រុស្ស៊ីដែលនាំមុខគេក្នុងលោកខាងឧស្ម័ន ក្នុង២ទសវត្សទៀតនឹងវ៉ាដោយស.រ.អា.
ព្យាករណ៍នេះមានចែងក្នុងរបាយការណ៍ចេញថ្ងៃទី ២៩ ឧសភាម្សិលមិញ ដោយ “ទីភ្នាក់ងារថាមពលអន្តរជាតិ”។ ជាការកត់សម្គាល់ ប្រទេសរុស្ស៊ី បច្ចុប្បន្ន ជាប់ចំណាត់ថ្នាក់ទី១លើពិភពលោក ទាំងខាងទំហំកំណប់ឧស្ម័នក្រោមដី ទាំងខាងបរិមាណឧស្ម័នជីកបាន។
ចុះផ្សាយនៅថ្ងៃ៖
ស្តាប់ - ០២:៥១
តួលេខផ្លូវការនៃចំណាត់ថ្នាក់ទី១នេះ គឺថាធ្លាក់មកលើប្រទេសរុស្ស៊ី មានដល់ទៅ ១៨% នៃកំណប់ឧស្ម័នក្រោមដីនៅក្នុងលោក និង១៥%នៃបរិមាណឧស្ម័នជីកបាននៅក្នុងលោក។ ក្នុងឆ្នាំ២០១១កន្លងទៅ ឧស្ម័នធម្មជាតិជីកបាននៅរុស្ស៊ី គឺក្នុងបរិមាណ ៦៧០.៥០០លាន ម៣ដែលពីក្នុងនោះ ៧៨% គឺជីកបានដោយក្រុមហ៊ុនយក្សរបស់រដ្ឋរុស្ស៊ីឈ្មោះ Gazprom។ ស្របនឹងព្យាករណ៍ “ទីភ្នាក់ងារថាមពលអន្តរជាតិ” ៖ទៅទល់ឆ្នាំ ២០៣៥ ប្រទេសរុស្ស៊ីមិនគ្រាន់តែត្រូវស.រ.អា. ដេញតាមទាន់ប៉ុណ្ណោះទេ តែក៏នឹងត្រូវវ៉ាដាច់ទៅផង ខាងបរិមាណឧស្ម័នជីកបាន។ ជាក់ស្តែងគឺថា នៅពេលនោះ រុស្ស៊ីនឹងជីកបានឧស្ម័ន ៧៨៤.០០០ លានម៣ ចំណែកអាមេរិកនឹងជីកបានរហូតដល់ ៨២៤.០០០ លានម៣ ។ ហើយនឹងជាប់លេខ៣ គឺប្រទេសចិន ជាទីដែល”ឥន្ធនៈខៀវ”នេះ ជីកបានក្នុង២ទសវត្សទៅមុខ នឹងកើនបរិមាណ ៥ដងឯណោះ។
ប៉ុន្តែបច្ចុប្បន្ននេះ ស្របនឹងតួលេខឆ្នាំ ២០១០ ចិនជាប់ត្រឹមលេខ៦ប៉ុណ្ណោះ ដោយជីកបានឧស្ម័នតែ ៩៨.០០០លានម៣ គឺស្ថិតនៅពីក្រោយប្រទេសន័រវ៉ែស អ៊ីរ៉ង់ កាណាដា ស.រ.អា. និងប្រាកដណាស់នៅពីក្រោយរុស្ស៊ី ដែលនាំមុខបញ្ជីឈ្មោះជាង៣០ប្រទេស ខាងជីកឧស្ម័នធម្មជាតិ។ “ទីភ្នាក់ងារថាមពលអន្តរជាតិ” លើកឡើងថា ៖នឹងពង្រីកទំហំឧស្ម័នជីកបានរបស់ខ្លួន ក៏ទាំងប្រទេសអូស្ត្រាលី ឥណ្ឌា ឥណ្ឌូណេស៊ី ព្រមទាំង បណ្តាប្រទេសទ្វីបអាហ្វ្រិក តំបន់ដើមបូព៌ា។ របាយការណ៍កត់សម្គាល់ជាពិសេសថា ព្យាករណ៍ដែលមាន អាចសម្រេចទៅកើត លុះណាតែក្នុងករណីបង្កើនយ៉ាងខ្លាំងតែម្តង នូវការជីក “ឧស្ម័នមិនមែនជាប្រពៃណី” ពោលគឺឧស្ម័នជីកបានពីស្រទាប់ថ្ម ហៅថា”ឧស្ម័នសុភាជ” និងឧស្ម័នជីកបានពីអណ្ដូងធ្យូងថ្ម ហៅថា “ឧស្ម័នធ្យូងថ្ម””។
តាមព្យាករណ៍នេះ ទៅទល់ឆ្នាំ ២០៣៥ ត្រូវជីក“ឧស្ម័នមិនមែនជាប្រពៃណី” ឲ្យបានដល់ ១/៣ នៃរាល់ឧស្ម័នជីកបានក្នុងលោក។ នៅស.រ.អា.បដិភាគនៃ“ឧស្ម័នមិនមែនជាប្រពៃណី” មានអត្រាដល់ទៅ ៧១% ខុសពីនៅរុស្ស៊ីដែលអត្រានេះ ត្រឹមតែ ៦% ប៉ុណ្ណោះ។ គួរនិយាយថា ស.រ.អា. ធ្លាប់បានវ៉ាឈ្នះរុស្ស៊ីតែម្តងគត់ គឺកាលក្នុងឆ្នាំ ២០០៩ ពេលដែលអាមេរិកចេះជីកបានឧស្ម័នដល់ទៅ ៦២៤.០០០លានម៣ ទល់នឹង៥៨២.០០០លាន ម៣ជីក បានដោយរុស្ស៊ី។ ប៉ុន្តែក្នុងឆ្នាំ២០១០ រុស្ស៊ីចេះដកកំពស់ ឡើងជាប់លេខ១វិញ ដោយជីកបាន ៦៤៧.០០០លានម៣ ទល់នឹង ៦១៩.០០០លានម៣ ជីកបានដោយអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ