ដំណើរបំពេញទស្សនកិច្ចមួយជុំទ្វីបអឺរ៉ុបលើកដំបូងរបស់លោកថេន សេន
លោកប្រធានាធិបតីភូមាថេន សេនកំពុងបំពេញទស្សនកិច្ចមួយជុំទ្វីបអឺរ៉ុប។ នៅថ្ងៃអង្គារ ទី២៦ កុម្ភៈនេះ លោកថេន សេនកំពុងស្ថិតក្នុងទីក្រុងអូស្លូ ប្រទេសន័រវែសដើម្បីបំពេញទស្សនកិច្ចរយៈពេល ៣ថ្ងៃ។ បន្ទាប់មក លោកនឹងបន្តដំណើរទៅកាន់ប្រទេសហ្វាំងឡង់ អូទ្រីស បែលហ្ស៊ិក និងប្រទេសអ៊ីតាលី។ គឺជាទស្សនកិច្ចលើកទីមួយរបស់ប្រមុខរដ្ឋភូមាអ្នកកំណែទម្រង់ម្នាក់នៅក្នុងទ្វីបអឺរ៉ុប។ ទស្សនកិច្ចនេះបានបញ្ជាក់យ៉ាងច្បាស់អំពីការពង្រឹងឡើងវិញនូវទំនាក់ទំនងរវាងទីក្រុងណៃពីដ៏ និងទីក្រុងនៃប្រទេសអឺរ៉ុបមួយចំនួន។
ចុះផ្សាយនៅថ្ងៃ៖
ស្តាប់ - ០២:៣៧
គឺទីក្រុងអូស្លូ ប្រទេសន័រវែសដែលលោកប្រធានាធិបតីភូមាថេន សេនបានផ្តើមទស្សនកិច្ចមុនគេ ហើយជម្រើសទីក្រុងអូស្លូនេះទៀតសោតក៏មិនមែនជារឿងមួយចៃដន្យទេ តែជានិមិត្តរូបមួយយ៉ាងសំខាន់។ និមិត្តរូបយ៉ាងសំខាន់ ព្រោះថា គឺនៅទីក្រុងអូស្លូនោះឯង ដែលលោកស្រីប្រធានគណបក្សប្រឆំាងភូមាអ៊ុង សានស៊ូជីបានទៅបំពេញទស្សនកិច្ចកាលពីខែមិថុនាឆ្នំា ២០១២ កន្លងទៅ ដើម្បីទទួលរង្វាន់ណូបែលសន្តិភាពដែលគណៈកម្មាធិការណូបែលបានប្រគល់ឲ្យលោកស្រីកាលពីឆ្នំា ១៩៩១ និងដែលកាលណោះ លោកស្រីអ៊ុង សានមិនអាចចាកចេញពីប្រទេសទៅទទួលបាន។
នៅក្នុងប្រទេសន័រវែសរយៈពេល ៣ថ្ងៃ មានប្រធានបទជាច្រើនដែលលោកថេន សេន និងថ្នាក់ដឹកនំាន័រវែសត្រូវលើកទៅជជែក រួមមាន កំណែទម្រង់ប្រជាធិបតេយ្យនៅភូមា បញ្ហាបរិស្ថាន ជំនួយរបស់ន័រវែសដើម្បីអភិវឌ្ឍភូមា និងជាពិសេស កិច្ចសហប្រតិបត្តិការសេដ្ឋកិច្ចរវាងទីក្រុងណៃពីដ៏ និងអូស្លូ តែប្រហែលជាគ្មានការចុះហត្ថលេខាលើកិច្ចព្រមព្រៀងណាមួយទេ នេះបើយោងតាមអ្នកនំាពាក្យក្រសួងការបរទេសន័រវែស។ អ្នកនំាពាក្យរូបនេះដដែលបានបញ្ជាក់ថា មានការវិវឌ្ឍន៍ប្រកបដោយវិជ្ជមានជាច្រើននៅក្នុងប្រទេសភូមានារយៈពេលប៉ុន្មានឆ្នំាចុងក្រោយនេះ តែនៅមានកិច្ចការជាច្រើនទៀតដែលរដ្ឋាភិបាលភូមាត្រូវបន្តធ្វើ។
គឺការវិវឌ្ឍន៍ប្រកបដោយវិជ្ជមាននៅក្នុងប្រទេសភូមានារយៈពេលប៉ុន្មានឆ្នំាចុងក្រោយនេះហើយ ដែលបានធ្វើឲ្យរដ្ឋាភិបាលរបស់លោកថេន សេនទទួលបានការលុបចោលប្រាក់បំណុលជាងពាក់កណ្តាលពីសហភាពអឺរ៉ុបកាលពីដើមឆ្នំា ២០១២ កន្លងមក។ បច្ចុប្បន្ន និងនៅចំពោះមុខ មានវិស័យជាច្រើនដែលភូមាត្រូវធ្វើការអភិវឌ្ឍន៍ និងដែលតម្រូវការអ្នកវិនិយោគបរទេស គឺជារឿងមួយមិនអាចខ្វះបាន។ ត្រង់ចំណុចនេះ ក្រុមហ៊ុនអឺរ៉ុបបាននិងកំពុងផ្តោតការយកចិត្តទុកដាក់យ៉ាងខ្លំាង។ នៅដើមខែមីនាក្រោយ សន្និសីទអន្តរជាតិមួយស្តីពីវិស័យប្រេងឥន្ធនៈនឹងត្រូវរៀបចំនៅក្នុងទីក្រុងរ៉ង់ហ្គូនជួនចំពេលដែលលោកថេន សេនកំពុងស្ថិតក្នុងទ្វីបអឺរ៉ុបនៅឡើយ។ នេះអាចជាឱកាសមួយដែលថ្នាក់ដឹកនំាអឺរ៉ុបលើកយកបញ្ហានេះទៅជជែកជាមួយលោកថេន សេន។
គួររម្លឹកជូនឡើងវិញបន្តិចថា គ្រាន់តែក្នុងរយៈពេល ២ឆ្នំា លោកប្រធានាធិបតីថេន សេនបានធ្វើកំណែទម្រង់ប្រទេសឆ្ពោះទៅកាន់លទ្ធិប្រជាធិបតេយ្យយ៉ាងឆាប់រហ័ស និងបានធ្វើឲ្យគ្រប់គ្នាមានការភ្ញាក់ផ្អើលយ៉ាងខ្លំាង។ តែទន្ទឹមគ្នានេះ នៅមានបញ្ហាផ្ទៃក្នុងមួយចំនួនដែលនៅបន្តជាបញ្ហាដ៏ចម្រូងចម្រាសដដែល រួមមាន ជម្លោះប្រដាប់អាវុធជាមួយក្រុមឧទ្ទាមភាគតិចកាឈីននៅប៉ែកខាងជើង និងស្ថានភាពសិទ្ធិមនុស្សដុនដាបរបស់ប្រជាជនរ៉ូហ៊ីងយ៉ា។ គឺជាសំណុំរឿងពីរដែលសហភាពអឺរ៉ុបមិនបោះបង់គំនាបលើរដ្ឋាភិបាលភូមាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ