វិបត្តិស៊ីរី៖ អាមេរិកនិងរុស្ស៊ីនៅតែខ្វែងគំនិតគ្នាមុនបើកសន្និសីទអន្តរជាតិនៅហ្សឺណែវ
សន្និសីទអន្តរជាតិ ស្តីពីវិបត្តិស៊ីរី ត្រូវបានបើកធ្វើ នៅព្រឹកថ្ងៃសៅរ៍នេះ នៅទីក្រុងហ្សឺណែវ (ស្វ៊ីស) ទៅតាមសំណើរបស់លោកកូហ្វ៊ី អាណាន់ ប្រេសិតពិសេសរបស់អ.ស.ប. និងសម្ព័ន្ធអារ៉ាប់ ទទួលបន្ទុកសំណុំរឿងស៊ីរី។ ភាពចម្រូងចម្រាសគ្នារវាងរុស្ស៊ី និងអាមេរិក នៅតែបន្តកើតមាន ដែលអាចនឹងធ្វើឲ្យសន្និសីទនេះត្រូវទទួលបរាជ័យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៥
ប្រទេសមហាអំណាចទាំង ៥ ដែលជាសមាជិកអចិន្រ្តៃយ៍ នៃក្រុមប្រឹក្សាសន្តិសុខអ.ស.ប. (អាមេរិក អង់គ្លេស បារាំង ចិន និងរុស្ស៊ី) រួមជាមួយនឹងប្រទេសតួកគី អ៊ីរ៉ាក់ កាតា និងកូវ៉ែត បានជួបប្រជុំគ្នា នៅក្នុងទីក្រុងហ្សឺណែវ ដើម្បីជជែកអំពីផែនការថ្មីមួយទៀត របស់លោកកូហ្វ៊ី អាណាន់ ដើម្បីដោះស្រាយវិបត្តិស៊ីរី ក្រោយពីផែនការលើកមុនត្រូវបរាជ័យ ហើយអំពើហិង្សានៅតែបន្តកើតមានជារៀងរាល់ថ្ងៃនៅស៊ីរី។
នៅក្នុងផែនការថ្មីនេះ លោកកូហ្វ៊ី អាណាន់ បានស្នើឲ្យបង្កើតជារដ្ឋាភិបាលរួបរួមជាតិ សម្រាប់រយៈពេលអន្តរកាលមួយ មុននឹងឈានទៅរកដំណោះស្រាយនយោបាយជាស្ថាពរ បញ្ចប់វិបត្តិស៊ីរី។ រដ្ឋាភិបាលរួបរួមជាតិនេះនឹងត្រូវមានការចូលរួមពីគ្រប់ភាគីជម្លោះទាំងអស់នៅស៊ីរី រួមទាំងមន្រ្តីមកពីរដ្ឋាភិបាលបច្ចុប្បន្នរបស់លោកអាសាដ ឥស្សរជនមកពីក្រុមប្រឆាំង និងឥស្សរជនមកពីក្រុមផ្សេងទៀត ក៏ប៉ុន្តែ មិនត្រូវដាក់បញ្ចូលនូវបុគ្គលណា ដែលអាចបង្កជាឧបសគ្គដល់ស្ថិរភាព និងការផ្សះផ្សាជាតិ។ ចំណុចចុងក្រោយនេះត្រូវបានគេមើលឃើញថា សំដៅទៅលើលោកបាស្ហា អាល់អាសាដ។
រុស្ស៊ី ដែលពីដំបូងគាំទ្រផែនការបង្កើតរដ្ឋាភិបាលរួបរួមជាតិនេះ ក៏ស្រាប់តែបែរមកជំទាស់វិញ ដោយទាមទារឲ្យលុបឃ្លា ដែលមានន័យទាមទារឲ្យលោកអាសាដចុះចេញពីតំណែង។ អាមេរិកបានព្រមានថា ខ្លួននឹងមិនចូលរួមក្នុងសន្និសីទនៅហ្សឺណែវនេះទេ ប្រសិនបើមិនមានការព្រមព្រៀងគ្នាជាមុនទៅលើផែនការរបស់លោកកូហ្វ៊ី អាណាន់។
សន្និសីទក្រុងហ្សឺណែវត្រូវស្ថិតក្នុងភាពស្រពិចស្រពិល មិនដឹងជាអាចបើកធ្វើបានឬមិនបាន រហូតដល់ល្ងាចថ្ងៃសុក្រ ក្រោយពីមានជំនួបរវាងរដ្ឋមន្រ្តីការបរទេសអាមេរិក និងរុស្ស៊ី នៅក្នុងប្រទេសរុស្ស៊ី ទើបអ្នកនាំពាក្យរបស់លោកកូហ្វ៊ី អាណាន់ ប្រកាសថា សន្និសីទត្រូវបើកធ្វើតាមការគ្រោងទុក។
នៅក្រោយជំនួបម្សិលមិញនេះ រដ្ឋមន្រ្តីក្រសួងការបរទេសរុស្ស៊ីបានបង្ហាញពីសុទិដ្ឋិនិយមចំពោះសន្និសីទក្រុងហ្សឺណែវថ្ងៃនេះ ដោយរំពឹងថា គេនឹងអាចឈានទៅដល់កិច្ចព្រមព្រៀងមួយ។ ក៏ប៉ុន្តែ អាមេរិកវិញបានលើកឡើងថា អាមេរិក និងរុស្ស៊ីនៅតែមានជំហរខុសគ្នាច្រើន។ ការដែលអាមេរិកព្រមចូលរួមក្នុងសន្និសីទក្រុងហ្សឺណែវនេះ គឺដើម្បីបង្ហាញនូវការគោរពដល់លោកកូហ្វ៊ី អាណាន់តែប៉ុណ្ណោះ។
នៅព្រឹកថ្ងៃសៅរ៍នេះ នៅមុនបើកសន្និសីទ រដ្ឋមន្រ្តីក្រសួងការបរទេសអង់គ្លេសក៏បានប្រកាសដែរថា លោកហាក់ដូចជាមិនមានសង្ឃឹមថា សន្និសីទនេះអាចនឹងឈានទៅដល់កិច្ចព្រមព្រៀងលើដំណោះស្រាយវិបត្តិស៊ីរីនោះទេ ដោយសារតែរុស្ស៊ីនៅបន្តការពារលោកអាសាដ។
នៅក្នុងសុន្ទរកថាបើកសន្និសីទ លោកកូហ្វ៊ី អាណាន់ បានថ្លែងទៅកាន់តំណាងប្រទេសដែលចូលរួមក្នុងសន្និសីទថា ប្រសិនបើពួកគេមិនអាចចរចាស្វែងរកកិច្ចព្រមព្រៀងមួយ បញ្ចប់អំពើហិង្សានៅស៊ីរីបានទេ ពួកគេទាំងអស់គ្នានឹងត្រូវមានចំណែកទទួលខុសត្រូវចំពោះការស្លាប់របស់ជនស៊ីវិលស៊ីរី។
នៅស៊ីរី អំពើហិង្សានៅបន្តកើតមានឡើង ដែលបណ្តាលឲ្យមនុស្សយ៉ាងតិច ១១នាក់ បាត់បង់ជីវិត នៅព្រឹកថ្ងៃសៅរ៍នេះ។ ចំណែកភាពតានតឹងរវាងតួកគី និងស៊ីរី ក៏ចាប់កើនឡើងមួយកម្រិតទៀត ក្រោយពីប្រទេសទាំងពីរបានចល័តទ័ពទៅក្បែរព្រំដែនរៀងៗខ្លួន។ តួកគីបានបញ្ជូនទាហាន ដោយមានទាំងអាវុធបាញ់យន្តហោះផង ទៅកាន់តំបន់ព្រំដែន ក្រោយពីស៊ីរីបានបាញ់ទម្លាក់យន្តហោះចម្បាំងមួយគ្រឿងរបស់តួកគី កាលពីថ្ងៃសុក្រ សប្តាហ៍មុន។ កាលពីម្សិលមិញនេះ ក្រុមឧទ្ទាមស៊ីរីបានរាយការណ៍ថា គេឃើញទាហានស៊ីរី ប្រមាណ ២ ៥០០នាក់ រួមជាមួយរថក្រោះ និងរថយន្តយោធា ប្រមាណ ១៧០គ្រឿង ត្រូវបានគេចល័តយកទៅដាក់នៅប្រមាណជា ២៥គីឡូម៉ែត្រ ពីព្រំដែនជាមួយតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ