ជនល្មើស៦នាក់ ដែលរំលោភបំពានរួមគ្នាលើស្ត្រីទេសចរស្វ៊ីស ទទួលទោសជាប់គុកមួយជីវិត
នៅថ្ងៃសៅរ៍នេះ តុលាការឥណ្ឌា ក្នុងរដ្ឋMadhya ភាគកណ្តាលប្រទេស បានសំរេចដាក់ទោសជនល្មើស៦នាក់ ដែលរំលោភបំពានរួមគ្នាលើស្រីទេសចរស្វ៊ីសមួយរូប កាលពីខែមិនាកន្លងទៅ អោយជាប់ពន្ធនាគារមួយអស់ជីវិត។ គួររំលឹកឡើងវិញថា កាលពីខែមិនា កន្លងទៅ ជនល្មើសទាំង៦នាក់នេះ បានធ្វើការរំលោភរួមគ្នាលើស្ត្រីទេសចរស្វ៊ីសម្នាក់ ហើយថែមទាំងបានចងរឹតប្តីរបស់នាង ព្រមទាំងប្លន់យកទ្រព្យសម្បតិ្តផ្ទាល់ខ្លួននាងនិងប្តីនាងផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
នៅថ្ងៃសៅរ៍នេះ ព្រះរាជអាជ្ញានិងអ្នកច្បាប់នៅឥណ្ឌា បានសំដែងការរីករាយ បន្ទាប់ពីតុលាការបានសំរេចដាក់ទោសជនល្មើសទាំង៦រូប អោយជាប់ពន្ធនាគារមួយជីវិត។ ជនល្មើសបួននាក់ជាប់ទោសពីបទរំលោភផ្លូវភេទរួមគ្នាលើស្ត្រីទេសចរជនជាតិស្វ៊ីស ហើយពីរនាក់ទៀតជាប់ទោសពីបទបំពាននិងលួចប្លន់ជនរងគ្រោះនិងស្វាមី។
ស្ត្រីរងគ្រោះជនជាតិស្វ៊ីស មានអាយុ៣៦ឆ្នាំ ហើយស្វាមីនាង អាយុ៣០ឆ្នាំ បានរងគ្រោះ កាលពីខែមិនា កន្លងទៅ នៅពេលដែលពួកគេកំពុងធ្វើទេសចរនៅរដ្ឋMadhya ស្ថិតនៅភាគកណ្តាលប្រទេសឥណ្ឌា។ ជនល្មើសបួននាក់ បានរំលោភនាងនៅកន្លែងដាំព្រៃឈើមួយ ស្ថិតនៅសង្កាត់Datia ជាកន្លែងដែលនាងនិងស្វាមីបានបោះជំរំទេសចរ។ ស្វាមីស្ត្រីជនជាតិស្វ៊ីសត្រូវបានជនល្មើសទាំងនេះ ចាប់ចងជាប់។
ការចាប់រំលោភជាប្រធានបទក្តៅគគុកនៅឥណ្ឌា ជាប្រទេសផ្តល់អាទិភាពដល់បុរស។ ក្នុងប្រទេសនេះ មានករណីចាប់រំលោភស្ត្រីនិងកុមារីច្រើន ហើយអាជ្ញាធរនិងតុលាការហាក់បិទភ្នែក ព្រងើយកន្តើយធ្វើអោយជនល្មើសរួចខ្លួន។ ករណីរំលោភរួមគ្នាលើនិស្សិតពេទ្យស្រីម្នាក់ និងការវាយដំពីជនល្មើសរហូតធ្វើអោយនាងបាត់បង់ជីវិត បានធ្វើអោយប្រជាជនឥណ្ឌា បាតុកម្ម បញ្ចេញកំហឹងយ៉ាងខ្លាំងក្លាក្នុងប្រទេស។
ស្ត្រីស្វ៊ីសរូបនេះរងនូវការរំលោភ ត្រឹមតែមួយខែប៉ុណ្ណោះ បន្ទាប់ពីមានករណីរំលោភនិស្សិតពេទ្យស្រី។ បណ្តាបស្ចិមប្រទេសជាច្រើន បានទូន្មានប្រជាពលរដ្ឋខ្លួន អោយចៀសវាងធ្វើទេសចរនៅឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ