គណបក្សសង្គ្រោះជាតិអំពាវនាវឱ្យគណបក្សប្រជាជនកម្ពុជាបន្តការចរចា
ក្នុងសិក្ខាសាលាស្តីពីដំណោះស្រាយបច្ចេកទេស ចំពោះភាពមិនប្រក្រតីនៃការបោះឆ្នោត នៅព្រឹកថ្ងៃទី១៨ សីហានេះ ប្រធានគណបក្សសង្គ្រោះជាតិ លោកសម រង្ស៊ី បានអំពាវនាវឱ្យគណបក្សកាន់អំណាចរបស់លោកនាយករដ្ឋមន្ត្រីហ៊ុន សែន បន្តការចរចាស្តីពីដំណោះស្រាយនៃភាពមិនប្រក្រតីនៃការបោះឆ្នោត។ ការអំពាវនាវនេះត្រូវបានធ្វើឡើង បន្ទាប់ពីភាគីនៃគណបក្សឈ្នះឆ្នោតក្នុងសភាទាំងពីរ បានបែរខ្នងដាក់គ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ប្រធានគណបក្សសង្គ្រោះជាតិ លោក សម រង្ស៊ី បានអំពាវនាវយ៉ាងទទូចឱ្យគណបក្សប្រជាជនកម្ពុជា បន្តការចរចាឡើងវិញ ដើម្បីដោះស្រាយភាពមិនប្រក្រតីនៃការបោះឆ្នោត។ ភាពមិនប្រក្រតីដែលជាដើមចម នៃភាពតានតឹងនយោបាយនៅកម្ពុជា ក្រោយការបោះឆ្នោត។
ការអំពាវនាវយ៉ាងនេះរបសប្រធានគណបក្សប្រឆាំង ត្រូវបានធ្វើឡើងនៅក្នុងសិក្ខាសាលាស្តីអំពីការដោះស្រាយផ្នែកបច្ចេកទេសចំពោះភាពមិនប្រក្រតីនៃការបោះឆ្នោត ដែលដឹកនាំដោយលោកសម រង្ស៊ី និងលោកកឹម សុខា។
នៅក្នុងសិក្ខាសាលារយៈពេលជិត២ម៉ោង លោកសម រង្ស៊ី បាននិយាយចំៗ អោយគណបក្សប្រជាជនកម្ពុជា ចូលរួមដោះស្រាយរកភាពយុត្តិធម៌ជូនប្រជាពលរដ្ឋ។
គួររំលឹកថា កន្លងមកគណបក្សកាន់អំណាច និងគណបក្សប្រឆាំងធ្លាប់ចូលរួមចរចាបង្កើតគណៈកម្មការចម្រុះចំពោះកិច្ចមួយ ក្នុងគោលដៅដោះស្រាយភាពមិនប្រក្រតីជាច្រើនដែលត្រូវបានលើកឡើងដោយគណបក្សសង្គ្រោះជាតិ និងអង្គការសង្គមស៊ីវិល។
ដំណើរការនៃការបង្កើតគណៈកម្មការនេះបានជាប់គាំងនៅទ្រឹងមួយកន្លែងវិញ នៅពេលនេះ ព្រោះតែការខ្វែងគំនិតគ្នាលើវត្តមាននៃការចូលរួមគណៈកម្មាធិការជាតិរៀបចំការបោះឆ្នោត (គ.ជ.ប)។
ទោះយ៉ាងណាក៏ដោយ ការអំពាវនាវរបស់លោកសម រង្ស៊ីនៅព្រឹកមិញនេះ ជាការអំពាវនាវផ្ទាល់មាត់ តាមរយៈសិក្ខាសាលារបស់គណបក្សសង្គ្រោះជាតិតែប៉ុណ្ណោះ។ គ្មានការបញ្ជាក់ពីថ្នាក់ដឹកនាំនៃគណបក្សជំទាស់មួយនេះ ថាពួកគេនឹងធ្វើលិខិតផ្លូវការទៅកាន់គណបក្សប្រជាជនកម្ពុជាឡើយ។ ភ្លាមៗ បន្ទាប់ពីការអំពាវនាវរបស់លោកសម រង្ស៊ី មន្ត្រីជាន់ខ្ពស់គណបក្សប្រជាជនកម្ពុជាលោក ជាម យៀប បានថ្លែងថា គណបក្សរបស់លោកមិនទាន់ទទួលបានលិខិតស្នើណាមួយនៅឡើយទេ។
គួរបញ្ជាក់អោយដឹងផងដែរថា នៅក្នុងសិក្ខាសាលានៅព្រឹកមិញនេះ គណបក្សសង្គ្រោះជាតិ បានបង្ហាញអោយឃើញថា ខ្លួនគួរតែបានឈ្នះទទួលអាសនៈមួយបន្ថែមទៀតនៅក្នុងមណ្ឌលខេត្តកណ្តាល។ សិក្ខាសាលានោះត្រូវបានរៀបចំធ្វើនៅក្នុងទីស្នាក់ការគណបក្សសង្គ្រោះជាតិនៅក្នុងសង្កាត់ចាក់អង្រែលើ ដោយមានការចូលរួមពីមន្ត្រីជាន់ខ្ពស់គណបក្សសង្គ្រោះជាតិ តំណាងអង្គការសង្គមស៊ីវិល និងអ្នកកាសែតជាច្រើន។ នៅឯខាងក្រៅទីស្នាក់ការវិញ សកម្មជនគណបក្សសង្គ្រោះជាតិ ជាង១០០នាក់បានជួបជុំគ្នារង់ចាំស្តាប់លទ្ធផលនៃសិក្ខាសាលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ