ប៉ូលីសបញ្ជូនជនសង្ស័យករណីលួចកោដ្ឋព្រះសារីរិកធាតុទៅតុលាការ
ប៉ូលីសបានបញ្ជូនមនុស្ស៥នាក់ដែលត្រូវបានសង្ស័យថា ជាប់ពាក់ព័ន្ធនឹងការលួចវត្ថុសក្តារៈបូជានៅក្នុងព្រះសក្យមុនីចេតិយលើភ្នំព្រះរាជទ្រព្យ ទៅតុលាការហើយកាលពីថ្ងៃសៅរ៍។ អ្នកនាំពាក្យអគ្គស្នងការនគរបាលជាតិបានប្រាប់អោយដឹងថា តុលាការនឹងបន្តនិតីវិធីស៊ើបអង្កេតក្នុងសំណុំរឿងនេះទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
ក្នុងចំណោមមនុស្ស៦នាក់ដែលជាឆ្មាំយាមព្រះសក្យមុនីចេតិយនៅលើភ្នំព្រះរាជទ្រព្យនោះ ប៉ូលីសបានកសាងសំណុំរឿង បញ្ជូនជនសង្ស័យ៥នាក់ទៅតុលាការខេត្តកណ្តាលហើយកាលពីថ្ងៃសៅរ៍ បន្ទាប់ការសួរចម្លើយពួកគេ។ លោកឧត្តមសេនីយឯក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិបានអះអាងថា ក្នុងចំណោមឆ្មាំទាំង៦នាក់ មានតែឆ្មាំម្នាក់ប៉ុណ្ណោះដែលមិនមានជាប់សង្ស័យក្នុងករណីលួចកោដ្ឋព្រះសារីរិកធាតុ និងព្រះពុទ្ធរូបនៅក្នុងព្រះសក្យមុនីចេតិយនោះ។ លោកមន្ត្រីជាន់ខ្ពស់របស់ប៉ូលីសជាតិបានបន្តថា ការបញ្ជូនជនសង្ស័យទាំង៥នាក់ទៅតុលាការ ត្រូវបានធ្វើឡើងបន្ទាប់ពីការសួរចម្លើយ និងការឆែកឆេរផ្ទះរបស់ពួកគេ ហើយប៉ូលីសរកឃើញវត្ថុសង្ស័យមួយចំនួន។
តាំងពីក្នុងដំណាក់កាលនៃការសួរចម្លើយឆ្មាំទាំងនេះ ប៉ូលីសបានដាក់ការសង្ស័យខ្លាំងទៅលើឆ្មាំយាមទាំងនេះ។
យោងតាមការបញ្ជាក់របស់លោក គៀត ច័ន្ទថារិទ្ធ តុលាការនឹងបន្តនីតិវិធីស៊ើបអង្កេតនេះ ហើយថាប៉ូលីសនៅរង់ចាំកិច្ចសហការជាមួយតុលាការ។
កាលពីយប់ថ្ងៃទី៩ធ្នូ កោដ្ឋព្រះសារីរិកធាតុ ព្រះពុទ្ធអង្គ៧អង្គ ដែលមួយអង្គជារបស់សម្តេចឪនរោត្តម សីហនុធ្វើអំពីមាស និងថវិកាដែលដំកល់នៅក្នុងព្រះសក្យមុនីចេតិយ ត្រូវបានចោរលួច។
ព័ត៌មានដែលមិនគួរអោយជឿ ស្តីការបាត់បង់វត្ថុជាទីសក្ការៈទាំងនេះ បានធ្វើអោយភ្ញាក់ផ្អើលនៅទូទាំងប្រទេស។ ប្រតិកម្ម និងការសំដែងអារម្មណ៍សោកស្តាយត្រូវបានគេផ្សព្វផ្សាយ និងនិយាយតៗគ្នា នៅតាមបណ្តាញសារព័ត៌មាន និងបណ្តាញសង្គម។ ពលរដ្ឋខ្មែរគ្រប់រូបកំពុងបន្តតាមដានករណីចោរកម្មដ៏គួរអោយភ្ញាក់ផ្អើលមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ