ទីភ្នាក់ងារStandard & Poor’sព្រមានបញ្ចុះចំណាត់ថ្នាក់បារាំង
ទីភ្នាក់ងារវាយតម្លៃហានិភ័យបំណុល Standard & Poor’s បានព្រមានបារាំងកាលពីថ្ងៃសុក្រទី ១០ តុលាថា បារាំងនឹងអាចបាត់បង់ចំណាត់ថ្នាក់មួយកម្រិតទៀត បើសិនបារាំងមិនចាត់វិធានការម៉ត់ចត់ដើម្បីជំរុញកំណើនសេដ្ឋកិច្ចរបស់ខ្លួន ឡើងវិញ។ បន្ទាប់ពីទីភ្នាក់ងារ Standard & Poor’s អឺរ៉ុបវិញបានបន្ទោសផងដែរទីក្រុងប៉ារីសពីការខកខានមិនបានធ្វើកំណែទម្រង់ដែលសមស្របនឹងឱនភាពសេដ្ឋកិច្ចដែលបារាំងកំពុងជួបប្រទះបច្ចុប្បន្ន។
ចុះផ្សាយនៅថ្ងៃ៖
ស្តាប់ - ០១:៤៣
នៅក្នុងថ្ងៃតែមួយ បារាំងបានទទួលដំណឹងមិនសូវល្អសម្រាប់សេដ្ឋកិច្ចរបស់ខ្លួន។ កាលពីថ្ងៃសុក្រ ទីភ្នាក់ងារវាយតម្លៃហានិភ័យ Standard & Poor’s របស់អាមេរិកបានប្រកាសរក្សាចំណាត់ថ្នាក់របស់បារាំង ត្រឹមAA គឺមិនទម្លាក់ចំណាត់ថ្នាក់បារាំងភ្លាមៗទេ ប៉ុន្តែ គេបានកែតម្រូវទស្សនវិស័យទៅវិញ ដោយចាត់ទុកបារាំងកំពុងស្ថិតនៅក្នុងដំណាក់កាលអវិជ្ជមាន។ អវិជ្ជមានមានន័យថា បារាំងពិបាកនឹងសង្ឃឹមរក្សាចំណាត់ថ្នាក់ A ពីរដងរបស់ខ្លួន នៅក្នុងរយៈពេល២ឆ្នាំខាងមុខ។
Standard & Poor’s ធ្លាប់បានទម្លាក់ចំណាត់ថ្នាក់បារាំង ពីA បីដង មិនត្រឹមA ពីរដង ម្តងហើយ នៅដើមឆ្នាំ ២០១២។ សម្រាប់ទីភ្នាក់ងារវាយតម្លៃហានិភ័យមួយនេះ គេចាត់ទុកបារាំងនៅក្នុងដំណាក់កាលអវិជ្ជមាន ព្រោះដោយមើលទៅលើស្ថានភាពហិរញ្ញវត្ថុសាធារណៈរបស់ប្រទេសមួយនេះ។ ឱនភាពថវិការបស់បារាំងកាន់តែចុះអាក្រក់ ជាងការគ្រោងទុក ក្នុងពេលដែលវិធានការរបស់រដ្ឋាភិបាលបារាំង ដើម្បីរកប្រាក់ចំណូលក៏នៅខ្សត់ខ្សោយ។ មួយវិញទៀត តាមទីភ្នាក់ងារវាយតម្លៃហានិភ័យ Standard & Poor’s គេមិនសូវជឿទុកចិត្តទៅលើភាពរឹងមាំសេដ្ឋកិច្ចរបស់បារាំង ដោយសារតែរដ្ឋាភិបាលបារាំងពន្យារនយោបាយដែលមានទិសដៅរក្សាកម្រិតប្រាក់បំណុលបារាំងឲ្យនៅនឹងថេរ។
នៅក្នុងពេលដែលសេដ្ឋកិច្ចបារាំងកំពុងជួបវិបត្តិ រដ្ឋាភិបាលបានប្រកាសធ្វើកំណែទម្រង់ថវិកាសម្រាប់ឆ្នាំ ២០១៥។ គឺជានយោបាយរឹតត្បិតថវិកា យ៉ាងតឹងរ៉ឹងដែលក្នុងនោះមានការកាត់បន្ថយចំណាយសាធារណៈយ៉ាងសម្បើម។ កំណែទម្រង់របស់រដ្ឋាភិបាលមានទិសដៅជំរុញកំណើនសេដ្ឋកិច្ច និងធ្វើឲ្យហិរញ្ញវត្ថុសាធារណៈល្អប្រសើរឡើងវិញ។ ប៉ុន្តែ តាមអ្នកជំនាញរបស់ទីភ្នាក់ងារវាយតម្លៃហានិភ័យ គេពិបាកនឹងជឿថា បារាំងនឹងអាចធ្វើតាមការសន្យារបស់ខ្លួន។ មួយវិញទៀត ដោយសារកំណែទម្រង់តឹងរ៉ឹង ដែលមិនធ្លាប់មាននៅបារាំង រដ្ឋាភិបាលអាចប្រឈមនឹងការងើបប្រឆាំងពីសង្គមប្រជាជនបារំាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ