អ្នករាយការណ៍ពិសេសផ្តើមទស្សនកិច្ច ដោយជួបជាមួយសហគមន៍
នៅព្រឹកថ្ងៃចន្ទនេះ ប្រជាសហគមន៍នានា ព្រមទាំងតំណាងសហជីព និងព្រះសង្ឃផងផងបានប្រមូលគ្នាទៅជួបអ្នករាយការណ៍ពិសេសនៃអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាតែម្តង។ នៅពីមុខការិយាល័យឧត្តមស្នងការសិទ្ធិមនុស្ស ក្នុងសង្កាត់បឹងកេងកង១ ក្រុមប្រជាសហគមន៍បាននាំយកញត្តិជូន លោក ស៊ូរិយ៉ា ប្រាសាទ ស៊ូបេឌី ដើម្បីស្នើអោយ លោក ជួយអន្តរាគមន៍ទាមទារអោយមានការដោះលែងអ្នកការពារសិទ្ធិមនុស្ស និងបាតុករ ដែលត្រូវបានចាប់ខ្លួន និងឃុំខ្លួនដោយសាលាដំបូងរាជធានីភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ដំណើរទស្សនកិច្ចរបស់លោក ស៊ូរិយ៉ា ប្រាសាទ ស៊ូបេឌី នៅកម្ពុជាកំពុងតែហ៊ុំព័ទ្ធដោយញត្តិ និងការស្នើសុំជាច្រើន។ នៅព្រឹកថ្ងៃចន្ទនេះ ក្រុមប្រជាសហគមន៍នានា រួមទាំងព្រះសង្ឃ និងតំណាងសហជីពផងបានទៅដល់ការិយាល័យឧត្តមស្នងការសិទ្ធិមនុស្សនៃអង្គការសហប្រជាជាតិ ហើយបានដាក់ញត្តិរបស់ពួកគេទៅអ្នករាយការណ៍ពិសេស។ ញត្តិរបស់តំណាងសហគមន៍ ស្វែងរកជំនួយរបស់លោក ស៊ូបេឌី ក្នុងអន្តរាគមន៍ដោះលែងអ្នកការពារសិទ្ធិមនុស្ស តំណាងសហជីព និងកម្មករដែលត្រូវបានចាប់ខ្លួនក្នុងពន្ធនាគារ ទាំងអស់មានចំនួន២៣នាក់។
អ្នករាយការណ៍ពិសេសក៏បានចេញមកទទួលយកញត្តិរបស់តំណាងសហគមន៍ដែលបានកាន់លើកបដាទាមទារអោយដោះលែងលោកវន ពៅ និងតំណាងសហជីព និងកម្មករជាង២០នាក់ផ្សេងទៀតនោះ។ អ្នករាយការណ៍ពិសេសបានប្រាប់តំណាងសហគមន៍វិញថា លោកនឹងព្យាយាមអន្តរាគមន៍ក្នុងករណីទាំងនេះ ហើយថានេះក៏ជាតួនាទីរបស់លោកដែរ។
កម្មវិធីលំអិតនៃដំណើរទស្សនកិច្ចរបស់លោកស៊ូរិយ៉ា ស៊ូបេឌីមិនត្រូវបានគេប្រាប់អោយដឹងឡើយ មុនលោកប្រកាសខ្លួនឯង តាមទំលាប់នៅក្នុងសន្និសីទកាសែត នៅពេលបិទបញ្ចប់ទស្សនកិច្ចនោះ។
ប៉ុន្តែបើតាមការបង្ហើបអោយដឹងពីក្រុមន្ត្រីនានានៃអង្គការសិទ្ធិមនុស្សក្នុងស្រុក ទស្សនកិច្ចនៅតាមតំបន់សហគមន៍ដែលមានជម្លោះដីធ្លីនានា ទំនងជាត្រូវបានគេត្រៀមនៅក្នុងកម្មវិធីរបស់លោកលោកស៊ូបេឌីនៅកម្ពុជានេះ។ នៅរសៀលថ្ងៃចន្ទនេះ លោកស៊ូបេឌី មានគម្រោងជួបជាមួយប្រធានសមាគមការពារសិទ្ធិមនុស្សអាដហុក មុននឹងលោកជួបសន្ទនាជាមួយតំណាងសង្គមនានា។ ជំនួបទាំងនេះនឹងរៀបចំធ្វើនៅក្នុងការិយាល័យនៃឧត្តមស្នងការសិទ្ធិមនុស្សក្នុងសង្កាត់បឹងកេងកង១។
គួររម្លឹកឡើងវិញថា ក្នុងដំណើរទស្សនកិច្ចលើកទី១០របស់លោកស៊ូរិយ៉ា ស៊ូបេឌីនេះ លោកស៊ូបេឌីនឹងជួបពិភាក្សាការងារជាមួយលោកនាយករដ្ឋមន្ត្រីហ៊ុន សែន ដែលលោកខកខានមិនបានជួបជាច្រើនលើករួចមកហើយ។ ជំនួបរវាងអ្នកទាំងពីរ កំពុងតែត្រូវបានតាមដានយ៉ាងខ្លាំងពីសង្គមស៊ីវិល ក្នុងបរិយាកាសតានតឹងនៃ ទំនាស់នយោបាយរវាងគណបក្សប្រឆាំង និងគណបក្សកាន់អំណាចរបស់លោកនាយករដ្ឋមន្ត្រីហ៊ុន សែនផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ