តើរវាងប្រធានាធិបតីរុស្ស៊ី និងអាមេរិកមានការអាក់អន់ចិត្តនឹងគ្នាឬ ?
សំណួរនេះ ត្រូវគេចោទសួរអស់ប៉ុន្មានថ្ងៃ ជាប់មកហើយ ក្រោយពីលោកពូទីន ប្រធានាធិបតីថ្មីនៅរុស្ស៊ីថ្លែងថា គាត់មិនអាចទៅចូលរួមក្នុងជំនួបកំពូល G8 ចុងសប្តាហ៍នេះ នៅឯជាយក្រុងវ៉ាស៊ីនតោន។ រួចបន្ទាប់មក លោក អូបាម៉ា ប្រធានាធិបតីអាមេរិក ជាប្រទេសម្ចាស់ផ្ទះខំរៀបចំទទួលកិច្ចប្រជុំនេះ ពីចំណែកខ្លួនបានប្រតិកម្មថា គាត់ក៏មិនអាចមកចូលរួមដែរ នៅក្នុងជំនួបកំពូល APEC នៅក្រុងរុស្ស៊ី Vladivostok ក្នុងខែកញ្ញាខាងមុខ។
ចុះផ្សាយនៅថ្ងៃ៖
ស្តាប់ - ០២:៣៦
កាលពីថ្ងៃ ១១ ឧសភា គឺ៤ថ្ងៃ ក្រោយពីលោកពូទីនទទួលពាក្យសម្បថឡើងជាប្រធានាធិបតីនៃសហព័ន្ធរុស្ស៊ីមក លោកប្រធានាធិបតីស.រ.អា. អូបាម៉ាបានទូរស័ព្ទមកអបអរសាទរលោកពូទីន ក្នុងតំណែងថ្មីនេះ។ នាកិច្ចសន្ទនាដែលបានប្រព្រឹត្តទៅ លោកពូទីនបានសម្តែងការសោកស្តាយ ដែលដោយមកពីជាប់រវល់ក្នុងរឿងពិនិត្យមើល បញ្ជីឈ្មោះបេក្ខជនក្នុងអនាគតរដ្ឋាភិបាលរុស្ស៊ី គឺមិនអាចដកខ្លួនទៅចូលរួមក្នុងជំនួបកំពូល G8 នៅស.រ.អា. ក្នុងថ្ងៃទី ១៨-១៩ ឧសភាខាងមុខឡើយ។ ហើយលោកពូទីនបានសម្រេចថា បញ្ជូនលោកនាយករដ្ឋមន្ត្រីមេដវេដេវឲ្យវត្តមានក្នុង G-8 នោះ ជំនួសគាត់ទៅវិញ។ កាលណោះ លោកអូបាម៉ាបានសម្តែងនូវការយោគយល់ចំពោះធុរៈរបស់លោកពូទីន។ គូភាគីក៏បានព្រមព្រៀងគ្នាថា នឹងជួបគ្នាដាច់ដោយឡែក តែ២នាក់ គឺក្នុងបរិវេណនៃជំនួបកំពូល G20 នៅប្រទេសម៉ិចស៊ិចថ្ងៃទី ១៨-១៩ មិថុនា ឬ១ខែក្រោយទៅវិញ។
ការដែលលោកពូទីនសម្រេចថា មិនទៅចូលរួមដោយខ្លួនគាត់ផ្ទាល់ក្នុងជំនួបកំពូល G8 នៅ ស.រ.អា. ត្រូវកាសែតនៅទីនេះបកស្រាយថា មកពីគាត់អន់ចិត្តនឹងគោលជំហរអាមេរិកដែលនៅតែបន្តសាងសង់ “ប្រព័ន្ធខែលមីស្ស៊ីល ប្រឆាំងមីស្ស៊ីល” នៅអឺរ៉ុប ប្រព័ន្ធដែលម៉ូស្គូចាត់ទុកជាការគម្រាមដល់សន្តិសុខជាតិរុស្ស៊ី ហើយក្នុងរឿងនេះ វ៉ាស៊ីតោននៅតែមិនព្រមផ្តល់ការធានា ជាលាយលក្ខណ៍អក្សរមកឲ្យម៉ូស្គូ ថាប្រព័ន្ធនេះឥតតម្រង់ប្រឆាំងនឹងរុស្ស៊ីទេ។ មកពីរឿង “ប្រព័ន្ធខែលមីស្ស៊ីល” នេះឯងដែលលោកពូទីនបានសម្រេចថា មិនទៅចូលរួមទេ ក្នុងជំនួបកំពូលរុស្ស៊ី-អូតង់ ដែលគ្រោងប្រព្រឹត្តទៅ នៅក្រុង Chicago ថ្ងៃទី ២០-២១ ឧសភា។
នៅដើមឡើយ ទាំងជំនួបកំពូល G8 ទាំងជំនួបកំពូលអូតង់ មានគ្រោងប្រព្រឹត្តទៅ គឺតែនៅក្រុង Chicago មួយប៉ុណ្ណោះ។ ប៉ុន្តែ ដើម្បីទុកមុខ ទុកមាត់ឲ្យលោកពូទីន បានជាលោក អូបាម៉ា ខំញែកជំនួបកំពូល G8 ទៅធ្វើដាច់ដោយឡែកនៅឯបុរី Camp David ជាយក្រុងវ៉ាស៊ីនតោនទៅវិញ។ កាសែតថែមទាំងបង្ហើបឲ្យដឹងទៅផងថា ដើម្បីចាត់ចែងជំនួប២នេះឲ្យដាច់ពីគ្នា រដ្ឋបាលលោកអូបាម៉ាថែមទាំងបង្ខំចិត្តចំណាយជាង ៣០លានដុល្លារទៀត។
ថ្ងៃទី ១៤ ឧសភាកន្លងទៅ អ្នកនាំពាក្យរបស់សេតវិមានក្រុងវ៉ាស៊ីនតោន លោក Jay Carney បានថ្លែងថា លោកប្រធានាធិបតីអូបាម៉ាមិនអាចមកចូលរួមទេ ក្នុងជំនួបកំពូល APEC នៅក្រុងរុស្ស៊ី Vladivostok ដែលនឹងប្រព្រឹត្តទៅ ពីថ្ងៃទី ២ ដល់ទី៩ កញ្ញា ឆ្នាំ២០១២នេះ។ មូលហេតុ មកពីលោកអូបាម៉ាត្រូវជាប់រវល់នឹង ”មហាសន្និបាតគណបក្សប្រជាធិបតេយ្យ” របស់គាត់ដែលនឹងចាប់ផ្តើម គឺនៅចំថ្ងៃទី ៣ កញ្ញាតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ