Snowden បានសុំមែន ជម្រកនយោបាយនៅរុស្ស៊ី
ការសុំនេះ ត្រូវបាន គាត់ប្រកាសឲ្យដឹង ពេលជួបនៅម៉ោង៥ល្ងាចម្សិលមិញ នៅឯសាលស្នាក់សម្រាប់ធ្វើដំណើរឆ្លងកាត់ នៃអាកាសយានដ្ឋានអន្តរជាតិ ក្រុងម៉ូស្គូ។ ក្នុងជំនួបនោះ គាត់បានអញ្ជើញឲ្យចូលរួម គឺតែតំណាង ៩នាក់ប៉ុណ្ណោះរបស់អង្គការការពារសិទ្ធិមនុស្ស រុស្ស៊ីនិងអន្តរជាតិ ដោយមិនឲ្យភ្នែកពួកអ្នកកាសែតឃើញឡើយ។
ចុះផ្សាយនៅថ្ងៃ៖
ស្តាប់ - ០១:៤៩
ជាបឋម គួររំលឹកថា គឺតាំងពីថ្ងៃទី២៣មិថុនាមក ដែលអតីតសហការី CIA ឈ្មោះ Snowden បានមកទើរ នៅឯសាល Transit នៃអាកាសយានដ្ឋានអន្តរជាតិក្រុងម៉ូស្គូ ក្រោយពីគាត់ធ្វើដំណើរពីក្រុងហុងកុងមក។ អាយុ៣០ឆ្នាំ គាត់ល្បីខាងបរិហារអាក្រាតសកម្មភាព CIA ទល់នឹងពលរដ្ឋអាមេរិកាំងផ្ទាល់ ក៏ដូចជា ទល់នឹងប្រទេសសម្ព័ន្ធមិត្តអាមេរិកាំងផងដែរ។ ម៉្លោះហើយ បានជាអាជ្ញាធរវ៉ាស៊ីនតោន ស្វែងរកចាប់ខ្លួនគាត់ ក្រោមបទចោទប្រកាន់ថា គាត់ទម្លាយឲ្យបែកការណ៍ទៅរឿងសម្ងាត់របស់រដ្ឋអាមេរិកាំង និងទាមទារពីរដ្ឋណា ដែលគាត់កំពុងស្នាក់នៅ ឲ្យធ្វើបត្យាប័ន ប្រគល់រូបគាត់ទៅ ស.រ.អា.វិញ។
តាមពិត គោលដៅអវសានរបស់គាត់ គឺសុំជម្រកជ្រកកោននៅតាមប្រទេសអាមេរិកខាងត្បូងទេតើ ដោយថែមទាំងមានប្រទេសខ្លះ នៃទ្វីបនោះ បែបយ៉ាង Venezuela Bolivie Nicaragua ត្រៀមផ្តល់ជម្រកនេះដល់គាត់ទៅផង ប៉ុន្តែ ដោយហេតុថាលិខិតឆ្លងដែនរបស់គាត់ ត្រូវបានអាជ្ញាធរអាមេរិកាំង លុបសុពលភាព ទៅហើយ បានជាគាត់មិនអាចបន្តដំណើរទៅទៀត។
លោកប្រធានាធិបតីរុស្ស៊ី ពូទីន ធ្លាប់បានលើកឡើងពីល័ក្ខខ័ណ្ឌ ដែលលោក Snowden ត្រូវ បំពេញខានមិនបាន សម្រាប់ទទួលជម្រកនយោបាយនៅរុស្ស៊ី គឺគាត់ត្រូវបញ្ឈប់សកម្មភាព ដែលនាំឲ្យខូចដល់ផលប្រយោជន៍ស.រ.អា. ជាដៃគូរបស់រុស្ស៊ី។ តាមសំដីឥស្សរជនរុស្ស៊ី ដែល បានជួបនឹងរូបគាត់ល្ងាចមិញ លោក Snowden សុខចិត្តបំពេញតាម ល័ក្ខខ័ណ្ឌនេះ ដ្បិតអ្វីៗដែលគាត់បានរៀបរាប់អំពី CIA គឺជារឿងចាស់ទៅហើយ។ ចំណែកអ្នកនាំពាក្យវិមានក្រេមឡាំង លោក Peskov លំអិតថា ល័ក្ខខ័ណ្ឌមួយទៀត គឺគាត់ត្រូវដាក់ពាក្យដោយដៃគាត់ផ្ទាល់ ដើម្បីសុំជម្រកនេះ។
តាមពួកអ្នកច្បាប់រុស្ស៊ី ពាក្យនេះ ត្រូវដាក់ទៅស្ថាប័នអន្តោប្រវេសន៍រុស្ស៊ី ដែលបន្ទាប់មក នឹងពិនិត្យមើលដោយគណៈកម្មការពិសេស ដែលនឹងស៊ីពេលពីមួយសប្តាហ៍រហូតដល់៣ខែ។ រួចនៅទីបំផុត គឺត្រូវទទួល “ភ្លើងខៀវ “ ពីប្រធានាធិបតីរុស្ស៊ីតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ