សហជីពអះអាងថាត្រៀមតទល់បណ្តឹងរបស់សមាគមរោងចក្រកាត់ដេរ
សហជីពទាំង៦ ដែលត្រូវសមាគមរោងចក្រកាត់ដេរកម្ពុជា គ្រោងនឹងដាក់បណ្តឹងនោះ បានតៀមខ្លួនរួចជាស្រេចនិងបានស្វាគមន៍ចំពោះពាក្យបណ្តឹង។ ការអះអាងបែបនេះបានធ្វើឡើងបន្ទាប់ពីសមាគមរោងចក្រកាត់ដេរកម្ពុជា ទទួលបានសិទ្ធិពីរោងចក្រចំនួន ១៧០ ដែលមានបំណងប្តឹងសហជីពទាំងនោះដើម្បីឲ្យសងថ្លៃខូតខាត ក្នុងពេលដែលមានបាតុកម្មកន្លងមក។
ចុះផ្សាយនៅថ្ងៃ៖
ស្តាប់ - ០១:៥៥
ប្រធានសមាគម គ្រូបង្រៀនកម្ពុជាឯករាជ្យ លោក រ៉ុង ឈុន បានអះអាងថា សហជីពរបស់លោកក៏ដូចជាសហជីពផ្សេងទៀតដែរនឹងតតាំងពាក្យបណ្តឹងនោះប្រសិនបើនិយោជករោងចក្រដាក់ពាក្យប្តឹងសហជីពមែននោះ ។ លោកអះអាងថា នេះជាសិទ្ធិរបស់និយោជក ប៉ុន្តែ លោកបានបញ្ជាក់ថា សហជីពមិនបានញុះញង់កម្មករ រឺក៏មានចេតនាបង្កការខូតខាតដល់រោងចក្រណានោះទេ។
សកម្មជនសហជីពរូបនេះបានចាត់ទុកការប្តឹងរបស់សមាគមរោងចក្រកាត់ដេរកម្ពុជាថា ជាវិធីហួសសម័យ ដែលប្រើប្រព័ន្ធតុលាការដើម្បីដាក់សម្ពាធលើសហជីព។ យ៉ាងណាក៏ដោយលោកក៏បានស្វាគមន៍ ហើយក៏មិនរុញរាក្នុងការចូលខ្លួនទៅបំភ្លឺដែរ។លោករ៉ុង ឈុន បានបន្ថែមថា សហជីពគ្មានប្រាក់ឯណាទៅសងនោះទេ ព្រោះកន្លងមកសហជីពធ្វើការគ្មានប្រាក់កម្រៃ ហើយធ្វើការបម្រើផលប្រយោជឲ្យតែកម្មករ ប៉ុណ្ណោះ។
សមាគមនិយោជករោងចក្រកាត់ដេរមិនអាចទាក់ទងបានទេនៅថ្ងៃនេះ ប៉ុន្តែ កាសែតក្នុងស្រុក បានស្រង់សម្តីលោក ខេន លូ អគ្គលេខាធិការសមាគមរោងចក្រកាត់ដេរកម្ពុជាថា សមាគមបានទទួលសិទ្ធិពីរោងចក្រចំនួន ១៧០ ឲ្យប្តឹងសហជីពទាំងនោះដើម្បីទារសំណងការខូចខាតដែលបង្កឡើងដោយក្រុមអ្នកធ្វើបាតុកម្មហិង្សា។
លោក ខេន លូ ក៏បានបញ្ជាក់ពីឈ្មោះរបស់សហជីពទាំង ៦នោះរួមមាន សហព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខៅឌូ) សហព័ន្ធសហជីពជាតិនៃឧស្សាហកម្មកាត់ដេរកម្ពុជា សម្ព័ន្ធសហជីពសេរីកម្មករកម្ពុជា សមាគមគ្រូបង្រៀនកម្ពុជាឯករាជ្យ និងសម្ព័ន្ធសហជីពកម្ពុជា។
គួរបញ្ជាក់ថាកន្លងមក សហជីពកម្មករទាំង៦ បានដឹកនាំកម្មករធ្វើបាតុកម្មទាមទារឲ្យរដ្ឋាភិបាល និងសមាគមថៅកែរោងចក្រកាត់ដេរនៅកម្ពុជាដំឡើងប្រាក់ឈ្មួលអប្បមារដល់កម្មករឲ្យបាន ១៦០ដុល្លា កាលពីដើមខែមករា ឆ្នាំ ២០១៤កន្លងមកថ្មីៗនេះ។ ក្នុងពេលបាតុកម្មនោះ ក៏មានរោងចក្រជាច្រើនបានរងការវាយកំទេច និងបំផ្លាញ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ