អាមេរិក និងរុស្ស៊ីរកវិធីជំនះលើបញ្ហាដែលបំពុលដល់ទំនាក់ទំនងខ្លួន
ពិតជាដើម្បីសាកល្បងជាលើកចុងក្រោយ បុកទម្លាយរឿង “ប្រព័ន្ធខែលមីស្ស៊ីល ប្រឆាំងមីស្ស៊ីល “ ដែលអាមេរិកកំពុងដំឡើងនៅទ្វីបអឺរ៉ុប ហើយដែលត្រូវរុស្ស៊ីចាត់ទុកជាគ្រោះថ្នាក់ដល់ខ្លួន តាមកាសែតក្រុងម៉ូស្គូ Kommersant លេខថ្ងៃនេះទើបបង្ហើបឲ្យដឹងពេលថ្មីៗ មានបេសកជនពិសេសរបស់ក្រសួងការបរទេសអាមេរិកបាននាំយកមកប្រគល់ឲ្យភាគីរុស្ស៊ីនូវ “ពត៌មានសម្ងាត់” ស្តីអំពីប្រព័ន្ធនេះដើម្បីឲ្យរុស្ស៊ីស្ងប់ចិត្តចំពោះសន្តិសុខខ្លួន។
ចុះផ្សាយនៅថ្ងៃ៖
ស្តាប់ - ០២:២៨
គឺកាលពីថ្ងៃទី១៣ មិនាកន្លងទៅដែលនៅទីក្រុងម៉ូស្គូ ពួកមន្ត្រីរុស្ស៊ីបានទទួលពីដៃលោកស្រី Allen Tosher តំណាងពិសេសរបស់ក្រសួងការបរទេសអាមេរិកនូវពត៌មានដែលថា “សម្ងាត់” ស្តីអំពីគ្រឿងផ្សំនៃ “ប្រព័ន្ធខែលមីស្ស៊ីល ប្រឆាំងមីស្ស៊ីល “ ដែល ស.រ.អា. កំពុងដំឡើងនៅទ្វីបអឺរ៉ុប នៅជិតបង្កើយនឹងព្រំប្រទល់ប្រទេសរុស្ស៊ី ហើយដែលត្រូវរុស្ស៊ីចាត់ទុកជាគ្រោះថ្នាក់ដល់ខ្លួន។ តាមប្រសាសន៍លោកស្រី នេះជាកាយវិការសុឆន្ទៈពីខាងទីក្រុងវ៉ាស៊ីនតោន។
ប៉ុន្តែតាមកាសែតក្រុងម៉ូស្គូ Kommersant លេខថ្ងៃនេះចុះផ្សាយ ក្រោយពីធ្វើវិភាគទៅលើអ្វីៗដែលខ្លួនបានទទួលនោះ ពួកមន្ត្រីរុស្ស៊ីចាត់ទុក”ពត៌មានសម្ងាត់” នោះ ថាគ្មានប្រយោជន៍ និងគ្មានខ្លឹមសារអ្វីជាធំដុទេ។ អ្នកការទូតរុស្ស៊ីបានរំលឹកប្រាប់កាសែត Kommersant ថា ភាគីអាមេរិកមិនអាចប្រគល់មកឲ្យរុស្ស៊ីនូវពត៌មានដ៏ “រសើប”អ្វីណាទេ ទាក់ទងនឹងប្រព័ន្ធខែលនោះ។ សូម្បីតែពួកប្រទេសសម្ព័ន្ធមិត្តខ្លួនក្នុងអង្គការអូតង់ក៏អាមេរិកមិនដែលប្រគល់ឲ្យនូវពត៌មាន”រសើប” អ្វីណាទេ។ មូលហេតុ មកពីមានបំរាមហាមយ៉ាងតឹងរ៉ឹងពីខាងព្រឹទ្ធសភាអាមេរិក។
ដោយអស់សង្ឃឹមនឹងនិយាយឲ្យបានត្រូវគ្នាជាមួយអាមេរិក ក្រសួងការពារជាតិរុស្ស៊ីកំពុងរៀបចំកិច្ចប្រជុំមួយដើម្បីលើកយកតឹកតាងមកបរិហារអាក្រាតអំពីគ្រោះថ្នាក់នៃប្រព័ន្ធខែលអាមេរិកនោះ ដល់សក្តានុពលកងកម្លាំងបរមាណូរុស្ស៊ី ដោយនឹងអញ្ជើញឲ្យមកចូលរួម គឺពួកយោធាអាមេរិកផ្ទាល់ និងពួកយោធាប្រទេសបែបយ៉ាង ចិន ឥណ្ឌា ជប៉ុន ពួកប្រទេសអឺរ៉ុប និងបណ្តាប្រទេសក្នុងលំហអតីតសហភាពសូវៀត។ មកពីមូលហេតុនេះបានជារុស្ស៊ីតែងទទូចឲ្យអាមេរិកធានាដល់ខ្លួន តាមផ្លូវគតិយុត្ត ជាលាយល័ក្ខអក្សរតែម្តង ថាប្រព័ន្ធនោះឥតតម្រង់ប្រឆាំងរុស្ស៊ីទេ ប៉ុន្តែអាមេរិកតែងឆ្លើយថា ការធានានេះតែតាមសំដី គឺគ្រប់គ្រាន់ហើយ។
ជាការកត់សម្គាល់ ថ្លែងម្សិលមិញ ពីលើវេទិកាសម័យប្រជុំថ្នាក់ដឹកនាំក្រសួងការពារជាតិរុស្ស៊ី លោកប្រធានាធិបតីមេដវេដេវ ផ្ទុកផ្តាក់យ៉ាងម៉ឺងម៉ាត់ ឲ្យទៅទល់ឆ្នាំ២០១៧ បំពាក់កងទ័ពរុស្ស៊ីទៅដោយសព្វាវុធចាំបាច់ សម្រាប់ប្រឈមនឹងគ្រោះថ្នាក់បណ្តាលមកពីប្រព័ន្ធខែលមីស្ស៊ីលរបស់អាមេរិកនោះ។ សាច់រឿង មកពីក្នុងឆ្នាំ២០១៧ ប្រព័ន្ធនោះឯង នឹងត្រូវដំឡើងបានរួចស្រេចបាច់នៅទ្វីបអឺរ៉ុប ជិតបង្កើយនឹងប្រទេសរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ