លោក ស៊ីជិនពីង ៖ របបពហុបក្ស មិនស៊ីនឹងប្រទេសចិន
ប្រទេសចិន បានសាកល្បងដកពិសោធន៍នយោបាយ ដោយដឹកនាំប្រទេសតាមបែបពហុប្រព័ន្ធ ច្រើនបែបរួចហើយ ជាពិសេសប្រព័ន្ធនយោបាយពហុបក្ស ប៉ុន្តែនេះប្រព័ន្ធនេះមិនអាចដំណើរការបាន នៅក្នុងសង្គមចិនទេ។ នេះជាប្រសាសន៍របស់ប្រធានាធិបតីចិន ក្នុងឱកាសទស្សនកិច្ចនៅអឺរ៉ុប ល្ងាចថ្ងៃអង្គារម្សិលមិញ ជាមួយនឹងការព្រមានមិនឱ្យប្រទេសផ្សេងយកគំរូតាម។
ចុះផ្សាយនៅថ្ងៃ៖
ស្តាប់ - ០១:៣១
គឺនៅចំពោះមុខសិស្សនិស្សិតបែលហ្សិក កាលពីល្ងាចមិញ ដែលលោកប្រធានាធិបតីចិន ស៊ីជិនពីង ការពាររបបឯកបក្សរបស់ចិន។ របបរាជានិយមអាស្រ័យរដ្ឋធម្មនុញ្ញ របបរាជាធិរាជ្យ របបដឹកនាំពហុបក្ស ឬរបបដឹកនាំដោយប្រធានាធិបតី ។ល។ និង។ល។ ចិនបានពិចារណា និងបានសាកល្បងអស់ហើយ ប៉ុន្តែគ្មាន របបមួយណាអាចដំណើរការបានទេ នៅក្នុងប្រទេសចិន ! នេះបើយោងតាមសម្រង់អត្ថបទចុះផ្សាយក្នុងទំព័រកាសែតចិនថ្មីនៅព្រឹកថ្ងៃពុធទី ២ មេសានេះ។
លោកប្រធានាធិបតី ក៏បានពន្យល់លម្អិតថា បើទោះបីរដ្ឋធម្មនុញ្ញអនុញ្ញាតឱ្យចិនអាចបង្កើតឬមានគណបក្សនយោបាយតូចៗ ខ្លះ ក្នុងក្របខ័ណ្ឌនៃការគោរពតាមប្រព័ន្ធ “កិច្ចសហប្រតិបត្តិការពហុបក្ស” មែន ប៉ុន្តែតួនាទីរបស់បក្សតូចនេះ មានលក្ខណៈបន្ទាប់បន្សំណាស់ ! រដ្ឋធម្មនុញ្ញចិន បានឧទ្ទិសនាទីសំខាន់បំផុតដល់គណបក្សកុម្មុយនិស្ត ក្នុងការចាត់ចែងកិច្ចការរដ្ឋាភិបាល។
ជាមួយនឹងការពន្យល់បំភ្លឺអំពីហេតុផលនៃរបៀបដឹកនាំចិន លោក ស៊ីជីនពីង ក៏បានព្រមាន និងប្រឆាំងរាល់គំនិតរបស់ប្រទេសខ្លះ ដែលចង់យកគំរូនយោបាយដឹកនាំ និងអភិវឌ្ឍន៍ប្រទេសនៅបរទេស តាមបែបចិន។
ដោយសារបរិបទប្រវត្តិសាស្ត្រ និងសង្គម គេមិនអាចចម្លងប្រព័ន្ធនយោបាយនិងអភិវឌ្ឍន៍ ចិន នៅក្នុងប្រទេសផ្សេងទៀតបានឡើយ ពីព្រោះ វាមិនឆ្លើយតបទៅនឹង សង្គមនិងប្រវត្តិសាស្ត្រប្រទេសនោះ។ មិនតែមិនធ្វើទៅរួច តែថែមទាំងបង្កគ្រោះថ្នាក់ និងផលវិបាកយ៉ាងធ្ងន់ធ្ងរបំផុតទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ