ជំរំមួយរបស់ទ័ពព្រៃម៉ូរ៉ូរំដោះអ៊ីស្លាមធ្លាក់ទៅក្នុងដៃរបស់កងទ័ព
ជិតដប់ថ្ងៃកន្លងមកហើយដែលកងទ័ពនិងពួកទ័ពព្រៃនៃរណសិរ្សម៉ូរ៉ូរំដោះអ៊ីស្លាម បានប៉ះទង្គិចគ្នា នៅប៉ែកខាងត្បូងនៃកោះMindanao។ កងទ័ពថែមទាំងបានប្រើយន្តហោះ ចម្បាំងដើម្បីវាយប្រហារទៅលើជម្រករបស់ពួកទ័ពព្រៃផង។ នៅថ្ងៃព្រហស្បតិ៍ទី២៧តុលានេះ ជំរំមួយរបស់ពួកម៉ូរ៉ូត្រូវបានកាន់កាប់ដោយទាហានហ្វីលីពីនហើយ។ ប្រតិបត្តិការយោធានេះបានបណ្តាលឲ្យស្លាប់ពួកទ័ពព្រៃ១៣នាក់ និងបានបណ្តាលឲ្យមានជនភៀសសឹករហូតដល់ទៅជាង១០ ០០០នាក់។
ចុះផ្សាយនៅថ្ងៃ៖
ស្តាប់ - ០១:១១
សម្រាប់រដ្ឋាភិបាល គោលដៅនៃប្រតិបត្តិការយោធានេះ គឺវាយកំទេចពួកទ័ពព្រៃនៃរណសិរ្សម៉ូរ៉ូរំដោះអ៊ីស្លាមមួយក្រុម ដែលបានបង្កចលាចលនៅប៉ែកខាងត្បូងនៃកោះMidanao ជិតដប់ថ្ងៃកន្លងមកហើយ។ អាជ្ញាធរហ្វីលីពីនអះអាងថា ពួកអ្នកទាំងនេះជាចោរព្រៃឆក់ប្លន់ប្រជាជន និងបានបណ្តាលឲ្យស្លាប់ទាហានជាង៣០នាក់។
នៅថ្ងៃព្រហស្បតិ៍ទី២៧តុលានេះ អាជ្ញាធរបានប្រាប់ឲ្យដឹងថា កងទ័ពបានវាយយកបានជម្រករបស់ពួកចោរព្រៃទាំងនេះហើយ។ យោងទៅតាមប្រភពជាផ្លូវការដដែលនេះ មេចោរព្រៃបានត្រូវរបួសនិងបានរត់ភៀសខ្លួនជាមួយគ្នីគ្នាជាង៤០នាក់។
សូមជម្រាបថា ប្រធានាធិបតីអាគីណូ(Aquino) បាននិងកំពុងបន្តចរចាជាមួយរណសិរ្សម៉ូរ៉ូរំដោះអ៊ីស្លាម ដើម្បីបញ្ចប់សង្គ្រាមទ័ពព្រៃដែលបានផ្តើមឡើងតាំងពីចុងទសវត្សរ៍ទី៦០មកម្ល៉េះ។
រដ្ឋាភិបាលទីក្រុងម៉ានីល បានគូសបញ្ជាក់ថា ប្រតិបត្តិការយោធានេះដែលបានទាំងប្រើប្រាស់យន្តហោះចម្បាំងជាលើកទីមួយតាំងពីឆ្នាំ២០០៨មក មិនផ្អាកដំណើរការនៃកិច្ចចរចាទេ។ សូមជម្រាបថា រណសិរ្សម៉ូរ៉ូរំដោះអ៊ីស្លាមដែលបានទាមទារបង្កើតរដ្ឋអ៊ីស្លាមឯករាជមួយ ឥឡូវនេះព្រមចរចាជាមួយទីក្រុងម៉ានីល ដើម្បីស្វ័យភាពនៃកោះមួយចំនួននៅប៉ែកខាងត្បូងនៃប្រទេស ដូចជាកោះMindanao និងSulu ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ