បុគ្គលិកពេទ្យដែលមានកំហឹង នៅរុស្ស៊ី ធ្វើបាតុកម្ម
អស់រយៈពេលជាច្រើនឆ្នាំកន្លងទៅ នេះជាលើកទី១ហើយ ដែលអ្នករដ្ឋការដើរធ្វើបាតុកម្មតាមផ្លូវ ក្នុងក្រុងធំៗជាច្រើនរបស់ប្រទេសរុស្ស៊ី នៅចុងសប្តាហ៍នេះ។ ក្នុងរដ្ឋធានីមូស្គូ (Moscou) បុគ្គលិកពេទ្យទៅតវ៉ាប្រឆាំងនឹងកំណែទម្រង់ប្រព័ន្ធសុខាភិបាលបច្ចុប្បន្ន ដែលគ្រោងបិទមន្ទីរពេទ្យជាច្រើន។
ចុះផ្សាយនៅថ្ងៃ៖
ស្តាប់ - ០១:៤២
គ្រាន់តែនៅរដ្ឋធានីមូស្គូ ( Moscou) ប៉ុណ្ណោះ មន្ទីរពេទ្យរដ្ឋប្រមាណជា៣០កន្លែងទៅហើយ ដែលត្រូវបិទទ្វារ។ ជាផ្លូវការ ការធ្វើដូច្នេះគឺដើម្បីធ្វើឱ្យប្រព័ន្ធសុខាភិបាលកាន់តែប្រសើរ។ បច្ចុប្បន្ន មន្ទីរពេទ្យខ្លះស្ថិតក្រោមការគ្រប់គ្រងរបស់សាលាក្រុង ខ្លះទៀតជារបស់សហគ្រាសធំៗ ហើយចុងក្រោយគឺមន្ទីរពេទ្យដែលពឹងលើរដ្ឋ។ តាមធម្មតា ការគ្រប់គ្រងមន្ទីរពេទ្យត្រូវតែផ្ទេរឱ្យទៅស្ថិតនៅក្រោមប្រព័ន្ធធានារ៉ាប់រងសង្គមតែមួយ ជាបណ្ដើរ។
ក្នុងក្របខណ្ឌនៃកំណែទម្រង់នេះ ភ្នាក់ងារសុខាភិបាល៧ពាន់នាក់ហើយ ដែលបាត់បង់ការងារ ហើយកន្លែងអ្នកជំងឺដេកបានថយចុះ២ពាន់គ្រែ។ មជ្ឈមណ្ឌលសុខាភិបាលទាំងឡាយ បានច្របាច់បញ្ចូលគ្នា ដើម្បីកាត់បន្ថយបុគ្គលិករដ្ឋបាល។ សាលារដ្ឋធានីមូស្គូថ្លែងថា ខ្លួនបានធ្វើឱ្យមន្ទីរពេទ្យជាច្រើនកាន់តែទំនើប ហើយទំនើបកម្មនេះមិនត្រូវការគ្រែអ្នកជំងឺ និងបុគ្គលិកពេទ្យច្រើនដូចមុនទេ។ ហើយចុងក្រោយ វេជ្ជបណ្ឌិតដែលនៅសេសសល់នឹងទទួលបានប្រាក់ខែកាន់តែច្រើន។ បច្ចុប្បន្ន បៀវត្សរ៍ ទាបមែនទែន រហូតទាល់តែគ្រូពេទ្យខ្លះធ្វើការឯកជន ឬប្រព្រឹត្តអំពើពុករលួយ ដើម្បីទទួលប្រាក់កម្រៃបន្ថែម។
កំណែទម្រង់ប្រព័ន្ធសុខាភិបាលនៅរុស្ស៊ី គ្រោងបញ្ឈប់បុគ្គលិកមន្ទីរពេទ្យជាច្រើននាក់ តាមមើលទៅរហូតដល់រាប់ពាន់អ្នក។ សាលារដ្ឋធានីមិនផ្តល់ស្ថិតិពិតប្រាកដទេ។ ដូច្នេះ ក្តីបារម្ភរឹងរឹតតែខ្លាំងក្លា។ នៅចំពោះមុខកំហឹងរបស់បុគ្គលិកពេទ្យ សាលារដ្ឋធានីបានសន្យាផ្តល់សំណងផ្សេងៗទៀត បន្ថែមលើសំណងតាមផ្លូវច្បាប់។ ពលរដ្ឋរុស្ស៊ី ដែលសង្កេតឃើញថា ពួកគេត្រូវធ្វើកិច្ចការកាន់តែច្រើនចំពោះប្រព័ន្ធមួយដែលមានមុខពីរដូច្នេះនោះ ជាទូទៅគាំទ្របាតុកម្មរបស់ក្រុមគ្រូពេទ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ