោកសាកូហ្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ