ប្រធានាធិបតីអ៊ុយក្រែនទូរស័ព្ទទៅប្រធានាធិបតីរុស្សីនិយាយអំពីការស្វែងរកសន្តិភាពតាមព្រំដែន
នៅថ្ងៃសុក្រទី១៣មិថុនានេះ លោកប្រធានាធិបតីអ៊ុយក្រែន ប៉េត្រូ ប៉ូរ៉ូឆិនកូ បានជួបសន្ទនាតាមទូរស័ព្ទជាមួយលោកប្រធានាធិបតីរុស្សី ពូទីន ដើម្បីដាក់បង្ហាញនូវគំរោងការស្វែងរកសន្តិភាពនៅក្នុងតំបន់ដែលមានការងើបបះបោរទាមទារផ្តាច់ទឹកដី។ ទោះបីជាយ៉ាងណា លោកប្រធានាធិបតី អ៊ុយក្រែន មិនបានភ្លេចត្អូញត្អែដាក់រុស្សីទេ អំពីការដែលមានរថក្រោះរុស្សី ក្រវែលចុះឡើងក្នុងទឹកដីអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
នេះជាលើកទីមួយហើយ ដែលប្រធានាធិបតីទាំងពីរបានពិភាក្សាគ្នា ដើម្បីចរចារកសន្តិភាពនៅតំបន់ភាគខាងកើតប្រទេសអ៊ុយក្រែន។ តំបន់ដែលមានការប្រទូសរ៉ាយគ្នារវាងកងទ័ពអ៊ុយក្រែន និងពួកអ្នកបះបោរទាមទារផ្តាច់ទឹកដី គាំទ្រដោយរុស្សី។ អ្នកនាំពាក្យរបស់លោក ប៉េត្រូ ប៉ូរ៉ូឆិនកូ បាននិយាយថាវាជាការសន្ទនាដែលមានរយៈពេលវែង ហើយមានសារៈសំខាន់បំផុតសម្រាប់ភាគីទាំងពីរ ដែលទន្ទឹមនឹងនោះ លោក ប៉េត្រូ ប៉ូរ៉ូឆិនកូ បានទាំងឆ្លៀតបង្ហាញការមិនពេញចិត្តដែលមានរថក្រោះរុស្សី បានបើកបរក្រវែលចូលនៅក្នុងទឹកដីអ៊ុយក្រែន។
ទោះបីជាយ៉ាងណា ភាពតានតឹងនៅតែមាន ជាពិសេសនៅតំបន់ដូណេតស្ក៍ ភាគខាងកើតអ៊ុយក្រែន ដែលប៉ុន្មានថ្ងៃមុននេះ មានការដាក់គ្រាប់បែកបំផ្ទុះរថយន្តមេដឹកនាំផ្តាច់ទឹកដីនិយមរុស្សីម្នាក់ ដែលបានបណ្តាលឲ្យស្លាប់មនុស្សពីរនាក់ ចំណែកឯមេដឹកនាំនោះមិនបាននៅក្នុងរថយន្តទេ។
មុននឹងមានជំនួបតាមទូរស័ព្ទនេះ ប្រមុខការទូតរុស្សីបាននិយាយរិះគន់អ៊ុយក្រែន ថាគ្មានបានធ្វើសម្បទានណាមួយ ដើម្បីបញ្ឈប់អំពើហិង្សា ហើយថាអ៊ុយក្រែនបានបន្តបង្ក្រាបការងើបបះបោរផ្តាច់ទឹកដី។ រុស្សីមានគម្រោងបញ្ជូនសំណុំរឿងនេះទៅដល់ក្រុមប្រឹក្សាសន្តិសុខអង្គការសហប្រជាជាតិ។ លោកបន្តថា លោកបានចាត់ឲ្យមានការស៊ើបអង្កេតអំពីព៌តមានដែលថា អ៊ុយក្រែនបានដាក់បង្កៃគ្រាប់បែកភ្លើង។
រដ្ឋមន្ត្រីក្រសួងការបរទេសអ៊ុក្រែនបានច្រានចោលការចោទប្រកាន់នេះទាំងស្រុង ហើយបានបន្ថែមថាគន្លឹះនៃដំណោះស្រាយគឺស្ថិតក្នុងកណ្តាប់ដៃរុស្សី។ លោកបន្តថា រុស្សីត្រូវតែឈប់គាំទ្រពួកក្រុមបះបោរផ្តាច់ទឹកដី ហើយឈប់បញ្ជូនកងទ័ពទាំងឡានៗ និងរថក្រោះខ្លួនមកក្នុងទឹកដីអ៊ុយក្រែន តទៅទៀត។ លោកបានបញ្ជាក់ផងដែរថា កងទ័ពអ៊ុយក្រែន បានដណ្តើមកាន់កាប់មកវិញដែនដីប្រមាណចម្ងាយ១០០គម ពីព្រំដែនជាមួយរុស្សី។ បើសិនជាភាពស្ងប់ស្ងាត់បន្តមាន នោះគម្រោងដំណោះស្រាយរកសន្តិភាព ដែលបានដាក់ស្នើដោយលោកប៉េត្រូ ប៉ូរ៉ូឆិនកូ និងត្រូវបានគេដាក់ឲ្យអនុវត្ត។ ផ្ទុយទៅវិញ បើរុស្សីនៅតែរឹងទទឹងមិនព្រមទទួលយក អ៊ុយក្រែន នឹងស្នើសុំឲ្យលោកខាងលិច រិតបន្តឹងទណ្ឌកម្មលើរុស្សី។
គួរបញ្ជាក់ផងដែរថា ក្រៅពីជម្លោះតាមព្រំដែនរវាងអ៊ុយក្រែននិងរុស្សី ប្រទេសទាំងពីរនេះក៏មានភាពមិនចុះសម្រុងគ្នាដែរ ទាក់ទងទៅនឹងតម្លៃឧស្ម័ន។ កន្លងមក រុស្សីទាមទារឲ្យអ៊ុយក្រែនសងបំណុលថ្លៃឧស្ម័នដែលជំពាក់ បើមិនដូច្នោះទេ រុស្សី នឹងឈប់ផ្គត់ផ្គង់ឧស្ម័នតទៅទៀត។ ចូរកំភ្លេចថា ដើម្បីផ្គត់ផ្គង់ឧស្ម័នដល់បណ្តាប្រទេសអឺរ៉ុបមួយចំនួន រុស្សីត្រូវបញ្ជូនតាមបំពង់ឧស្ម័នក្រោមដី ឆ្លងកាត់តាមប្រទេសអ៊ុយក្រែន។ ដូចនេះមិនមែនតែអ៊ុយក្រែនតែមួយទេ ដែលគ្មានឧស្ម័នប្រើប្រាស់ ពោលគឺបណ្តាប្រទេសអឺរ៉ុបមួយចំនួនទៀត ក៏នឹងគ្មានឧស្ម័នប្រើប្រាស់ដូចគ្នាដែរ បើសិនជារុស្សីសម្រេចថាបញ្ឈប់ការផ្គត់ផ្គង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ