ព្រះអង្គម្ចាស់នរោត្តម រណឫទ្ធិ៖ ព្រះរាជវង្សានុវង្សមិនគួរធ្វើនយោបាយទេ
ព្រះអង្គម្ចាស់ នរោត្តម រណឫទ្ធិ បានបញ្ជាក់ជាថ្មីថា ព្រះអង្គនឹងមិនវិលត្រលប់ ទៅធ្វើនយោបាយវិញទេ។ រីឯព្រះរាជវង្សានុវង្ស ក៏គួរតែស្ថិតនៅអព្យាក្រឹត និងរួបរួម ជុំវិញព្រះរាជបល្ល័ង្ក។ ព្រះបន្ទូលរបស់ព្រះអង្គម្ចាស់ នរោត្តម រណឫទ្ធិ យ៉ាងដូច្នេះ បានធ្វើឡើង នៅពេលដែលព្រះអង្គម្ចាស់ក្សត្រិយ នរោត្តម អរុណរស្មី ព្រះរាជបុត្រីពៅរបស់សម្តេចព្រះ នរោត្តម សីហនុ នឹងត្រូវយាងទៅគង់ដឹកនាំគណបក្សហ៊្វុនស៊ិនប៉ិច ដើម្បីចូលរួមការបោះឆ្នោតជាតិ នាខែកក្កដា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
សម្តេចក្រុមព្រះ នរោត្តម រណឫទ្ធិ សព្វថ្ងៃ មានតួនាទីជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ ឋានៈស្មើនាយករដ្ឋមន្ត្រី។ ក្នុងបទសម្ភាសន៍ជាមួយកាសែតរស្មីកម្ពុជា កាលពីថ្ងៃពុធ ព្រះអង្គបានបញ្ជាក់ជាថ្មីថា ព្រះអង្គនឹងមិនវិលត្រលប់ ចូលប្រឡូកក្នុងនយោបាយវិញទេ។
សម្តេចក្រុមព្រះ ក៏បានលើកឡើងថា ព្រះរាជវង្សានុវង្ស នៅពេលនេះ ក៏ពុំគួរធ្វើនយោបាយឡើយ។ ព្រះរាជវង្សានុវង្ស ត្រូវស្ថិតនៅអព្យាក្រឹត ហើយរួបរួមគ្នា ជុំវិញរាជបល្ល័ង្ក និងជុំវិញព្រះមហាក្សត្រ ព្រះមហាក្សត្រិយ ក្នុងព្រះបរមរាជវាំង។
បន្ទូលដូច្នេះ ក៏ត្រូវបានសម្តេចក្រុមព្រះ ទូលថ្វាយព្រះករុណា ព្រះមហាក្សត្រ សម្តេចព្រះ នរោត្តម សីហមុនី ដែលជាព្រះអនុជរបស់ព្រះអង្គ។ ព្រះរាជបល្ល័ង្ក ក៏ត្រូវប្រមែប្រមូលអ្នករាជានិយម។
ព្រះបន្ទូលរបស់សម្តេចក្រុមព្រះដូច្នេះ ចំពេលគណបក្សហ៊្វុនស៊ិនប៉ិច របស់លោក ញឹក ប៊ុនឆៃ បានយាងសម្តេចរាជបុត្រី ព្រះអនុជ នរោត្តម អរុណរស្មី មកដឹកនាំហ៊្វុនស៊ិនប៉ិច ដើម្បីចូលរួមការបោះឆ្នោតជាតិ នាថ្ងៃ២៨ ខែកក្កដា។
សម្តេចក្រុមព្រះ បានលើកឡើងថា សម្តេចរាជបុត្រី ព្រះអនុជ នរោត្តម អរុណរស្មី ពុំគួរយាងទៅដឹកនាំគណបក្សហ៊្វុនស៊ិនប៉ិចទេ។ តាមព្រះអង្គ ទាំងសម្តេចព្រះអនុជ និងទាំងលោក ញឹក ប៊ុនឆៃ គឺមិនអាចស្រោចស្រង់ ឲ្យហ៊្វុនស៊ិនប៉ិច ថ្កុំថ្កើងឡើងវិញឡើយ។ ដូច្នេះគួរទុកជូនលោកនាយករដ្ឋមន្ត្រី ហ៊ុន សែន ដែលលោកបានសច្ចា ចំពោះព្រះបរមសពសម្តេចឪ សម្តេចតា ព្រះមហាក្សត្រ សម្តេចម៉ែ ម្តងជាពីរដង ក្នុងការថែរក្សានូវព្រះរាជបល្ល័ង្ក។
យ៉ាងណាក៏ដោយ នៅព្រឹកថ្ងៃព្រហស្បតិ៍ ទី២១កុម្ភៈ ក្នុងពេលជូនព្រះរាជដំណើរព្រះមហាក្សត្រ និងសម្តេចម៉ែ រួមទាំងព្រះអនុជ អរុណរស្មី ទៅពិនិត្យព្រះរាជសុខភាព នៅទីក្រុងប៉េកាំង ប្រទេសចិន លោក ញឹក ប៊ុនឆៃ ប្រធានប្រតិបត្តិគណបក្សហ្វ៊ុនស៊ិនប៉ិច បានចាត់ទុកបន្ទូលរបស់សម្តេចក្រុមព្រះ នរោត្តម រណឫទ្ធិ ថាជាការរារាំងមិនឲ្យសមាជិករាជវង្សានុវង្ស ចូលរួមក្នុងកិច្ចការនយោបាយ។
លោក ញឹក ប៊ុនឆៃ បញ្ជាក់ថា ដោយសារតែសម្តេចក្រុមព្រះ ពុំមានឱកាសវិលមកដឹកនាំ ហ្វ៊ុនស៊ិនប៉ិច ទើបព្រះអង្គលើកឡើងដូច្នេះ។
គណបក្សហ៊្វុនស៊ិនប៉ិច គ្រោងនឹងធ្វើសមាជ នៅថ្ងៃទី២៣មីនា ដើម្បីថ្វាយឋានៈប្រធានដឹកនាំ ដល់សម្តេចព្រះរាជបុត្រី អរុណរស្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ