កូរ៉េខាងត្បូងអាចនឹងជម្លៀសពលរដ្ឋចេញពីតំបន់ឧស្សាហកម្ម Kaesong នៅកូរ៉េខាងជើង
រដ្ឋមន្រ្តីកូរ៉េខាងត្បូង ទទួលបន្ទុកកិច្ចការបង្រួបបង្រួមកូរ៉េ បានប្រកាសឲ្យដឹង នៅថ្ងៃសុក្រនេះថា កូរ៉េខាងត្បូងអាចនឹងធ្វើការជម្លៀសពលរដ្ឋរបស់ខ្លួនចេញពីតំបន់ឧស្សាហកម្ម Kaesong ដែលស្ថិតក្នុងទឹកដីកូរ៉េខាងជើង ប្រសិនបើមើលទៅឃើញថាមានចោទជាបញ្ហាសុវត្ថិភាពដល់ពួកគេ។ ក៏ប៉ុន្តែ មន្រ្តីរដ្ឋាភិបាលរូបនេះក៏បានបញ្ជាក់ផងដែរថា នៅពេលនេះ កូរ៉េខាងត្បូងនៅមិនទាន់មើលឃើញមានស្ថានភាពចាំបាច់តម្រូវឲ្យមានការជម្លៀសនេះនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
រដ្ឋមន្រ្តីទទួលបន្ទុកកិច្ចការបង្រួបបង្រួមកូរ៉េបានបញ្ជាក់ឲ្យដឹងថា ការជម្លៀសពលរដ្ឋកូរ៉េខាងត្បូង ចេញពីតំបន់ឧស្សាហកម្ម Kaesong នឹងត្រូវធ្វើឡើង ដោយមានការពិគ្រោះយោបល់ជាមុន ជាមួយនឹងក្រុមហ៊ុនកូរ៉េខាងត្បូង ទាំង ១២៣ ដែលមានរោងចក្រ ឬការិយាល័យ នៅក្នុងតំបន់ឧស្សាហកម្មនេះ។
គួរបញ្ជាក់ថា តំបន់ឧស្សាហកម្ម Kaesong ស្ថិតនៅក្នុងទឹកដីកូរ៉េខាងជើង ក្នុងចម្ងាយប្រមាណជា ១០គីឡូម៉ែត្រ ពីព្រំដែន។ តំបន់ឧស្សាហកម្មនេះ ត្រូវបានបង្កើតឡើង កាលពីឆ្នាំ២០០៤ ហើយជាប្រភពចំណូលដ៏សំខាន់មួយ សម្រាប់រដ្ឋាភិបាលក្រុងព្យុងយ៉ាង។ ក៏ប៉ុន្តែ ជារឿយៗ នៅពេលដែលមានភាពតានតឹងកើតឡើង កូរ៉េខាងជើងតែងតែគំរាមបិទតំបន់ឧស្សាហកម្មនេះ ហើយមានពេលខ្លះ ថែមទាំងបានរារាំងមិនឲ្យបុគ្គលិកកូរ៉េខាងត្បូង វិលត្រឡប់ចូលទៅប្រទេសរបស់គេវិញទៀតផង។
នៅពេលនេះ បើទោះបីជាកូរ៉េខាងជើងបានប្រកាសគំរាមវាយប្រហារដោយអាវុធនុយក្លេអ៊ែរ និងបានប្រកាសដាក់ទំនាក់ទំនងរវាងកូរ៉េទាំងពីរឲ្យស្ថិតក្នុងស្ថានភាពសង្រ្គាម ក៏ប៉ុន្តែ តំបន់ឧស្សាហកម្ម Kaesong នៅតែបន្តដំណើរការ។ កូរ៉េខាងជើងបានបិទច្រកព្រំដែន មិនឲ្យបុគ្គលិកកូរ៉េខាងត្បូងចូលទៅធ្វើការនៅ Kaesong ក៏ប៉ុន្តែ ការធ្វើដំណើរចេញពី Kaesong ចូលទៅក្នុងទឹកដីកូរ៉េខាងត្បូងមិនត្រូវបានរារាំងនោះទេ។
យោងតាមរដ្ឋាភិបាលក្រុងសេអ៊ូល គិតមកទល់នឹងថ្ងៃសុក្រនេះ នៅមានពលរដ្ឋកូរ៉េខាងត្បូង ចំនួន ៦០៨នាក់ ដែលកំពុងស្ថិតនៅក្នុងតំបន់ឧស្សាហកម្ម Kaesong ក្នុងនោះ មាន ១០០នាក់ គ្រោងនឹងចេញពី Kaesong ចូលមកក្នុងទឹកដីកូរ៉េខាងត្បូង នៅថ្ងៃសៅរ៍ស្អែក។
ទាក់ទងនឹងគម្រោងជម្លៀសពលរដ្ឋកូរ៉េខាងត្បូងចេញពីតំបន់ឧស្សាហកម្ម Kaesong នេះ រដ្ឋមន្រ្តីទទួលបន្ទុកកិច្ចការបង្រួបបង្រួមកូរ៉េ មិនបានបញ្ជាក់ថា នឹងត្រូវធ្វើក្នុងទ្រង់ទ្រាយបែបណានោះទេ។ ក៏ប៉ុន្តែ កន្លងមក រដ្ឋមន្រ្តីក្រសួងការពារជាតិកូរ៉េខាងត្បូងធ្លាប់បានលើកឡើង កាលពីដើមសប្តាហ៍កន្លងទៅនេះថា កូរ៉េខាងត្បូងបានរៀបចំផែនការត្រៀមទុករួចជាស្រេចហើយ ដើម្បីជម្លៀសពលរដ្ឋចេញពីតំបន់ឧស្សាហកម្ម Kaesong ហើយការជម្លៀសនេះនឹងត្រូវធ្វើតាមផ្លូវយោធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ