បេសកម្មរបស់អ្នករាយការណ៍ពិសេស អ.ស.ប. ទៅកូរ៉េខាងត្បូងដើម្បីនិយាយរឿងប្រកាន់ពូជសាសន៍ និងការរើសអើង
លោកមុយទុយម៉ា រូទីរ៉េ អ្នករាយការណ៍ពិសេសរបស់អង្គការសហប្រជាជាតិស្តីពីការប្រកាន់ពូជសាសន៍ បានផ្តើមទស្សនកិច្ចរយៈពេលមួយសប្តាហ៍នៅក្នុងទឹកដីកូរ៉េខាងត្បូង ដើម្បីនិយាយពីបញ្ហាប្រកាន់ពូជសាសន៍ និងការរើសអើង។ បេសកម្មរបស់លោករូទីរ៉េនឹងជួយដាស់ស្មារតីកូរ៉េខាងត្បូងឲ្យ ប្រឹងប្រែងបន្ថែមទៀតក្នុងការបំបាត់ភាពរើសអើង និងប្រកាន់ពូជសាសន៍។ គួរជម្រាបជូនថា កូរ៉េខាងត្បូងជាប្រទេសដែលគេថា មានការប្រកាន់ពូជសាសន៍ និងជាតិនិយមជ្រុល។
ចុះផ្សាយនៅថ្ងៃ៖
ស្តាប់ - ០២:២៦
មិនខុសពីប្រទេសអាស៊ីផ្សេងទៀតទេ កូរ៉េខាងត្បូងក៏ជាប្រទេសមួយដែលគេមិនសូវឃើញមានជនជាតិណាផ្សេងរស់នៅលាយឡំជាមួយណាស់ ពោលគឺមានច្រើនតែជាតិកូរ៉េគ្នាឯង។ នេះមិនមែនមានន័យថា កូរ៉េខាងត្បូងមិនទទួលជនបរទេសនោះទេ។ តែបញ្ហានៅត្រង់ថា ពួកជនបរទេសដែលរស់នៅក្នុងទឹកដីកូរ៉េខាងត្បូងមានអារម្មណ៍ថា ពួកគេហាក់ដូចជាមិនបានទទួលស្វាគមន៍ដោយស្មោះត្រង់ រាក់ទាក់ប៉ុន្មានទេ។ តើនេះ មិនមែនជាកាយវិការមួយដែលមានលក្ខណៈប្រកាន់ពូជសាសន៍ និងរើសអើងចំពោះជនបរទេសទេ ឬយ៉ាងណា ឬមួយក៏ថាសម្រាប់ប្រជាជនកូរ៉េទូទៅ វាជាកាយវិការធម្មតាដែលគេមិនបានថ្លឹងថ្លែងជាមុន?
លោកគីម យីយុន អ្នកស្រាវជ្រាវម្នាក់នៃវិទ្យាស្ថានសិក្សានយោបាយក្នុងក្រុងសេអ៊ូលបានធ្វើអត្ថាធិប្បាយថា មានមនុស្សខ្លះមិនបានយល់ថា អ្វីទៅជាកាយវិការ និងពាក្យសម្តីដែលគួរធ្វើ និងនិយាយ ហើយមិនគួរធ្វើ និងមិនគួរនិយាយនោះ។ ម្យ៉ាងទៀត ក៏មានអ្នកខ្លះថែមទំាងមិនបានដឹងអំពីនិយមន័យពិតប្រកាដរបស់ពាក្យប្រកាន់ពូជសាសន៍ផងក៏មាន ឬមួយដឹងដែរ តែបើជាធ្វើមិនដឹងទៅវិញ។ មានការរើសអើងខ្លះត្រូវបានធ្វើដោយចេតនា ដូចជាការផ្តល់ប្រាក់ខែឲ្យជនអន្តោប្រវេសន៍តិចជាងជនជាតិកូរ៉េខាងត្បូងដែលធ្វើការងារដូចគ្នា ឬមួយក៏ផ្តល់ការងារមិនចំជំនាញឲ្យជនអន្តោប្រវេសន៍ជាដើម។ ការប្រកាន់ពូជសាសន៍ និងការរើសអើងមិនមែនមានតែនៅក្នុងស្រទាប់មហាជនសាមញ្ញប៉ុណ្ណោះទេ តែក៏មាននៅក្នុងជួរអ្នកនយោបាយផងដែរ។ ជាក់ស្តែងលោកស្រី យ៉ាស្មីន លីដែលជាជនជាតិកូរ៉េមានដើមកំណើតហ្វីលីពីន បានទទួលការវាយប្រហារយ៉ាងអាម៉ាស់តាមប្រព័ន្ធអ៊ីនធឺណែត។
គឺនៅក្នុងបរិបទនេះហើយដែលលោកមុយទុយម៉ា រូទីរ៉េ អ្នករាយការណ៍ពិសេសរបស់អង្គការសហប្រជាជាតិបានទៅកូរ៉េខាងត្បូងក្នុងបំណងជួយដាស់ស្មារតីរដ្ឋាភិបាលឲ្យប្រឹងប្រែងបន្ថែមទៀតក្នុងការបំបាត់ភាពរើសអើង និងប្រកាន់ពូជសាសន៍។ គេសង្ឃឹមថា ជាមួយនឹងការបំលាស់ទីរបស់ប្រជាជនកូរ៉េខាងត្បូងទៅបរទេស និងការហូរចូលជនបរទេសកាន់តែច្រើនឡើងៗទៅកូរ៉េខាងត្បូង អ្វីៗនឹងអាចផ្លាស់ប្តូរឆាប់ៗនាពេលខាងមុខ។ បើគិតចន្លោះឆ្នំា ២០០៦ និង ២០១៣ ជនបរទេសដែលរស់នៅក្នុងទឹកដីកូរ៉េខាងត្បូងបានកើនពី ៥០០ ០០០ ទៅ ១ ៤៥០ ០០០នាក់ ពោលស្មើនឹង ៣% នៃប្រជាជនកូរ៉េខាងត្បូងទំាងអស់។ របាយការណ៍របស់លោកមុយទុយម៉ា រូទីរ៉េស្តីពីបញ្ហាប្រកាន់ពូជសាសន៍ និងរើសអើងនៅកូរ៉េខាងត្បូងនឹងត្រូវបញ្ជូនទៅឲ្យក្រុមប្រឹក្សាសិទ្ធិមនុស្សរបស់អង្គការសហប្រជាជាតិនាឆ្នំា ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ