ញត្តិទាមទារឲ្យទម្លាក់ប្រមុខរដ្ឋាភិបាលរុស្ស៊ី
មកទល់ថ្ងៃ៥សីហាម្សិលមិញ មានប្រជាពលរដ្ឋជាង១៦០ ០០០នាក់ហើយ ដែលបានចុះហត្ថលេខាលើញត្តិ ទាមទារការលែងចេញពីមុខតំណែង នៃលោកនាយករដ្ឋមន្ត្រីរុស្ស៊ី ឌ្មីទ្រី មេដវេដេវ ក្រោយពីគាត់បានទូន្មានសាស្ត្រាចារ្យណាដែលតូចចិត្តនឹងប្រាក់ខែទាប ឲ្យទៅធ្វើការនៅកន្លែងផ្សេងទៅ ក្នុងគ្រាដែលសេដ្ឋកិច្ចជាតិកំពុងឆ្លងកាត់វិបត្តិពេញបន្ទុក ហើយ កាលដែលនៅសល់តែមួយខែកន្លះសោះ ដល់ថ្ងៃបោះឆ្នោតរើសរដ្ឋសភានីតិកាលថ្មី។
ចុះផ្សាយនៅថ្ងៃ៖ កែប្រែថ្ងៃទី៖
មូលហេតុនៃការលេចចេញមកជាញត្តិបែបនេះ នៅតាមវែបសាយ Change.org នៃ បណ្តាញអ៊ិនធរ័ណែត គឺមកពីថ្ងៃអង្គារទី២សីហាដោយឆ្លើយពីលើវេទិកាសន្និសីទចូលរួមដោយ បណ្តាគរុកោសល្យវិទូ តបនឹងសំនួរសាស្ត្រាចារ្យម្នាក់៖ តើហេតុដូចម្តេចបានជានៅរុស្ស៊ី គ្រូបង្រៀនទទួលប្រាក់ខែយ៉ាងច្រើនណាស់ត្រឹម ១៥.០០០រូប្ល ឬ ម្តុំ២៥០ដុល្លារ ចំណែក ពួកមន្ត្រីក្រសួងកម្លាំងទទួលដល់៥០.០០០រូប្ល ក្នុង១ខែ ឬ៨០០ដុល្លារ?
លោកនាយករដ្ឋមន្ត្រី មេដវេដេវ ថ្លែងថា៖ បើចង់រកលុយឲ្យបានច្រើន នោះមានមិនខ្វះទេកន្លែងដ៏ល្អបវរ ជាទីដែលគេអាចរកលុយបានយ៉ាងលឿន ហើយគ្រាន់បើជាង។ លោកប្រមុខរដ្ឋាភិបាលរុស្ស៊ីក៏បន្ថែមថា៖ សំនួរបែបនេះឧស្សាហ៏ត្រូវគេចោទសួរមកខ្ញុំ ប៉ុន្តែ របរជាគ្រូបង្រៀន ជាសាស្ត្រាចារ្យ គឺជាឧបនិស្ស័យ។ បើនរណាត្រូវការរកលុយឲ្យបានច្រើន នោះគឺមានរបរផ្សេងៗទៀតយ៉ាងច្រើន ឧទាហរណ៍វិស័យBusiness។
ចំណែកសេចក្តីនៃញត្តិដែលបើកកាលពីថ្ងៃព្រហស្បតិ៍៤សីហា សម្រាប់ទទួលការចុះហត្ថលេខា ហើយគ្រាន់តែក្នុង២ថ្ងៃសោះ មានអង្គាសបានហត្ថលេខា ជាង១៦ម៉ឺននាក់ទៅហើយ លើកឡើងថា រដ្ឋាភិបាលត្រូវតែដឹកនាំដោយមនុស្សដែលមានសមត្ថភាព មានចំណេះដឹង សុចរិត ហើយចេះខ្នះខ្នែងវៀសវៃចំពោះប្រទេសជាតិ ប៉ុន្តែឥឡូវ ស្ថានការណ៍ពិត គឺបញ្ច្រាសពីនេះសោះ។
តាមមតិហត្ថលេខីភាគច្រើន សម្តីលោកមេដវេដេវរំលេចឲ្យឃើញ ពីការពេបជ្រាយបន្តុះបង្អាប់ថា បើគ្រូបង្រៀនដក់ជាប់ដោយឧបនិស្ស័យ គឺគេអាចធ្វើការដោយសឹងមិនបាច់ទទួលប្រាក់ខែឬ? នេះជាការប៉ិនដោះសាមែន របស់បុគ្គលដែលអសមត្ថភាពក្នុងការងារខ្លួន។ ដោយហេតុថា សម្តីលោកមេដវេដេវ គឺប្រមាថលើគ្រូបង្រៀនទាំងអស់នៅរុស្ស៊ី បានជាយើងអំពាវនាវលោកប្រធានធិបតីពូទីន ឲ្យដកប្រមុខរដ្ឋាភិបាលរូបនេះចេញពីតំណែងខ្លួនទៅ។
អ្នកនាំពាក្យរបស់ប្រធានាធិបតីរុស្ស៊ី លោកឌ្មីទ្រី ពេស្កូវ បានថ្លែងទៅពួកអ្នកកាសែតថា៖
វិមានក្រេមឡាំង នៅមិនទាន់ឃើញទេញត្តិដែលបង្ហោះតាមបណ្តាញអ៊ិនធ័រណេត ម៉្លោះហើយ បានជាគ្មានអ្វីជាចាំបាច់នឹងបញ្ចេញប្រតិកម្ម តបនឹងញត្តិអេឡេកត្រូនិកបែបនេះ។
បើនិយាយពីប្រាក់ខែសាស្ត្រាចារ្យនៅរុស្ស៊ី នោះតាមតួលេខនៃស្ថិតិរដ្ឋ ឆ្នាំ២០១៦នេះ គឺក្នុងទំហំ៣២.០០០រូប្ល ឬ ខ្ទង់៥០០ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ