ក្រោយកងទ័ពប្រកាសច្បាប់អាជ្ញាសឹក នាយករដ្ឋមន្ត្រីស្តីទីថៃស្នើរៀបចំបោះឆ្នោតសភា ថ្ងៃ៣សីហា
នៅល្ងាចថ្ងៃអង្គារនេះ ក្រោយកងទ័ពប្រកាសដាក់ប្រទេសថៃក្រោមច្បាប់អាជ្ញាសឹកមក នាយករដ្ឋមន្ត្រីស្តីទីថៃ លោក នីវ៉ាតទំរុង ប៊ុនសុងផៃសាន បានស្នើអោយរៀបចំការបោះឆ្នោតសភា នៅថ្ងៃ៣សីហា ខាងមុខ។ ដោយឡែក បាតុករប្រឆាំងរដ្ឋាភិបាលថៃនៅតែបន្តទាមទារអោយរដ្ឋាភិបាលចុះពីអំណាច ក្នុងករណីចាំបាច់ ក្រុមបាតុករអាចនឹងប្រើកម្លាំងបាយបង្ខំបាន។
ចុះផ្សាយនៅថ្ងៃ៖ កែប្រែថ្ងៃទី៖
នៅល្ងាចថ្ងៃអង្គារនេះ នាយករដ្ឋមន្ត្រីស្តីទីថៃ លោក នីវ៉ាតទំរុង ប៊ុនសុងផៃសាន បានស្នើអោយរៀបចំការបោះឆ្នោតសភា សម្រាប់ថ្ងៃ៣សីហា ខាងមុខ។ លោកនីវ៉ាតទំរុង បានប្រាប់អ្នកសារព័ត៌មានថា រដ្ឋាភិបាលបានសរសេរលិខិតទៅគណៈកម្មការបោះឆ្នោត ស្នើថ្ងៃបោះឆ្នោតថ្មី ហើយលោកសង្ឃឹមថា នឹងមានក្រឹត្យកំណត់ថ្ងៃបោះឆ្នោតពីព្រះមហាក្សត្រថៃ នៅសប្តាហ៍ក្រោយនេះ។
ការស្នើថ្ងៃបោះឆ្នោតសភាថ្មីនេះ ធ្វើឡើងក្រោយពេលកងទ័ពថៃបានប្រកាសដាក់ប្រទេសថៃ ក្រោមច្បាប់អាជ្ញាសឹក។ កងទ័ពលើកឡើងថា ការប្រកាសច្បាប់សឹកនេះ គ្មានទិសដៅធ្វើរដ្ឋប្រហារយោធាទេ តែជាការជួយរៀបចំសណ្តាប់ធ្នាប់សាធារណៈក្នុងស្រុកឡើងវិញ បន្ទាប់ពីថៃរងបាតុកម្មហិង្សារាប់ខែមកនេះ។ ការប៉ះទង្គិចហិង្សាក្នុងបាតុកម្ម រាប់ខែមកនេះបានសម្លាប់មនុស្ស២៨នាក់។
ទោះជាកងទ័ពមិនបានប្រាប់ជាមុននូវការប្រកាសដាក់ច្បាប់សឹកក្នុងប្រទេសក្តី នាយករដ្ឋមន្ត្រីស្តីទីថៃ បានប្រាប់ថា លោកគាំទ្រកងទ័ពក្នុងការសម្រេចប្រើច្បាប់សឹកនេះ។ ក្រោយពេលប្រកាសច្បាប់អាជ្ញាសឹកនៅព្រឹកថ្ងៃអង្គារមក កងទ័ពថៃបានសុំអោយភាគីរដ្ឋាភិបាលនិងក្រុមប្រឆាំងចរចាគ្នា។ សម្រាប់នាយករដ្ឋមន្ត្រីស្តីទី ការប្រកាសច្បាប់សឹកនេះ ក៏ជាឱកាសអោយភាគីទាំង២ ចរចារកពេលវេលាបោះឆ្នោត និងអោយរដ្ឋាភិបាលធ្វើកំណែទម្រង់ មុននឹងរៀបចំការបោះឆ្នោតសាជាថ្មីផងដែរ។
ដោយឡែក ទោះជាថៃកំពុងស្ថិតក្រោមច្បាប់អាជ្ញាសឹកពេលនេះក្តី បាតុករប្រឆាំងរដ្ឋាភិបាល បានប្រកាសបន្តចលនាបាតុកម្ម ទាមទារអោយរដ្ឋាភិបាលបច្ចុប្បន្ន ចុះពីអំណាច។ មេដឹកនាំចលនាប្រឆាំង ស៊ូថេប បានប្រាប់ថា នៅតែបន្តបាតុកម្មព្រោះក្រុមប្រឆាំង នៅមិនទាន់ទទួលជោគជ័យនៅឡើយទេ។ ក្រុមអាវក្រហមគាំទ្ររដ្ឋាភិបាលវិញ បានព្រមានក្រុមប្រឆាំងហើយថា បើនៅធ្វើបាតុកម្មដើម្បីទំលាក់រដ្ឋាភិបាលបច្ចុប្បន្នទៀត ក្រុមអាវក្រហមធ្វើសង្គ្រាមស៊ីវិលជាមួយក្រុមប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ