ខៀវ កាញារីទ្ធ ៖ កម្ពុជា-ថៃ បន្តមានទំនាក់ទំនងល្អជាមួយគ្នា
រដ្ឋមន្ត្រីក្រសួងព័ត៌មាន និងអ្នកសារព័ត៌មានកម្ពុជា បានបញ្ចប់ដំណើរទស្សនកិច្ចផ្លូវការរបស់ខ្លួននៅប្រទេសថៃនៅថ្ងៃនេះ។ យោងតាមការឲ្យដឹងរបស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរដ្ឋាភិបាល កម្ពុជា ដំណើរទស្សនកិច្ចនៅក្នុងប្រទេសថៃ ដែលមានលោក រួមនឹងអ្នកសារព័ត៌មានជាតិដទៃទៀតបានធ្វើនោះ គឺទទួលបានជោគជ័យល្អណាស់។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ នេត្រ ភក្ត្រា ពីទីក្រុងភ្នំពេញ
លោកខៀវ កាញារីទ្ធ បានលើកឡើងថា បន្ទាប់ពីបានជួបពិភាក្សា និង ផ្លាស់ប្តូរយោបល់គ្នា ភាគីទាំងពីរ កម្ពុជា-ថៃមានការយោគយល់គ្នា ទាំងលើស្ថានភាពវិជ្ជាជីវៈសារព័ត៌មានរបស់ អ្នកកាសែតនៃប្រទេសទាំងពីរ ទាំងការផ្លាស់ប្តូរបទពិសោធគ្នាទៅវិញទៅមក។ បើតាមលោករដ្ឋមន្ត្រីក្រសួងព័ត៌មាន អ្នកកាសែតកម្ពុជាមានភាពចាស់ទុំគ្រប់គ្រាន់ នៅក្នុងការធ្វើការងារ និងផ្សព្វផ្សាយព័ត៌មាន។ លោករដ្ឋមន្ត្រីក្រសួងព័ត៌មាន បានឲ្យដឹងផងដែរថា ក្រោយពីការផ្លាស់ប្តូរដំណើរទស្សនកិច្ចរបស់មន្ត្រី និងអ្នកសារព័ត៌មាន ទំនាក់ទំនងការទូតរវាងកម្ពុជា-ថៃ មានភាពប្រសើរឡើង ហើយមានការយល់គ្នាច្បាស់ទៅវិញទៅមក។
មន្ត្រីរដ្ឋាភិបាលនៃប្រទេសទាំងពីរសន្យាថា នឹងធ្វើការទំនាក់ទំនងគ្នាដោយផ្ទាល់ ប្រសិនបើមានបញ្ហាវិវាទធំផ្ទុះឡើង រវាងប្រទេសទាំងពីរ ហើយប្រសិនបើជាការងារធម្មតា នោះមន្ត្រីទូតជាអ្នកដោះស្រាយលើបញ្ហានេះ។ ជាមួយគ្នានេះដែរ អ្នកនាំពាក្យរដ្ឋាភិបាលកម្ពុជាបានឲ្យដឹងថា ដំណើរទស្សនកិច្ចរបៀបនេះ នឹងត្រូវរៀបចំឡើង បន្តទៀតនៅពេលខាងមុខ ដោយនាំអ្នកកាសែតខ្មែរ យ៉ាងហោចណាស់ ៤០នាក់ទៀត ទៅធ្វើទស្សនកិច្ច និងផ្លាស់ប្តូរបទពិសោធន៍គ្នានៅក្នុងប្រទេសថៃ ដើម្បីអ្វីដែលរដ្ឋាភិបាលកម្ពុជា-ថៃ បានកំណត់ថាវិស័យព័ត៌មាន មានសារៈសំខាន់ណាស់។ អ្នកសារព័ត៌មានជាអ្នកជួយជំរុញកិច្ចសហប្រតិបត្តិការ និងជួញបន្ថយភាពតានតឹង។
លោក ខៀវ កាញារីទ្ធ លើកឡើងថា នាយករដ្ឋមន្ត្រីថៃ អាភីស៊ីត មានការរីករាយដែលបានឃើញថា ទំនាក់ទំនងប្រទេសទាំងពីរបានប្រសើរឡើងវិញ ជាពិសេស គឺការដែលបានចាប់ផ្តើមពីក្រសួងព័ត៌មាន និងអ្នកសារព័ត៌មាននៃប្រទេសទាំងពីរជួបប្រាស្រ័យគ្នា។ នាយករដ្ឋមន្ត្រីអាភីស៊ីត ក៏បានលើកឡើងថា ការជួបគ្នារវាងលោក និងលោកនាយករដ្ឋមន្ត្រី ហ៊ុន សែន នៅសហរដ្ឋអាមេរិក និងនៅបែលហ្ស៊ិក គឺទទួលបានលទ្ធផលល្អ ហើយលោកសង្ឃឹមថា ការជួបលើកទី ៣ នេះ កាន់តែមានផលប្រយោជន៍ច្រើនថែមទៀត។ ជំនួបលើកទី ៣របស់នាយករដ្ឋមន្ត្រីកម្ពុជា និងថៃដែលគ្រោងធ្វើឡើងនៅទីក្រុងហាណូយ ប្រទេសវៀតណាម នៅចុងខែតុលានេះ នៅក្រៅកិច្ចប្រជុំកំពូលអាស៊ាន។
មន្ត្រីជាន់ខ្ពស់រដ្ឋាភិបាលថៃបានបង្ហាញឆន្ទៈរបស់ខ្លួនដល់គណៈប្រតិភូកម្ពុជាក្នុងការដោះស្រាយបញ្ហាព្រំដែន។ ទាំងលោកនាយករដ្ឋមន្ត្រីថៃ អាភីស៊ីត វេចាជីវ៉ា និងលោក កាស៊ីត ភិរម្យ រដ្ឋមន្ត្រីក្រសួងការបរទេសថៃ សុទ្ធតែបានអះអាងថា កំណត់ហេតុនៃកិច្ចប្រជុំរវាងរដ្ឋមន្ត្រីការបរទេសកម្ពុជា-ថៃ លើបញ្ហាជម្លោះព្រំដែន ទាំងបីលើកនឹងដាក់ចូលទៅកាន់រដ្ឋសភាថៃ អនុម័តនាសប្តាហ៍ក្រោយ គឺនៅថ្ងៃទី ២៦ តុលា។ ហើយដូចអ្វីដែលប្រមុខរដ្ឋាភិបាលកម្ពុជាបានថ្លែងថា ប្រសិនបើកិច្ចព្រមព្រៀងទាំងបី ត្រូវបានសភាថៃផ្តល់សច្ចាប័ន នោះដំណោះស្រាយបញ្ហាព្រំដែន ការកែសម្រួលកងទ័ពនៅតំបន់ប្រាសាទព្រះវិហារ ការដោះមីនតាមបណ្តោយព្រំដែននឹងមិនជាប់គាំងតទៅទៀតឡើយ។
សង្គ្រាមពាក្យសម្តី និងការទូតរវាងកម្ពុជា និងថៃ ហាក់ដូចជាបានបិទបញ្ចប់ទៅហើយ។ ឥឡូវនេះកម្ពុជា និងថៃមានតែការពិភាក្សាគ្នាថា តើធ្វើយ៉ាងណាឲ្យប្រទេសទាំងពីរអាចរស់នៅដោយសុខសាន្ត ក្នុងនាមជាអ្នកជិតខាងល្អ។ ជារួម រូបភាពរវាងប្រទេសកម្ពុជា និងថៃមានការផ្លាស់ប្តូរ គឺផ្លាស់ប្តូរផ្នែកនយោបាយ មានន័យថា មេដឹកនាំនៃប្រទេសទាំងពីរបាននិយាយរកគ្នា និងធ្វើការជាមួយគ្នា ហើយកម្ពុជា និងថៃ ក៏គ្មានទំនាស់ការទូតអ្វីទៀតដែរ។ ក៏ប៉ុន្តែ ខ្លឹមសារមិនទាន់បានល្អនៅឡើយទេ ខណៈដំណោះស្រាយលើទំនាស់ព្រំដែនមិនទាន់មាន ហើយកងទាហានថៃឈ្លានពាននៅតែបន្តមានវត្តមាននៅក្នុងទឹកដីកម្ពុជា។
ទោះយ៉ាងណា មន្ត្រីរដ្ឋាភិបាលកម្ពុជា មានសុទិដ្ឋិនិយមថា ជំហានទី១ គឺរូបភាពនយោបាយនៃប្រទេសទាំងពីរផ្លាស់ប្តូរ ហើយបន្តបន្ទាប់ គឺខ្លឹមសារលើដំណោះស្រាយព្រំដែនក៏នឹងមានដែរ ជាពិសេសគេទន្ទឹងរង់ចាំមើលថ្ងៃទី ២៦ ខែតុលា ប្រសិនបើរដ្ឋសភាថៃផ្តល់សច្ចាប័នលើកិច្ចព្រមព្រៀងរួម នោះខ្លឹមសារលើដំណោះស្រាយបញ្ហាជម្លោះព្រំប្រទល់ដែនរវាងប្រទេសទាំងពីរ នឹងពិតជាមានការផ្លាស់ប្តូរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ