អ្នកទោសនយោបាយរបស់គណបក្សសម រង្ស៊ីត្រូវបានដោះលែងឲ្យមានសេរីភាព
ទណ្ឌិតជាអតីតមេឃុំគណបក្ស សម រង្ស៊ី ក្នុងខេត្តកំពង់ធំ ដែលក្រុមមន្ត្រីសិទ្ធិមនុស្សពណ៌នាថា ជាអ្នកទោសនយោបាយត្រូវបានដោះលែងឲ្យមានសេរីភាពវិញហើយ នៅថ្ងៃពុធនេះ បន្ទាប់ពីមានព្រះរាជទានលើកលែងទោសពីព្រះមហាក្សត្រខ្មែរ។ គណបក្សសម រង្ស៊ី នៅតែបន្តអះអាងថា អតីតមេឃុំរបស់ខ្លួនត្រូវបានជាប់ទោសយ៉ាងអយុត្តិធម៌។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់នេត្រ ភក្ត្រា
មន្ត្រីគណបក្ស សម រង្ស៊ី បានថ្លែងឲ្យដឹង នៅថ្ងៃនេះថា លោកទួត សារ៉ន មេឃុំពង្រ ស្រុកបារាយណ៍ ខេត្តកំពង់ធំមកពីគណបក្ស សម រង្ស៊ី ត្រូវបានមន្ត្រីពន្ធនាគារខេត្តដោះលែង ឲ្យមានសេរីភាពវិញហើយ។ ការដោះលែងអ្នកទោសនយោបាយរូបនេះធ្វើឡើង បន្ទាប់ពីមានព្រះរាជទានលើកលែងទោសពីសំណាក់ព្រះមហាក្សត្រខ្មែរ តាមការស្នើសុំរបស់គណបក្សសម រង្ស៊ី។
លោកទួត សារ៉ន ត្រូវបានអាជ្ញាធរខេត្តកំពង់ធំចាប់ខ្លួន កាលពីខែ មីនា ឆ្នាំ ២០០៨ កន្លងទៅ ដោយចោទប្រកាន់ពីបទចាប់បង្ខាំងមនុស្សដោយខុសច្បាប់ ហើយត្រូវបានតុលាការ ខេត្តកំពង់ធំផ្តន្ទាទោសដាក់ពន្ធនាគារកំណត់ រយៈពេលបីឆ្នាំ។ ប៉ុន្តែ មន្ត្រីគណបក្សសម រង្ស៊ីបានថ្លែងថា បទចោទប្រកាន់ គឺគ្រាន់តែដើម្បីទម្លាក់កំហុសលើរូបលោកតែប៉ុណ្ណោះ ហើយថា ការកាត់ទោសនេះ គឺជារឿងនយោបាយ មិនមានភាពយុត្តិធម៌ឡើយ។
លោក សុន ឆ័យ ប្រធានក្រុមតំណាងរាស្ត្រគណបក្សសម រង្ស៊ី ដែលបានពិនិត្យមើលការដោះលែងនេះ មានប្រសាសន៍ថា លោកទួត សារ៉ន ត្រូវបានកាត់ទោសឲ្យជាប់ពន្ធនាគារដោយសារតែគំនាបនយោបាយ។ ប៉ុន្តែទោះបីយ៉ាងណា លោកសុន ឆ័យ អះអាងថា គណបក្សសម រង្ស៊ី នឹងមិនធ្វើការស៊ើបអង្កេតអ្វី បន្តលើបញ្ហានេះឡើយ ប៉ុន្តែអាចនឹងពិចារណាក្នុងការទាមទារឲ្យមានការសងជំងឺចិត្ត ដល់អតីតមេឃុំរបស់ខ្លួន។
គួរបញ្ជាក់ថា មនុស្សបីនាក់ទៀតដែលមានការជាប់ពាក់ព័ន្ធនឹងសំណុំរឿងចាប់បង្ខាំងមនុស្សខុសច្បាប់នេះ ត្រូវបានរត់គេចខ្លួនទៅក្រៅប្រទេស ហើយបើតាមការឲ្យដឹងរបស់លោកសុន ឆ័យ មនុស្សពីរនាក់បានទទួលសិទ្ធិជ្រកកោនផ្នែកនយោបាយនៅសហរដ្ឋអាមេរិក និងម្នាក់ទៀតកំពុងស្វែងរកសិទ្ធិជ្រកកោនផ្នែកនយោបាយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ