លោកនាយករដ្ឋមន្ត្រី ហ៊ុន សែន ប្រកាសប្តឹងបកប្រធានយុវជនសម រង្ស៊ី
លោកនាយករដ្ឋមន្ត្រី ហ៊ុន សែន បានប្រកាសនៅថ្ងៃនេះថា លោកនឹងប្តឹងបកទៅប្រធានចលនាយុវជនគណបក្សសម រង្ស៊ីវិញក្នុងករណីដែលតុលាការរកមិនឃើញថា លោកមានកំហុសក្នុងករណីមនុស្សស្លាប់នៅលើស្ពានពេជ្រកាលពី ពីរឆ្នាំមុន។ ការប្រកាសប្តឹងបករបស់ប្រមុខដឹកនាំរដ្ឋាភិបាលបានកើតឡើង ពីរថ្ងៃបន្ទាប់ពីលោក សួង សុភ័ណ្ឌ ប្រធានចលនាយុវជនគណបក្សសម រង្ស៊ី បានដាក់ពាក្យប្តឹងទៅតុលាការក្រុងភ្នំពេញដោយចោទលោកនាយករដ្ឋមន្ត្រីថា ជាអ្នកទទួលខុសត្រូវចំពោះការស្លាប់មនុស្សជាង ៣៥០ នាក់ដោយការរត់ជាន់គ្នាក្នុងអំឡុងបុណ្យអុំទូកកាលពីឆ្នាំ ២០១០។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
លោកនាយករដ្ឋមន្ត្រី ហ៊ុន សែន បានប្រកាសឲ្យដឹងនៅថ្ងៃនេះថា លោកនឹងប្តឹងបកទៅប្រធានចលនាយុវជនគណបក្សសម រង្ស៊ី វិញ ក្នុងករណីដែលតុលាការរកមិនឃើញកំហុសរបស់លោកដូចការចោទប្រកាន់។ ការប្តឹងបកនេះត្រូវបានលោកនាយករដ្ឋមន្ត្រីចាត់ទុកជាសិទ្ធិស្របច្បាប់របស់ពលរដ្ឋម្នាក់ៗដើម្បីការពារកិត្តិយស និងសេចក្តីថ្លៃថ្នូររបស់ខ្លួន។ ដូច្នេះ ក្នុងនាមមេដឹកនាំម្នាក់ លោកក៏ត្រូវការពារកិត្តិយស និងសេចក្តីថ្លៃថ្នូររបស់លោកក៏ដូចជារបស់រដ្ឋាភិបាលដែរ។
នៅក្នុងពិធីចែកប័ណ្ណកម្មសិទ្ធដីធ្លីជូនប្រជាពលរដ្ឋនៅក្នុងស្រុកព្រៃនប់ ខេត្តព្រះសីហនុ នាព្រឹកថ្ងៃទី២ ខែធ្នូ នេះ លោកនាយករដ្ឋមន្ត្រីបានថ្លែងថា នៅប្រទេសកម្ពុជា មានសិទ្ធិបញ្ចេញមតិពេញលេញ ហើយសូម្បីយុវជនម្នាក់ក៏មានសិទ្ធិអាចប្តឹងនាយករដ្ឋមន្ត្រីបានដែរ។ ប៉ុន្តែលោកបានប្រកាសថា នឹងរក្សាសិទ្ធិក្នុងការប្តឹងបកវិញ។ ប្រមុខរដ្ឋាភិបាលព្រមានទុកជាមុនថានៅពេលមានការប្តឹងបក គេមិនត្រូវស្រែកថា ជារឿងនយោបាយឬការប្រើប្រាស់អំណាចដើម្បីគាបសង្កត់នោះឡើយ។
ប្រធានចលនាយុវជន គណបក្ស សម រង្ស៊ី លោកសួង សុភ័ណ្ឌបានដាក់ពាក្យប្តឹងលោកនាយករដ្ឋមន្ត្រីហ៊ុន សែន ទៅតុលាការរាជធានីភ្នំពេញកាលពីថ្ងៃទី៣០ វិច្ឆិកា ដោយចោទប្រកាន់ពីបទមនុស្សឃាតគិតទុកជាមុន។ មូលហេតុគឺដោយសារតែលោកជាអ្នកគ្រប់គ្រងប្រទេស តែបែរជាបានបណ្តោយឲ្យសោកនាដកម្មនោះកើតឡើង។
គួររម្លឹកថា កាលពីរាត្រីថ្ងៃទី២២ វិច្ឆិកា ឆ្នាំ ២០១០ ដែលជាថ្ងៃចុងក្រោយនៃពិធីបុណ្យអុំទូក មានមនុស្ស ៣៥៣នាក់បានផ្អើលជាន់គ្នាស្លាប់ និង៤០០នាក់ទៀតរងរបួស នៅលើស្ពានកោះពេជ្រដែលជាទីរមណីយដ្ឋានដ៏ពេញនិយមមួយនៅទីក្រុងភ្នំពេញ។ រដ្ឋាភិបាលបានចាត់ទុកថា នេះជាឧបទ្ទវហេតុផ្អើលរត់ជាន់គ្នា ហើយក៏បានទទួលស្គាល់ថា នេះជាសោកនាដកម្មដែលមានមនុស្សស្លាប់ច្រើនបំផុត បន្ទាប់ពីរបបខ្មែរក្រហម។ ប៉ុន្តែ គ្មានមន្ត្រីអាជ្ញាធរណាម្នាក់ទទួលទោសក្នុងរឿងនេះទេ។
ក្រៅពីប្តឹងលោកនាយករដ្ឋមន្រី្ត ប្រធានចលនាយុវជនគណបក្សសមរង្ស៊ី ក៏គ្រោងនឹងដាក់ពាក្យបណ្តឹងប្រឆាំងនឹងលោក គង់ សំអុល រដ្ឋមន្ត្រីក្រសួងព្រះបរមរាជវាំង និងជាប្រធានគណៈកម្មាធិការជាតិរៀបចំបុណ្យជាតិ និងអន្តរជាតិ លោក ទូច ណារ៉ុថ អតីតស្នងការប៉ូលិសក្រុងភ្នំពេញ និងលោក កែប ជុតិមា អភិបាលរាជធានីភ្នំពេញផងដែរ។ ពាក្យបណ្តឹងប្រឆាំងលោកនាយករដ្ឋមន្ត្រីក៏ត្រូវបានប្រធានចលនាយុវជនគណបក្សសម រង្ស៊ី គ្រោងដាក់ទៅកាន់តុលាការយុត្តិធម៌អន្តរជាតិ ទីក្រុងឡាអេថែមទៀត។ ប៉ុន្តែឥឡូវនេះ គឺដល់វេនដែលលោកនាយករដ្ឋមន្ត្រីប្រកាសប្តឹងបកវិញម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ