អំពើហិង្សាសហគមន៍ នៅភាគខាងលិចភូមាសប្តាហ៍នេះ សម្លាប់មនុស្សច្រើននាក់
នៅប្រទេសភូមា អង្គការក្រៅរដ្ឋាភិបាលមួយ បានប្រាប់នៅថ្ងៃសុក្រនេះថា អំពើហិង្សាប្រឆាំងសហគមន៍អ្នកកាន់សាសនាអ៊ីស្លាម រ៉ូហ៊ីងយ៉ាស នៅភាគខាងលិច បានកើតឡើងសាជាថ្មី ក្នុងសប្តាហ៍នេះ សម្លាប់មនុស្សអស់ច្រើននាក់ ពិសេសគឺស្ត្រី និងកុមារ។ យោងតាមប្រភពព័ត៌មានជាច្រើន អ្នកស្លាប់អាចមានចំនួនពី១០នាក់ឡើងទៅ។ អំពើហិង្សាសហគមន៍នេះ បានធ្វើអោយអាមេរិកព្រួយបារម្ភ និងអំពាវនាវអោយរដ្ឋាភិបាលភូមា ធ្វើការស៊ើបអង្កេតនាំជនដៃដល់មកកាត់ទោសតាមច្បាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
នៅដើមសប្តាហ៍នេះ នៅភូមា អង្គការក្រៅរដ្ឋាភិបាលមួយបានប្រាប់ថា អំពើហិង្សាសហគមន៍ប្រឆាំងអ្នកកាន់សាសនាអ៊ីស្លាមរ៉ូហ៊ីងយ៉ាស បានកើតមានជាថ្មីម្តងទៀត នៅភាគខាងលិចប្រទេស ជិតព្រំដែនជាមួយបង់ក្លាដែស សម្លាប់មនុស្សអស់ច្រើននាក់ ពិសេសគឺស្ត្រី និងកុមារតែម្តង។
ស្ថានភាពរដ្ឋរ៉ាក់ឃីនភាគភូមាភាគខាងលិច នៅតែស្ថិតក្នុងភាពតានតឹង បន្ទាប់ពីមានអំពើហិង្សារវាងអ្នកកាន់ពុទ្ធសាសនា និងអ្នកកាន់សាសនាអ៊ីស្លាម កើតឡើង កាលពីឆ្នាំ២០១២ ដែលបានសម្លាប់មនុស្សយ៉ាងហោច២៥០នាក់។
ទាក់ទងអំពើហិង្សាសប្តាហ៍នេះ មេប៉ូលិសមួយរូប នៅក្រុង ម៉ូនដាវ ជិតនោះ បានបដិសេធ ថាគ្មានជនរងគ្រោះស៊ីវិលនោះទេ ហើយថែមទាំងប្រាប់ទៀតថា គឺខាងប៉ូលិសឯណេះវិញទេ ដែលរងការវាយប្រហារ ហើយមានប៉ូលិសម្នាក់បានបាត់ខ្លួនទៀតផង។ ប៉ុន្តែ យោងតាមសកម្មជនការពារសិទ្ធិអ្នកកាន់សាសនាអ៊ីស្លាម រ៉ូហ៊ីងយ៉ាស ម្នាក់ ការវាយប្រហារដែលបានកើតឡើង កាលពីថ្ងៃចន្ទដើមសប្តាហ៍នេះ គឺកើតឡើងក្រោយពេលមានការប្រឈមជាមួយក្រុមប៉ូលិស។ ដោយឡែក ប៉ូលិសក្នុងរដ្ឋរ៉ាក់ឃីន ប្រាប់ថា មនុស្សជាង១០នាក់ត្រូវបានចាប់ខ្លួន។
អ្នកភូមិមួយរូបដែលបានប្រទះឃើញសាកសពជនរងគ្រោះ គិតថា អ្នករស់នៅរដ្ឋរ៉ាក់ឃីន អាចជាអ្នកបង្កអំពើហិង្សានេះ ប្រហែលមិនមែនប៉ូលិសនោះទេ។
នៅថ្ងៃសុក្រនេះ ស្ថានទូតអាមេរិកនៅក្រុងរ៉ង់ហ្គូន បានសំដែងការព្រួយបារម្ភខ្លាំង ហើយបានអំពាវនាវអោយរដ្ឋាភិបាលភូមា ធ្វើការស៊ើបអង្កេតអោយបានជ្រាលជ្រៅលើអំពើហិង្សានេះ ដើម្បី នាំជនដៃដល់មកដាក់ទោស។ អាមេរិកក៏បានសុំអោយភូមាធានាការការពារសន្តិសុខអោយបានខ្ពស់ ក្នុងរដ្ឋរ៉ាក់ឃីន អោយបានដូចជានៅទីកន្លែងផ្សេងទៀតទូទាំងប្រទេសផងដែរ។
នៅរដ្ឋរ៉ាក់ឃីន ភាគខាងលិចភូមា មានអ្នកកាន់សាសនាអ៊ីស្លាម រ៉ូហ៊ីងយ៉ាស ប្រមាណ៨សែននាក់រស់នៅ។ ពួកគេគ្មានសិទ្ធិទទួលសញ្ជាតិភូមានោះទេ។ ប្រជាជនភូមាចាត់ទុកជនជាតិរ៉ូហ៊ីងយ៉ាស ថាជាជនភៀសខ្លួនខុសច្បាប់មកពីបង់ក្លាដែស។ យោងតាមអង្គការសហ ប្រជាជាតិ ជនជាតិរ៉ូហ៊ីងយ៉ាស ថាជាជនជាតិភាគតិចដែលរងការសម្លាប់រង្គាលច្រើនជាងគេ ក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ