ប្រមុខការទូតរុស្ស៊ីទៅចែចង់រកទីផ្សារឧស្ម័នថ្មីនៅប៉េកាំង ?!
លោក សែកហ្គៃ ឡាវ្រូស Serguei Lavrov រដ្ឋមន្ត្រីក្រសួងការបទេសរុស្ស៊ី នឹងអញ្ជើញទៅបំពេញទស្សនកិច្ចនៅប្រទេសចិន នាថ្ងៃទី ១៥ មេសានេះ។ វិបត្តិនយោបាយរបស់ប្រទេសអ៊ុយក្រែន នឹងត្រូវបានប្រមុខការទូតរុស្ស៊ី លើកយកមកពិភាក្សា ជាពិសេស និងដោយខានមិនបាន ជាមួយសមភាគីចិន ក្នុងអំឡុងពេលទស្សនកិច្ចផ្លូវការនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
កម្មវត្ថុចម្បងនៃដំណើរទស្សនកិច្ចរបស់លោកប្រមុខការទូតរុស្ស៊ី គឺដើម្បីរៀបចំដំណើរអញ្ជើញទៅទីក្រុងប៉េកាំងរបស់ប្រធានាធិបតីរុស្ស៊ី លោក វ្លាដេមៀ ពូទីន គ្រោងធ្វើនៅឆ្នាំនេះ ប៉ុន្តែដោយហេតុតែស្ថានការណ៍តម្រូវ និងកាលបវិច្ឆេទចៃដន្យចំគ្នាល្អ ប្រធានបទនយោបាយទាក់ទងនឹងប្រទេសអ៊ុយក្រែន ត្រូវបានទទួលចំណាប់អារម្មណ៍ពិសេស នាឱកាសជំនួបរវាងរដ្ឋមន្ត្រីការបរទេសរុស្ស៊ីជាមួយ ប្រធានាធិបតី និងរដ្ឋមន្ត្រីការបរទេសចិន នៅទីក្រុងប៉េកាំង។
សម្រាប់រុស្ស៊ី ចិនជាមិត្តដ៏ល្អ មានទស្សនៈនិងជំហរស្មើភាពប្រកបទិសដៅពិតប្រាកដ ព្រមទាំងចេះសម្តែងការយោគយល់លើគ្រប់វិស័យទាំងអស់ រាប់ទាំងអតីតកាល ដែលនាំឱ្យមានការពិតថ្មីនៅក្នុងតំបន់ ! នេះជាគូសបញ្ជាក់របស់ប្រភពការទូតរុស្ស៊ី។
រុស្ស៊ី ដែលពេលនេះ កំពុងប្រឈមនឹងការរិះគន់ និងចោទប្រកាន់ពីសំណាក់សហរដ្ឋអាមេរិកនិងអ៊ុយក្រែន ថាបានប្រមូលទ័ពមកឈរជើងនៅតាមព្រំដែន លើកទឹកចិត្តចលនាបះបោរឱ្យងើបឡើងទាមទារផ្តាច់ទឹកដីនៅភាគខាងកើតប្រទេសអ៊ុយក្រែន និងធ្វើឱ្យប្រទេសនេះស្ថិតនៅមាត់ជ្រោះនៃការប្រេះឆាបែកបាក់ជាតិ។
រុស្ស៊ី បានបដិសេធ ថាគ្នាពាក់ព័ន្ធនឹងវិបត្តិនៅភាគខាងកើតអ៊ុយក្រែនឡើយ។ ប៉ុន្តែគ្មានអ្នកជឿ ! រហូតប្រធានាធិបតីរុស្ស៊ី លោក ពូទីន កាលពីសប្តាហ៍មុន បានយកវិបត្តិអ៊ុយក្រែននេះមកធ្វើជាល្បែងសង្គ្រាមបែកចែកជាពីរប្លុកខាងលិចនិងខាងកើត ដូចសម័យសង្គ្រាមត្រជាក់ ដោយព្រមានបង្អត់ថាមពលឧស្ម័ន ឈប់លក់ឱ្យអឺរ៉ុប។
ក្នុងបរិបទដែលគ្រប់គ្នាព្រួយបារម្ភនឹងការផ្ទុះសង្គ្រាមឧស្ម័ន ជាថ្មីទៀតនេះ រុស្ស៊ីបានបង្កើនការចរចាជាមួយដៃគូសម្ព័ន្ធមិត្តចិន ប្រញឹកនារយៈពេលប៉ុន្មានសប្តាហ៍ចុងក្រោយនេះ។ ព្រោះសូមបញ្ជាក់ថា ក្រុមហ៊ុនឧស្ម័ន Gazprom រុស្ស៊ី បានតថ្លៃទីផ្សារចិន ជាយូរឆ្នាំមកហើយ ហើយសង្ឃឹមថានឹងអាចទម្លាយទ្វារចូលទីផ្សារដ៏មហាសាលបានជាលើកដំបូងនៅពេលនេះ។ ជាភស្តុតាង ថៅកែក្រុមហ៊ុនGazpromរុស្ស៊ីនឹងត្រូវអមដំណើរជាមួយប្រតិភូរដ្ឋាភិបាលរុស្ស៊ី ទៅកាន់ក្រុងប៉េកាំងស្អែកនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ